1 Vu ca nu ukere fa̱a̱n,

adama a na vu ta̱ ta̱wa̱ vu tsura̱i a rana vee elime.

2 Vu ne'eshe ili i na vu ri na̱ yi,

ba̱ta̱ cindere ko kunla̱,

adama a na vu reve cu'un meleshe

ma na ma̱a̱ riya̱a̱ uvaɗi u nda shi.

3 A mantsa ma na eleshe a shunwai na̱ mini,

a̱ tsu ro'o ta̱ mini e iɗa,

mɓa̱nga̱ n na uɗanga u riya̱i, ko uyagi ko ugana,

uba̱ta̱ u na u riya̱i, lo ɗa u tsu von.

4 Za na suru ri e idanasa upepu,

wa yuwan ca̱'a̱n shi,

za na suru e idanasa eleshe,

wa yuwan ugasa shi.

5 Cine vu revei ure wu upepu shi,

ko cine wuma u tsu uwa a̱ lipu mereɓu

a̱a̱tsuma̱ a mma va̱ yi shi,

ne ɗe fo vu reve ulinga wa̱ A̱sula̱ shi,

a̱yi na u yuwain ili biti.

6 Vu yuwan ca̱'a̱n vi icu'un ya̱ wu nu usana,

nu ulivu she vu katala ekere a̱ wu wan,

adama a na vu reve za na a yuwan aba'un shi,

ko a̱yi nda, ko a̱yi ndeɗe,

ko waru suru nle a̱ da̱na̱ na a aba'un.

7 Amayun ekan a̱ tu uyo'o,

ili yu ulobonu iɗa esu a̱ ka̱lyuwa̱ ekan yu urana.

8 Ko na̱ shi vuma yuwan a'wan a̱bunda̱,

lyawa wu uwwa uyo'o u le suru.

Lyawa u cuwan na̱ rana vi irumbu,

adama a na a̱ ta̱ a̱bunda̱ lon.

Ili i na i na i farai suru, ili ya̱ pere i ɗa.

9 Vu yuwan ma̱za̱nga̱, a̱vu molobo a mantsa ma na vu ri a̱ tsulobo,

lyawa okolo a̱ wu a yuwan ma̱za̱nga̱

a rana wuma u tsulolobo tsa̱ a̱ wu.

Vu toni ure wo o okolo a̱ wu,

na̱ suru ili i na esu a̱ wu enei.

Amma vu reve, e ekere e ili nda suru,

A̱sula̱ a̱ ta̱ ge'eto wu.

10 Vu tawa cu'un vu udamu suru o okolo a̱ wu,

nu usa̱n diga a̱ lipu va̱ wu.

Adama a na tsulobo na̱ tsulolobo

ili ye pere i ɗa suru.