1 Reve n ka̱lyuwa̱, a̱vu me ene suru cu'un vi iɓongi i na aa yuwusan a̱tsuma̱ o uvaɗi u nda.

Me ene ta̱ aɓara a zana o ɓongishi,

agba babu za na aa casu le adanshi.

Ele ozo o uɓongishi'i e le ɗa a̱ ri nu ucira.

Ele a̱za̱ oo uɓongishi'i,

babu za na a casu le adanshi.

2 A̱vu n damma aza a na a̱ kuwa̱i ɗe e ivuwan ta̱,

a la'a ta̱ aza a na a̱ ri wuma mawwa mo uyo'o.

3 Amma za na la'a n le uwwa uyo'o suru suru,

a̱yi ɗa za na koto a matsain shi,

za na koto enei linga vi iwuya

i na aa yuwusan a̱tsuma̱ o uvaɗi u nda shi.

4 N gura ta̱ reve ili na i zuwai ama suru a̱ ri na̱ a̱ɓula̱ a̱tsuma̱ o ulinga u le suru. Ili i na i zuwai a̱ yi ɗa za suru ciga ta̱ na wa la'a moron ma̱ nden ma̱ yi utsuru. Ili ya̱ ndolo fo ili ya̱ pere i ɗa, waru suru ndolo tsa̱ me reme mo upepu u ɗa.

5 Ulo u tsu katala ta̱ ekere a̱yi

a̱vu u da̱nu hali ambulu a̱ ta̱wa̱ o kototo yi.

6 U ta la'a na̱ ke'en o ukere uta̱, no okolo nven,

na̱ a̱za̱ a̱bunda̱ e ekere e re, na̱ a̱bunda̱ o ulinga,

a̱yi nda fo tsa̱ mereme mo upepu u ɗa.

7 A̱vu waru me ene ili ye pere i ro a̱tsuma̱ o uvaɗi u nda.

8 Me ene ta̱ za ro a̱ nde'en,

babu mawun, babu mawun ma̱ a̱na̱wu,

na̱ ne suru u ta̱ o ukadu wu ulinga mantsa suru.

U tsu cuwa̱n nu utsuru wa̱ yi shi,

a̱vu we ece aciya̱yi u damma,

<< Zane ɗa gba maa yuwusaan a̱ga̱nda̱ o ulinga u nda'a,

hali na m putsayi aciya̱va̱ na̱ mawwa mo uyo'o?>>

Nda fo ili ya̱ pere i ɗa,

nden mu usa̱n n ɗa!

9 Ama e re a la'a ta̱ vuma ta̱,

adama na ulinga wa ama e re

u tsu la'a ta̱ ulinga u vuma ta̱.

10 Adama a na nna̱ vuma ta̱ riya̱,

za ve ire'e u ta kamba za va̱ yi u 'ya̱sa̱n yi.

Amma a̱tsuma̱lima̱ a ta cina za na ri a̱ nden e nde'en,

nnu u riya̱ babu za na aa kamba yi u ya̱sa̱n yi.

11 Nna̱ waru ama e re a̱ ri nven uba̱ta̱ ta̱ oɓolo,

a̱tsu uwwa ta̱ sheshen,

amma cine vuma ta̱ a uwwa sheshen

a̱yi e nde'en?

12 A ta gura lyuwa a aci a vuma ta̱,

amma ama e re a̱ ta̱ tsura̱ u lyuwu wa a aci.

Amunga a̱ ta̱ a na a ɗavai na amunga ata'atsu

u tsu da̱na̱ ta̱ usa̱n u na aa kasa yi go'o.

13 U la'a ta̱ nu ulobo u na u ri nu ugbozu za na ri nu ulambu, na akuci o mogono za tsulo na tsu usu a̱sa̱la̱ shi. 14 U ta gura wo'o ulobo'o wu u ta̱ o u'wa wa ali tsura̱ u kumba tsugono, ko na wo o'woi a matsa yi ta̱ a̱tsuma̱ o ulambu a̱tsuma̱ e iɗa ya̱ yi. 15 N yuwa ta̱ majiyan ma ama a na a̱ ri wuma a̱tsuma̱ o uvaɗi u nda, a̱vu n gura reve a̱tsuma̱ e le a̱ ta̱ tsura̱ ulobo u na waa gura kumba ootogu o mogono. 16 Ko na wo o'woi ama na a yuwusan tsugono aciyele a yuwain a̱bunda̱ babu utyo, amma a mantsa ma na u ri lo shi, babu za na o roco ma̱za̱nga̱ me ili na u yuwain. Amayun ili ya̱ ndolo fo ili ya̱ pere i ɗa, waru suru ndolo tsa̱ me reme mo upepu u ɗa.