1 Ili suru i ta̱ na̱ mantsa,

mantsa me ili biti, ma na ma ntsayi o uvaɗi.

2 Mantsa ma limatan na̱ mantsa mo ukwisa̱,

mantsa ma̱ ca̱'a̱n na̱ mantsa mo ugasa.

3 Mantsa ma̱ mo una, na̱ mantsa ma na a̱ da̱na̱ gbaga,

na̱ mantsa mo wuɓosu na̱ mantsa ma na a suwisa.

4 Na̱ mantsa me mesun na̱ mantsa me izo'oshi,

na̱ mantsa ma̱ a̱tsuma̱la̱ngu, na̱ mantsa ma̱ ma̱za̱nga̱.

5 Mantsa ma na e bete'we atali, na̱ mantsa ma na o ɓoloto le,

mantsa mo ukatalasa, na̱ mantsa ma na a i'wan ukatalasa,

6 mantsa me izami, na̱ mantsa ma na a lamba,

na̱ mantsa ma mazuwa, na̱ mantsa ma na a vari le alanga,

7 Mantsa ma na a kakara, na̱ mantsa ma na a̱ zula̱,

mantsa ma na a̱ rungwa̱ kpen na̱ mantsa ma na a yuwan adanshi.

8 Mantsa me icigi, na̱ mantsa me ima̱,

na̱ mantsa mo uvon na̱ mantsa ma asuvu nde.

9 Ili isa'ani i ne ɗa vuma a̱ tsura̱ a̱tsuma̱ o ulinga wa̱ yi? 10 Me ene ta̱ ili i na A̱sula̱ a cayi e ekere a vuma a na wa̱a̱ da̱na̱ a yuwusan. 11 U zuwa ta̱ ili suru ulobonu na̱ mantsa ma̱ yi. Na̱ ne suru, u zuwa ta̱ majiyan ma vaɗilima̱ na wee reve ili na i ka̱ra̱i ɗe ni ili i na i ri ɗe elime, amma na̱ ne suru a gura reve ili na A̱sula̱ a yuwain diga o ufaru a̱ tyo o ukosu shi. 12 N gura ta̱ reve babu ili i na i la'ai ulobono vuma yuwan, na la'ai u yuwan ma̱za̱nga̱, a̱vu waru u yuwan isa'ani a̱tsuma̱ a wuma wa̱ yi. 13 Za suru u lyuwa a̱vu u sowo, a̱vu wu uwwaa aciya̱yi uyo'o suru a̱tsuma̱ o ulinga wa̱ yi, adama a na a̱ yi ndolo une'e wa̱ A̱sula̱ a ɗa.

14 N gura ta̱ reve suru ili i na a̱ A̱sula̱ a yuwain u ta̱ da̱na̱ lo hali hali, babu ili i na a̱ da̱shi, ko a jiba pe a̱tsuma̱ a̱ yi. A̱sula̱ a yuwan ta̱ ne adama ama suru a̱ da̱na̱ a uwwusa wovon wa̱ yi.

15 Ili i na suru i farai gogo, u da̱na̱ ta̱ ɗe nu ufaru.

Ili i na ya fara fo, u shi ta̱ ɗe u fara,

A̱sula̱ waru a tsu zuwa ta̱ suru ili i da̱shi fara.

16 Na̱ ne suru, me ene ta̱ ili i ro a̱tsuma̱ o uvaɗi u nda,

o una̱ wu uge'etosu wa amayun, she iwuya

o una̱ wi isa'ani, agba she ili i na i ri ulobonu shi.

17 N damma ta̱ o okolo a̱ va̱,

<<Na̱ za na a yuwusan a̱ɓula̱

na̱ za vi iwuya,

A̱sula̱ a̱ ta̱ ge'eto le,

adama na u zuwa ta̱ mantsa

ma na aa yuwan ili biti,

mantsa ma na aa yuwan ulinga suru.>>

18 Agba waru n damma ta̱ o okolo a̱ va̱, <<Adama a vaɗilima̱ A̱sula̱ a ɗa a̱ tsu lyungwa̱ le, adama u roco le a la'a iliyamunga shi. 19 Adama a na ukosu wu vaɗilima̱ na̱ za vi iliyamunga suru ili i ta̱ i ɗa. Cine za ta̱ tsu kuwa̱, ne ɗa fo e ekere a za ta̱'a̱. Wivuwun u le ili i ta̱ i ɗa, waru vaɗilima̱ la'a iliyamunga shi. Ili suru ili ye pere i ɗa. 20 Suru n le uba̱ta̱ u ta̱ u ɗa a̱ tsu 'ya̱wa̱, suru n le diga a̱ ma̱buta̱ ma ɗa o uta̱i, suru n le waru a̱ ta̱ a̱ ka̱mba̱ a̱ ma̱buta̱. 21 Zane ɗa a gura reve na wuma wu vaɗilima̱ u tsu ka̱ra̱ ta̱ a̱ 'ya̱wa̱ zuva, a̱vu fo wuma wi iliyamunga i ka̱ra̱ a̱ cipa̱ a̱tsuma̱ e iɗa?>> 22 N gura ta̱ reve babu ili na i la'ai tsundolo, vaɗilima̱ uwwa uyo'o wu ulinga u le, adama a na a̱ yi ndolo a̱ yi ɗa ifoɓi i na A̱sula̱ a yuwaan n le. Zane ɗa aa gura zuwa le ee reve ili i na yaa fara a mantsa ma na a̱ kuwa̱i?