1 Idanshi yi za va a alajiya, ulobo wa̱ Da̱wuda, mogono a̱tsuma̱ a̱ Urishelima.

2 <<Ili ye pere i ɗa, ili suru ili ye pere i ɗa,

za va alajiya a damma ta̱,

ili suru ili ye pere i ɗa.>>

3 Cu'un va atsupu a̱ ne ɗa za a̱a̱ tsura̱

diga a̱tsuma̱ o ulinga wa̱ yi,

za na waa yuwusan a̱tsuma̱ o uvaɗi u nda suru?

4 Mantsa mo ro ma̱a̱ tsu ka̱ra̱ ta̱,

reve mantsa mo ro ma̱ ta̱wa̱,

amma uvaɗi u ta̱ lo hali hali.

5 Urana u tsu ɓa̱tsa̱ ta̱,

a̱vu waru u riya̱,

u tsu jika̱ ta̱ a̱vu u ka̱mba̱

uba̱ta̱ u na u tsu uta̱sa̱.

6 Upepu u tsu lapa ta̱

a̱ tyo wu uyagi,

a̱vu u vadala a̱ tyo wu ugana,

u tsu da̱na̱ ta̱ a̱ ka̱nda̱ruwusa̱,

a̱vu u ka̱mba̱ uba̱tu u na wu uta̱i.

7 Ɗolu suru tsu yene ta̱ a̱ tyo a mala,

amma mala ma tsu shiwan shi.

Uba̱ta̱ u na mini'i wu uta̱i,

ɗe ɗa u tsu ka̱mba̱ waru.

8 Ili suru i tsu zuwa ta̱ vu da̱na̱ nu ukunu,

u tsu la'a ta̱ ili na va gura damma,

esu a̱ tsu kuna̱ na̱ me ene shi,

atsuvu waru a̱ tsu kuna̱ na̱ mawwa shi.

9 Ili i na i farai ɗe nu ufaru,

a̱ yi ɗa waru wa farasa,

Ili na a yuwain ɗe nu ufaru,

a̱ yi ɗa a̱da̱shishi yuwusa.

Babu ili i na i ri usa'avu

a̱tsuma̱ a wuma wu uvaɗi u nda.

10 A̱ ta̱ tsura̱ ili i ro i na a damma,

<<Ka̱lyuwa̱! Ili i nda ili i sa'avu i ɗa>>?

U da̱na̱ ta̱ pa, ɗe nu ujumu

u da̱na̱ ta̱ pa kafu mantsa ma̱ a̱ tsu.

11 Babu za na tsu cuwan

ni ili i na a yuwain ɗe nu ufaru.

Babu za na a cuwan

ni ili i na ya̱a̱ ta̱wa̱ eleme.

Babu za na a̱ cuwan

ni ili i na ya̱a̱ ta̱wa̱

a mantsa ma̱ gogo na̱ mantsa ma na ma̱a̱ ta̱wa̱.

12 A̱mu, za va alajiya, n da̱na̱ ta̱ mogono a aci a Isra'ila a̱tsuma̱ Urishelima. 13 N zuwa ta̱ aciya̱va̱ na moo rito, waru na mee reve nu ugbozu wi ili i na i ri pa a̱tsuma̱ o uvaɗi suru, a̱vu n reve ili yu ume u ne A̱sula̱ a zuwayi vaɗilima̱! 14 Agba me ene ta̱ suru ili na a yuwain a̱tsuma̱ o uvaɗi u nda ili ya̱ pere i ɗa, waru n reve ta̱ suru ndolo tsa̱ me reme mo upepu u ɗa.

15 Ili i na i ri uka̱nzu suru

a gura ba̱ruwa̱ yi shi,

ili i na i ri lo shi,

a gura kece shi.

16 A̱vu n damma aciya̱va̱, <<Ka̱lyuwa̱, n kungwa ta̱ nu urevu lon, hali n la'a ama suru a na a yuwain tsugono a aci a Urishelima kafu a̱mu. Na̱ amayun n tsura̱ ta̱ urevu nu ugbozu lon.>>✝ 17 Agba n zuwa ta̱ aciya̱va̱ uba̱tu u na mee reve nu ugbozu, a̱vu n reve na̱ tsulo nu ujaru, amma n reve ta̱ suru ndolo tsa̱ me reme mo upepu u ɗa.

18 Adama a na a̱bunda̱ o ugbozu u tsu ta̱wa̱a̱ ta̱ na̱ a̱bunda̱ a̱tsuma̱la̱ngu,

a̱bunda̱ o urevu waru u tsu ta̱wa̱a̱ ta̱ na̱ a̱bunda̱ a̱tsuma̱lima̱.