1 Vi idana nu udasu wa̱ wu a mantsa ma na vu uwai o u'wa wa̱ A̱sula̱. U ta la'aa wu vu 'ya̱wa̱ na̱ majiyan ma na voo polo atsuvu, ana a damma vu 'ya̱wa̱ ta̱ vu ca kucci cu'un vo olo, adama a na olo e reve i ili a yuwusan u ri ulobonu shi.

2 She vo o'wo za va̱ a̱bunda̱ o una̱ wan,

ko vu lyawa okolo a̱ wu a̱ je'en,

a mayan ma adanshi a̱ ma̱ka̱ka̱n ma̱ A̱sula̱ wan.

Adama a na A̱sula̱ a̱ ta̱ zuva,

a̱vu gba vu ta̱ pa o uvaɗi.

Adama o ndolo, lyawa adanshi a̱ wu a̱ da̱na̱ wa'a.

3 A̱bunda̱ o udamu u tsu zuwa ta̱

a̱ a̱bunda̱ alavu.

Ne ɗa waru a̱bunda̱ a adanshi

u tsu ta̱wa̱ ta̱ na adanshi o tsulo.

4 A mantsa ma na vu yuwain akucunu na̱ A̱sula̱, she vu lungusa̱ mantsa ma na vo shiton wan, adama a na u tsu uwwa uyo'o wo olo shi. Vu shiton akucunu a na vu yuwain. 5 U ta la'a wu na va yuwan akucunu shi, a na a damma vu yuwan ta̱ akucunu a gba vu shiton shi. 6 She vu lyawa una̱ wa̱ wu u tara wu a̱ tyo o unusu wan, adama ta̱wa̱ vu damma ganu wan,<<N yuwan ta̱ akucunu a̱tsuma̱ o ulambu wu urevu u ɗa. >> Nye i zuwai va zuwa a̱ A̱sula̱ a yuwan upan na̱ vu, hali na wo kototo ulinga wa̱ ekere a̱ wu? 7 A̱bunda̱ a alavu na̱ a̱bunda̱ adanshi a̱ wu suru ili ya̱ pere i ɗa. Amma vu uwwa wovon wa̱ A̱sula̱.

8 Na̱ ve ene cine o ɓongishi a̱za̱ o ulambu o uvaɗi, na̱ cine a 'yuwusan ulambu wa̱ a̱ɓula̱ na̱ amayun, she vu yuwan asalama adama e ili i na yaa farasa wan. Adama a na zagbain biti u ta̱ na̱ za na ri zuva va̱ yi, ne ɗa waru a̱ ta̱ na azagbain a na a̱ ri zuva le suru. 9 Za suru tsu uwwa ta̱ uyo'o wi itana yu una i na iɗa i matsain, mogono fo aciya̱yi u tsu tsura̱ ta̱ uda̱shiyi diga a̱ ɗuma̱.

10 Za vi icigi yi ikebe lon,

ikebe i tsu rawai shi,

za na cigai utsuru waru,

u tsu cuwa̱n ni ili na wa̱a̱ tsura̱sa̱ shi.

Suru ndolo ili ya̱ pere i ɗa.

11 Mantsa ma na utsuru u da̱shiyi,

aza alya a̱ tsu da̱shi ta̱ fo.

Ili isa'ani i ne ɗa za vu utsuru a̱a̱ tsura̱?

She de u reve na u ri nu utsuru goon.

12 Za vu ulinga tsu uwwa ta̱ uyo'o wu nlavu ma̱ yi,

ko na̱ shi u lyuwa ilyalya ke'en ko a̱bunda̱.

Amma ucuwun wu za vu utsuru, u tsu putsa yi ta̱ na̱ nlavu,

adama a̱bunda̱ o utsuru wa̱ yi.

13 N gura ta̱ ene ili iwuya i ro a̱tsuma̱ a wuma wu uvaɗi u nda,

utsuru u na za vi ili zuwai,

u ronoo yi ta̱ a̱tsuma̱la̱ngu,

14 agba a̱ lungusa̱ ta̱ utsuru'u

o ure u na u ri ulobonu shi,

ko na wo o'woi a yuwan ta̱ limatan,

na̱ ne suru a̱ ri ni ili i na a lyawaa muwun nle shi.

15 Ataɓu a ɗa vuma uta̱i a̱ a̱a̱tsuma̱ a mma va̱ yi,

ataɓu a ɗa waru wa̱a̱ ka̱mba̱.

Waa tara ili i ro o ukere wa̱ yi,

a̱tsuma̱ o ulinga u na u yuwain shi.✝

16 Ili ya nda fo a̱ba̱jini e iwuya i ɗa.

Ununa vaɗilima̱ ta̱wa̱i,

ne ɗa waru u tsu ka̱mba̱.

Ili isa'ani i ne ɗa a̱ tsu tsura̱

diga a̱tsuma̱lima̱ a̱ mereme mo upepu?

17 Agba a̱yi ɗa nda rana wuma va̱ yi suru,

u tsu lyuwa ta̱ a̱tsuma̱ e irumbu,

na̱ a̱tsuma̱la̱ngu, nu usa̱n, na̱ mɓa̱la̱, nu upan.

18 Apa ili na me enei. U ta̱ da̱na̱ ulobonu vuma lyuwa a̱vu u sowo, a̱vu waru wu uwwa uyo'o wu ulinga wa̱ yi, a̱tsuma̱ a wuma u ke'en u na u ri na̱ yi, na A̱sula̱ a ca niyi, adama a na a̱ yi ɗa agadu a na A̱sula̱ o foɓoyi vaɗilima̱. 19 Ne ɗa u ri suru e ekere a za na A̱sula̱ a cayi utsuru ni itana, reve fo u ca yi mantsa ma na wa uwwa uyo'o u le. Mawwa mo uyo'o wu ulinga wa̱ yi nu ushishi wi ili i na A̱sula̱ oo foɓo niyi, a̱yi nda fo u ne'e u ɗa uba̱ta̱ wa̱ A̱sula̱. 20 Adama a na cu'un vuma ndolo tsu da̱na̱ nu udamu a̱tsuma̱ a wuma wa̱ yi shi, adama a na A̱sula̱ a tsu tsupusa yi ta̱ ili i na okolo a̱ yi a cigai.