1 N gura ta̱ ene cu'un vi iwuya i ro a̱tsuma̱ o uvaɗi u nda, agba ili'i i yuwan ta̱ a̱bunda̱ lon e ekere a vaɗilima̱. 2 A̱sula̱ a tsu ca ta̱ nanza utsuru, ni ili yi nden, na̱ tsugbain, hali fo ni ili i na u cigai suru a wuma wa̱ yi. Na̱ ne suru A̱sula̱ a tsu lyawai na wa uwwa uyo'o wi ili ya nda shi. O una̱ u ndolo mocin ro ɗa ɗe ko'o, na a uwwa uyo'o u le. A̱yi nda fo ili ya̱ pere i ɗa, waru iwuya i ɗa.

3 U ta gura o'wo vuma matsan muwun ukpaku, a̱vu waru u da̱na̱ na̱ wuma a alanga. Amma na̱ a̱bunda̱ a wuma wa̱ yi suru, nna̱ wu uwwa uyo'o wi ili na u ɓoloto yi shi, agba waru u tsura̱ a̱ciɗa̱ a sa'ani shi, a̱vu n damma, u la'a ta̱ na a matsan mereɓu ukwa̱.

4 Ili ya̱ pere i ɗa mereɓu ma̱ ta̱wa̱ ukwa̱,

a̱tsuma̱ e irumbu a̱vu u ka̱mba̱,

irumbu iɗa i kpoto yi aala a̱yi.

5 Wee ene urana shi,

u reve wuma shi,

amma suru na̱ ne,

u la'a ta̱ asuvu nden na̱ vuma ndeɗe'e.

6 Ko na̱ shi vuma'a u yuwan a'wan ukpakukupa ure, agba wu uwwa uyo'o wi ili shi, wuma wa̱ yi u ri nu urana shi, adama a na suru n le uba̱ta̱ u ta̱ u ɗa a̱ 'ya̱wa̱ shi?

7 Ulinga wu vaɗilima̱ suru adama a̱ a̱a̱tsuma̱ a ɗa,

na̱ ne suru u tsu cuwa̱n shi.

8 Nye i zuwai za vu ugbozu la'ai ulo?

Urana u ne ɗa za vu ulambu ri na̱ a̱yi,

a̱tsuma̱ o urevu wu nden

n na waa yuwan na aza a na a̱ ri wuma?

9 U ta la'a ni ili i na esu e enei,

a na a zuwa okolo e ili i iwau.

Ili ya nda fo ili ya̱ pere i ɗa,

waru tsa̱ mereme mo upepu u ɗa.

10 Suru ili i na a yuwain,

a ca yi ta̱ ɗe ala.

Cine vuma ri,

e revei ta̱ ɗe.

Babu za na a gura mawasan

na̱ za na la'a niyi ucira.

11 Cine adanshi a̱ da̱shishi,

ne ɗa fo ulambu wa̱ a̱ɓula̱ wa̱ yi u tsu da̱shishi.

Cine tsu ɗa ili i ndolo ya̱a̱ ta̱wa̱a̱ na̱ a̱ɓula̱ e ekere a vuma?

12 Amayun ɗa, za ne ɗa a gura reve ili i na i ri na̱ a̱ɓula̱ e ekere a vaɗilima̱ a̱tsuma̱ a rana wuma wa̱ yi zana ri na̱ a̱ɓula̱ shi, aza a na a tsu ka̱ra̱sa̱ cine ululu u tsu ka̱ra̱? Zane ɗa aa gura damma yi ili i na yaa fara mantsa ma na wuma wa̱ yi u kotoi a̱tsuma̱ o uvaɗi u nda?