1 Ana a̱ wu a̱ tu ulobonu na atan,

usheli u mogono!

Cine a yuwain agutsu a̱ wu,

she damma atali e ikebe,

ulinga wu za vu ushe'en.

2 Eben a̱ wu a̱ ta̱ tsa̱ yanda,

za na tsu lamba masayan ma inabi

ma na a̱ ja̱mba̱ra̱i shi.

A̱a̱tsuma̱ a̱ wu a̱ ta̱ tso oɓolo oroci a yitabo,

na a̱ ka̱nda̱ruwa̱i na̱ yipa̱lu i sa'ani ya̱ a̱ka̱nla̱.

3 Agaɓa a̱ wu tsa̱ nre'on n re ɗa a̱ ri,

mpishe m mere'on.

4 Yinlu yu uga'an ya̱ wu i tu ulobonu wa̱ a̱ka̱nla̱

tsu usaa u na u ri wukalu na anga a agiwa.

Esu a̱ wu tsa abata a Heshibon,

zuzu nu una̱ntsu wa Bat Rabim.

Vunu va̱ wu tsa atsura a Lebanon,

za na ri a̱ nka̱la̱la̱i na̱ Dimaska.

5 Aaci a̱ wu a katala wu ta̱ okokolo

tsa Masasan ma Kame,

maɗava ma aaci ma̱ wu ma̱ ta̱ tsa̱ a̱tugu ve egbere,

ili i maluwa uba̱ta̱ u mogono.

6 Vu tu ulobonu, macigata ma̱ va̱.

Vu ta zuwusa mu ma̱za̱nga̱ o ookolo.

7 Uruma wa̱ wu u ta̱ tsu uɗanga u dabino,

agaɓa a̱ wu waru tsa̱ muwun n dabino.

8 N damma ta̱, <<Lyawa n kumba uɗanga'a n taɓa umatsu'un.

Lyawa agaɓa a̱ wu o o'wo mu ataci a̱ ina̱bi,

wivuwun wa̱ wu waru tsa ma̱guru ma apulu.

9 Una̱ wa̱ wu u tu uyo'o,

tsa masayan ma na ma la'ai uyo'o.>>

Lyawa masayan ma inabi u yene mejege

a̱ tyo uba̱ta̱ macigata ma̱ va̱,

u yene ben o una̱ na a anga a̱ yi.

10 A̱mu za macigata ma̱ va̱ ma ɗa,

waru u ta uwwusa maluwa ma̱ va̱.

11 Ta̱wa̱, macigata ma̱ va̱,

lyawa tsu uta̱ a̱ tyo a atsusa,

lyawa tsa asa a̱ mulyuci.

12 Lyawa tsu uta̱ nu usana tsu uwa o uɗuma̱ u ina̱bi,

tse ene ko ɗanga ina̱bi matsan ta̱ ɗe,

ko yipa̱lu i le i ɓoso ta̱ ɗe,

waru ko ɗanga muwun m peme

n yuwan ta̱ ɗe yipa̱lu.

Ɗe ɗa moo roco wu icigi i va̱.

13 Ɗe ɗa va uwwa ma̱guru me ili i na a̱ cu'wa̱in.

Na̱ ɗanga na ri uyo'o suru.

N sokowo wu ta̱ mawwa mo uyo'o

mo ufaru na̱ za va gogo,

macigata ma̱ va̱.