1 Na ayin a̱mu nven a̱ a̱a̱ga̱da̱ a̱ va̱,

n zami yi ta̱ za na asuvu a̱ va̱ a̱ ri e icigi.

N zami yi ta̱ agba n tsura̱ yi shi.

2 N ta̱ 'yon gogo n uwa a̱tsuma̱ a̱ lyuci,

n kuru re re, na̱ mɓa̱nga̱ mɓa̱nga̱.

N zami za na asuvu a̱ va̱ a cigai.

N bunga̱ yi ta̱ agba me ene yi shi.

3 A̱za̱ e ipiri e ene mu ta̱

e le a mabura a̱tsuma̱ a̱ lyuci, a̱vu me ece le,

<<Yee ene ta̱ za na asuvu a̱ va̱ a cigai?>>

4 A jima shi a na mu kasai ne e le,

ɗaɗa me enei za na asuvu a̱ va̱ a cigai,

a̱vu n reme yi, agba n lyawa yi u ka̱ra̱ shi.

Hali she na n ta̱wa̱i na̱ a̱yi o u'wa wa mma va̱,

a aasula a za na matsan numu.

5 Esheli a̱ Urishelima,

kucinayi na ala a̱ nre'on na̱ nshon mu una,

aza a na a̱ ri ulobonu wa̱ a̱ka̱nla̱ a agaɗi

cine a tsu yuwan akucunu na̱ A̱sula̱ o oɓolo a̱ a̱soja a zuva.

Kucuna yi i damma yaa damaton tsu shi,

mantsa ma na tsu ri a uwwusa uyo'o u tsu.

6 Zane ɗa ndeɗe'e za na ri o utusa̱ a̱tsumona

she damma ogbodolu a̱ mikyon,

na̱ ma̱guru ma̱ mur na̱ aturare,

i na a yuwain ni itana yu ucita

ya aza a atsulu na awina?

7 Ka̱lyuwa̱, ootogu a matara mo mogono ma̱ va̱ Sulemanu ɗa!

U da̱na̱ ta̱ uka̱nda̱ruwu na̱ nan yali yu uvon kupota̱li,

nan yali yu uvon ya Isra'ila.

8 Za suru tu uguzu na̱ matsun me pe'eni,

nan yali o uvon ɗa,

za suru na̱ matsun me pe'eni a aagutsu a̱ yi,

ufoɓu adama meleshe ma ayin.

9 Mogono Sulemanu yuwaan ta̱ aciya̱yi

Ootogu a matara mo mogono,

za na a yuwain na akpata a sa'ani a Lebanon.

10 U yuwan ta̱ aɗanga a matara ma̱ yi na̱ azurufa,

reve a palai nu umuna u zinariya.

Uba̱ta̱ wu nda̱na̱ta̱ ma̱ yi waru nu ushili u ma̱ɗiya̱,

a̱vu e esheli a̱ Urishelima a kala yi no oroci e icigi.

11 Uta̱yi a̱ɗu esheli a̱ Sihiyona,

yee ene Mogono Sulemanu

wotowu no okokolo o tsugono,

okokolo a na mma va̱ yi katala niyi o urana u lolo va̱ yi,

urana u na asuvu a̱ yi a yuwain ma̱za̱nga̱.