1 A̱mu yipa̱lu i ɗa a̱tsumona a Sharon,

yipa̱lu yu uka̱ri.

2 Tsa̱ yipa̱lu a̱tsuma̱ a awanda

ne ɗa macigata ma̱ va̱ ma̱ ri a̱tsuma̱ e esheli.

3 Cine uɗanga u apulu u ri a̱tsuma̱ a ɗanga va̱ a̱rumbu

ne ɗa macigata ma̱ va̱ ma̱ ri a̱tsuma̱ o olobo.

N da̱nu ta̱ na̱ ma̱za̱nga̱ o ululu wa̱ yi,

muwun ma̱ yi n ta̱ peme o una̱ u va̱.

4 U tara mu ta̱ a uwa a aasula o oso a masayan,

Icigi ya̱ yi a̱ tyo ya̱'a̱ va̱ atuta a ɗa.

5 Vu gbamato mu no ogbodolu a̱ ina̱bi,

vu ca mu ucira na̱ apulu,

adama a na n ta̱ o ukwa̱ wi icigi ya̱ wu.

6 Ukere wu ugula̱ wa̱ yi u ta̱ za̱la̱ va a aaci a̱ va̱,

ukere u sa'ani wa̱ yi waru u katala mu ta̱!

7 Esheli a̱ Urishelima,

kucinayi na ala a̱ nre'on na̱ nshon mu una*,

na ya damaton icigi i tsu shi,

mantsa ma na tsu ri a uwwusa uyo'o u tsu.

8 Mu uwwa ta̱ uɗyo u macigata ma̱ va̱,

a̱ ta̱wa̱ e ilaɗi diga a nsasan,

u zarana ta̱ a̱ ta̱wa̱ uba̱ta̱ u va̱ diga a agaɗi.

9 Macigata ma̱ va̱ ma̱ ta̱ tsa̱ mere'on

ko tsa mawun me meshon.

A̱ yi ɗa ndeɗe mishin o ucina̱ wu uɓaɓu,

a̱ ka̱lyuwusa̱ mu nu usowoto wu upepu,

a̱ ka̱lyuwusa̱ mu na̱ a̱tsuma̱ o umuna.

10 Macigata ma̱ va̱ maa damma mu ta̱,

'Yon macigata ma̱ va̱, ta̱wa̱ oɓolo na̱ mu

za vu ulobonu u va̱.

11 Uwwa nda, lyushi ka̱ra̱ ta̱,

iro'i i koto ta̱.

12 Yipa̱lu yu uta̱ ta̱ o uvaɗi ma̱ɓula̱,

mantsa me ishipa ma rawa ta̱.

A ta uwwusa ɗyo muɗa e iɗa i tsu.

13 Ɗanga vu biri vu uta̱a̱ ta̱ muwun n le,

ataci a̱ ina̱bi waru o to ɓosuso yipa̱lu,

a ta bazasa ma̱guru me le.

'Yon tsu ka̱ra̱ macigata ma̱ va̱,

ulobonu u va̱, vu ta̱wa̱ oɓolo na̱ mu.

14 Muɗa ma̱ va̱,

ma na ma̱ ri nden a̱ a̱ba̱nu a aatali,

upa'un o uzuru wa atali,

lyawa me ene urewesu wa̱ wu.

Waru lyawa mu uwwa uɗyo wa̱ wu!

Adama a na uɗyo wa̱ wu u tu uyo'o,

urewesu wa̱ wu waru u tu ulobonu wa̱ a̱ka̱nla̱.

15 I remee tsu musa̱n mu una,

musa̱n n wawa'a n na n tsu lungusa̱ a̱ɗuma̱ a̱ ina̱bi,

a̱ɗuma̱ a ina̱bi a̱ tsu a na o ɓosoi yipa̱lu.

16 Macigata ma̱ va̱ za va̱ ɗa,

a̱mu waru za va̱ yi ɗa,

u ta aguɓa a̱tsuma̱ a̱ yipa̱lu.

17 Kafu ekan o usana o uta̱,

reve irumbu i puwa̱a̱n,

macigata ma̱ va̱ vu vadala,

vu suma tsa̱ mere'on,

tsa̱ meshon zuva vu nsasan.