1 Macigata ma̱ va̱ vu tu ulobonu!

Esu a̱ wu a̱ ta̱ tsa za muɗa,

e te ikanasa a̱tsuma̱ a apalutsu.

A̱nji a̱ wu a̱ ta̱ cine vu revei oɓolo e mgbele

a̱ zurusa̱ a̱ cipa̱ a masasan ma Giliyadu.

2 Anga a̱ wu a̱ tu uri cine vu revei oɓolo e ikyon

a na a̱ sumba̱i gogo.

A̱ tu ugeru suru, za na̱ mawun ma̱ a̱na̱wun ma̱ yi,

ko za ta̱ a̱tsuma̱ e le, u lamba za va̱ yi shi.

3 Una̱ wa̱ wu u ta̱ maluwa ma̱a̱ a̱ka̱nla̱

she damma vu yuwaan le ta̱ yisukumishi,

una̱ wa̱ wu ili i maluwa i ɗa.

Agbaguzu a̱ wu a̱ ta̱ cece

she damma ucina̱ wu umatsun

u muwun mu uɗanga m peme.

4 Yinlu yu uga'an ya̱ wu u ta̱ maluwa ma̱ a̱ka̱nla̱,

tsu Usaa wu Uga'an wa̱ Da̱wuda.

Iliyinlu yu ulobonu ya̱ wu

a̱ tu ugeru a̱ yinlu ya̱ wu,

tsa̱ a̱ra̱ga̱ ukpakukupa ugeru ugeru,

tsu utan u nan yali yu uvon.

5 Maani ma̱ wu ma̱ ta̱ tsa̱ nre'on n re,

tsa̱ mpishe n mere'on

nna n ri a alyuna a̱tsuma̱ a̱ yipa̱lu.

6 Kafu ekan o usana o uta̱,

reve irumbu i puwa̱a̱n,

n ta̱ 'ya̱wa̱ a masasan ma mur

na agaɗi a furenkisen.

7 Vu tu ulobonu macigata ma̱ va̱,

ko ili i ka̱la̱ma̱ wu shi.

8 Ta̱wa̱ oɓolo na̱ a̱mu diga a Lebanon, kasa'avu va̱,

ta̱wa̱ oɓolo na̱ a̱mu diga a Lebanon.

Cipa̱ diga e ncilecile ma aatali ma Amana,

diga zuva va Seni na̱ Hamon,

diga a̱ a̱ba̱nu e ikamu,

na̱ nsasan mu ta̱su.

9 Vu reme ta̱ okolo a̱ va̱ vawun va̱, kasa'avu va̱,

na̱ a̱ka̱nla̱ e esu a̱ wu uta̱,

vu reme ta̱ okolo a̱ va̱.

Ni iliyinlu i ta̱ ya̱ wu,

vu reme ta̱ okolo a̱ va̱.

10 Icigi ya̱ wu ili yu uyo'o i ɗa,

vawun va̱, kasa'avu va̱!

Icigi ya̱ wu i la'a ta̱ masayan uyo'o.

Ma̱guru ma aturare ma̱ wu,

ma la'a ta̱ cu'un ma̱guru ma aturare biti.

11 A̱limu o una̱ wa̱ wu u ta̱ tse e ishiki, kasa'avu va̱,

uba̱ta̱ u va̱ elentsu a̱ wu maani ma ɗa ni ishiki.

A̱tugu a̱ wu a̱ ta̱ ma̱guru

tsa aturare a na a̱ ri pe atali a Lebanon.

12 Vawun va̱, kasa'avu va̱,

vu ta̱ tsa̱ a̱a̱rumbu a na a tawai adama a̱ va̱,

a̱a̱rumbu a na a̱ ka̱nda̱ruwa̱i nu ukari,

lyusu mini na a putsayi za suru.

13 E memere ma agutsu a̱ wu

uɗuma̱ u tu lo tsa Adini,

uɗuma̱ u muwun n sa'ani

zana ri nu uɗanga muwun m peme,

za vi itana i ma̱guru tsa nad na̱ lali.

14 Nad na̱ safron na̱ kalamu

na̱ sinamon na̱ cu'un vu ɗanga na ri ma̱guru suru,

na̱ mur na̱ alos, na̱ cu'un va aturare na la'ai ma̱guru.

15 A̱vu ɗa lyusu mini a̱tsuma̱ a̱a̱rumbu,

oko'o a̱ mini ma na ma casu wuma,

mini ma na mee yeneshe diga a Lebanon.

16 Jiwan, upepu wu ugana,

vu ta̱wa̱ upepu wu uyagi!

Vi ivula̱ a̱a̱rumbu a̱ va̱

ununa ma̱guru ma̱ yi ma̱a̱ kpa̱to uba̱ta̱ suru.

Lyawa macigata ma̱ va̱ ma̱ ta̱wa̱ a̱ a̱a̱rumbu a̱ yi,

u lyuwa umatsun wa̱ yi u na u la'ai uyo'o.