1 Apa adanshi a̱ A̱sulazuva a na a̱ ta̱wa̱i uba̱ta̱ wa̱ Irimiya adama o ulambu u mini.

2 <<Yahuda ta̱ nden n wiruta̱,

ilyuci ya̱ yi i ta̱ ma̱dukwa̱ ma̱ mesun.

A̱ ta̱ mesun adama e iɗa'a,

mesun ma̱ ta̱ 'yosun

diga a̱tsuma̱ a̱ Urishelima.

3 Azagbain a̱ lyungu ta̱

agbashi e le mekene

ma̱ mini o oko'o,

agba a̱ tsura̱ mini shi.

Reve a̱ ka̱mba̱ na̱ nden n le la̱nga̱,

na̱ wono na̱ wupalu wu urewesu,

na aci e le wupalu.

4 Iɗa'a yi ɓatsa ta̱

adama o ulambu wi iro'i,

acimbi o sowo ta̱ wono,

hali a pala urewesu u le.

5 Hali fo na mere'on mo una,

ma suma u lyawa mawun

ma na u matsain usa'avu

adama o ulambu wa anlya.

6 Nloli mu una

n ta̱ mishin zuva va agaɗi,

o ronuso wivuwun zuva zuva

tsa̱ musa̱n mu una,

esu e le e inda ure shi

adama o ulambu wu uba̱ta̱ wa alyuna.>>

7 <<Ko na wo o'woi unusu u tsu

u ta adanshi a aci a̱ tsu,

a̱vu A̱sulazuva, vu yuwan

ili i ro adama a ala a̱ wu.

Adama a na uvadalusa

wu ucina̱ u tsu

u yuwan ta̱ a̱bunda̱,

na amayun,

tsu yuwaan wu ta̱ unusu.

8 O'o, a̱vu uzuwu

wo okolo a Isra'ila,

a̱vu za vi iwawi ya̱ yi

a mantsa ma atakaci!

Adama nye vo o'woi

tso mocin e iɗa'a?

Cine vu rotsoi za vu mmalu na asai

nu usana a̱vu u ka̱ra̱?

9 Nye i zuwai va yuwusan va damma

vuma na ri urupulu,

tsa yali yu uvon na ri nu ucira

u na waa wawa aciya̱yi shi?

A̱vu A̱sulazuva,

vu ta̱ a̱tsuma̱ a̱ tsu,

waru a̱ ta̱ ɗesu tsu na ala a̱ wu,

she vu vari tsu wan!>>

10 Apa ili i na A̱sulazuva a dammai

adama a ama nda,

<<Na amayun a ciga ta̱

a̱ da̱na̱ e igaru,

a tsu putsaa ana e le

ni igaru shi.

Adama o ndolo, a̱mu A̱sulazuva,

moo soɗuwo le ma̱tsa̱n shi,

gogo n ta cuwan ni iwuya i le,

waru n ca le oforo

adama a̱ nusu le.>>

11 Reve A̱sulazuva a damma mu, <<She vu yuwan avasa adama addama ama a nda wan. 12 Ko na̱ shi a yuwan akuli, ma uwwa mesun ma̱ le shi. Ko na wo o'woi a ta casu kucci vu ukula̱tosu na̱ kucci vi ishina, ma̱a̱ ushi le shi. O una̱ u ndolo, n to kototo le na̱ matsun me pe'eni na ambulu na̱ mɓa̱la̱.>>

13 Reve a̱mu Irimiya, n usu n damma, <<Ayya, A̱sulazuva Zagbain! Ama̱sula̱ a dansaa le ta̱, <Yee ene matsun me pe'eni mo uvon ko ambulu shi. A̱sulazuva a ta ca ɗu nden ma asuvu nna moo koto shi uba̱ta̱ u nda'a.> >>

14 Reve A̱sulazuva a damma mu, <<Ama̱sula̱ a nda, adanshi e ikaka ye epen i ɗa aa yuwusan na ala a̱ va̱. A̱mu n lyungu le shi, waru n zuwa le shi, ko n yuwan adanshi ne le shi. A ta yuwusaan ɗu adanshi e ikaka ye epen ya alavu alavu na̱ yindi i vanvama, a ta yuwusan tsuboci, waru a dansa majiyan mo okolo e le goon. 15 Adama o ndolo, apa ili i na a̱mu A̱sulazuva ma dansa a aci ama̱sula̱ a na aa yuwusan adanshi e ikaka ye epen na ala a̱ va̱. N lyungu le shi, amma a ta dansa, <Babu matsun me pe'eni ko ambulu a na a̱ ju'wa̱n iɗa i nda.> Ele ama̱sula̱ a nda, matsun me pe'eni na ambulu a ɗa o kototo le. 16 Ama a na ama̱sula̱ o ndolo aa yuwusaan adanshi e ikaka ye epe'en, o to oco a̱kwa̱kwa̱ a̱ lipu le e re va̱ Urishelima adama a ambulu na̱ matsun me pe'eni. Waru babu za na a̱ ciɗo le, ko a̱ ciɗo a̱ma̱ci e le, ko muwun mo olobo n le ne esheli e le. Na amayun n ta̱ ka̱mbuwa̱ iwuya i le a aci e le.

17 <<A̱vu Irimiya,

vu yuwaan le adanshi a nda,

<Lyawa esu a̱ va̱ a̱ da̱na̱

oo ocosu aɓara,

ayin nu urana she a̱ bula̱ wan.

Adama a na a̱ ga̱la̱ ta̱ ama a̱ va̱,

macigata ma̱ va̱ Usheli u va̱,

a kada yi ta̱ lon,

a uwwato yi ta̱ usa̱n lon.

18 Nna̱ n ka̱ra̱ a uwa

a̱tsuma̱ a̱ mulyuci'i,

n tse ene ta̱ aza a na

o unai na̱ matsun me pe'eni!

Nna̱ n ka̱ra̱ a uwa a̱tsuma̱ a̱ lyuci gbain,

n tse ene ta̱ aza a na

a̱ ri o mpolo na ambulu.

Na ama̱sula̱ na̱ nan ganu suru,

a̱ ka̱ra̱ ta̱ a̱ tyo e iɗa

i na e revei shi.> >>

19 <<A̱sulazuva, vu 'yuwan ta̱

Yahuda suru suru ɗa?

Vu ta̱ e inda idaba

ya̱ Sihiyona ɗa?

Nye i zuwai vu lapa ntsu?

Adama she tsu tsura̱ lafiya wan?

Tsu zuwa ta̱ okolo

a̱ nden ma asuvu,

agba babu isa'ani i na i ta̱wa̱i,

tsu zuwa ta̱ okolo

a mantsa ma na tsa̱a̱ tsura̱ lafiya,

agba she tsuda'un goon.

20 A̱sulazuva tsu reve ta̱

iwuya i na tsu yuwain,

na̱ nusu na nkaya n tsu n yuwain.

Ee, na amayun suru ntsu,

tsu yuwan wu ta̱ unusu.

21 A̱sulazuva, adama a ala a̱ wu

tsu ta patishi wu,

she vu 'yuwan tsu wan,

she vu rono a̱ba̱jini ootogu

a tsugbain tsa̱ wu e iɗa wan.

Vu cuwan na̱ nzuwulai

ma̱ wu na̱ a̱tsu,

she vu kuɗa yi wan.

22 A̱ ta̱ tsura̱ a̱tsuma̱ a̱ musula̱

n vanvama mu nɗa

nna n tsu lyungu ni iro'i?

Zuva gba na aciya̱yi

u tsu ta̱wa̱a̱ ta̱ na̱ yiji'in?

Ko ke'en, she a̱vu a̱ nde'en,

A̱sulazuva A̱sula̱ a̱ tsu.

Adama o ndolo,

uzuwu wo okolo a̱ tsu

a̱ ta̱ ya̱'a̱ wu,

adama a na a̱vu ɗa,

va yuwusan ili i nda suru.>>