1 A mantsa ma na Nebukanaza remei Yekoniya* ulobo wa̱ Jehoyakim mogono ma Yahuda, oɓolo na azagbain a̱ yi, oɓolo na aza a na a yuwusan ulinga wu ukere biti, oɓolo na̱ a̱za̱ o ulinga u yironishi a Yahuda diga Urishelima a̱ tyo Babila tsugbashi, A̱sulazuva o roco mu ta̱ okondo e re a̱ biri, aza a na a zuwai elime a̱ A̱a̱'isa̱mapaɗa a̱ A̱sulazuva.✝ 2 A̱tsuma̱ o okondo a̱ta̱ biri sa'ani da̱na̱ ta̱ pe, tsu umatsun wu ufaru wu biri. Wa̱ ire waru aza a na a̱ ri babu ulobonu, a̱ la̱nga̱ ta̱ lon hali na a gura lyuwa le shi.

3 Ɗaɗa A̱sulazuva a damma numu, <<Nye vee enei Irimiya?>>

Reve n usu, <<Muwun mu biri. Aza a na a̱ ri ulobonu'u a̱ tu ulobonu lon, amma aza a na a̱ ri ulobonu shi, a̱ la̱nga̱ ta̱ lon hali na a gura lyuwa le shi.>>

4 Reve adanshi a̱ A̱sulazuva a̱ ta̱wa̱ ya̱'a̱ va̱ ana, 5 Apa ili i na A̱sulazuva A̱sula̱ a Isra'ila a dammai, <<Ununa biri sa'ani nda ri, ne ɗa me e idana a ama a Yahuda, aza a na a̱ pura̱i, na mu uta̱yi diga uba̱ta̱ u nda a̱ tyo tsugbashi e iɗa ya Babila. 6 Esu a̱ va̱ a̱ ta̱ e idana le, adama e isa'ani i le, reve n ka̱mba̱to le a̱tsuma̱ e iɗa i nda. N ta̱ 'ya̱sa̱n le, agba moo kototo le shi, n ta̱ gba shuwa̱ le, waru ma̱a̱ mula̱ le shi. 7 N ta ca le okolo a na ee reve mu, ne ee reve ana a̱mu ɗa A̱sulazuva. O to o'wo a ama a̱ va̱, reve fo mo o'wo A̱sula̱ e le, adama a na a̱ ta̱ ka̱mba̱ uba̱ta̱ u va̱ no okolo a̱ta̱.>>

8 <<Amma ununa biri na la̱nga̱i nda ri hali na a gura lyuwa le shi, ne ɗa maa yuwan na̱ Zedekiya mogono ma Yahuda, na azagbain a̱yi na akapi ama a na a la'ai diga Urishelima, ko na̱ shi a̱ ri e iɗa i nda, ko na̱ shi gba a̱ ri nden e iɗa ya Masar. Ne ɗa A̱sulazuva a dammai. 9 N to o'woto le ili i wovon, ni ili yi idaba, e ekere o tsugono tsu uvaɗi suru. O to o'wo ili yi izo'oshi, ni ili ya avandaru, ni ili i na a yuwayin una̱, a̱ tyo ba̱ta̱ na mee bete'we le suru. 10 N ta̱ lyunguwa̱ le na̱ matsun me pe'eni na ambulu na̱ mɓa̱la̱, hali she no o kototo le kpa̱ra̱ diga a̱tsuma̱ e iɗa i na n ca nle na̱ nkaya nle.>>