1 Apa adanshi a na A̱sulazuva a yuwayin Irimiya, ana, 2 <<Vu polo atsuvu e idanshi ya akucunu a nda, reve vu damma ama a Yahuda na aza a na a̱ ri na̱ nden a̱tsuma̱ a̱ Urishelima. 3 Vu damma le, apa ili i na A̱sulazuva, A̱sula̱ a Isra'ila a dammai, una̱ u ta̱ reme za na kuɗa̱i a yuwan tsutoni ni idanshi ya akucunu a nda. 4 Nzuwulai nna n yuwain na̱ nkaya nɗu a mantsa ma na mu uta̱a̱ nle diga e iɗa ya Masar, diga a̱tsuma̱ o usuɗuwu wu usa̱n u tsugbashi o ndolo tsa akina o uruma. A̱vu vu damma le, <A yuwan tsutoni na adanshi a̱ va̱, a yuwan suru ili na n damma n le. Na̱ tsundolo tsa ɗa o o'wo ama a̱ va̱, a̱vu mo o'wo A̱sula̱ a̱ ɗu.> >> 5 Ɗaɗa moo shiton akucunu a na n yuwayin nkaya n ɗu, na maa ca le iɗa i na yee yeneshe maani ni ishiki, iɗa i na i tarai ana'an.

Reve n usu, <<Lyawa wo o'wo ne A̱sulazuva.>>✝

6 A̱vu A̱sulazuva a damma mu, <<Vu yuwan adanshi a nda suru a̱tsuma̱ e ilyuci ya Yahuda na̱ a̱tsuma̱ e re va̱ Urishelima. Vu damma le, o polo atsuvu e idanshi ya akucunu o ndolo a̱vu a̱ kuru le, 7 adama a na a mantsa ma na mu uta̱yi nkaya n ɗu diga e iɗa ya Masar hali a̱ tyo ana'an, n rono le ta̱ atsuvu lon adansa, i yuwaan mu tsutoni. 8 Na̱ ne suru a uwwa ko o poloo mu atsuvu shi, o una̱ u ndolo reve a̱ kuru aciyogbamu o okolo e iwuya i le. Ɗaɗa ma̱a̱ ta̱wa̱a̱ le nu una̱ u na u ri a aci a nzuwulai n ndolo suru, na n damma nle a̱ kuru, agba a̱ kuru shi.>>

9 Reve A̱sulazuva a damma mu, <<N gura ta̱ reve a na a̱ tsura̱i uɓolu wu una̱ a̱tsuma̱ e ilyuci i na i ri a̱tsuma̱ a Yahuda na aza a na a̱ ri nden a̱tsuma̱ a̱ Urishelima. 10 A vadala ta̱ a̱ ka̱mba̱ ba̱ta̱ a̱ nusu vu nkaya nle, aza a na a 'yuwain a uwwa adanshi a̱ va̱. A̱ kuru ta̱ musula̱ n ro aa yuwusaan le a̱ga̱nda̱. U'wa wa Isra'ila oɓolo nu u'wa wa Yahuda a kuɗa ta̱ akucunu a na n yuwain na̱ nkaya nle. 11 Adama o ndolo apa ili i na A̱sulazuva a dammai, <N ta̱ ta̱wa̱a̱ le na̱ a̱tsuma̱lima̱ a na a la'a shi. Ko na̱ e showen numu moo poloo le atsuvu shi.> >> 12 <<Ɗaɗa ilyuci i na i ri a̱tsuma̱ a Yahuda na ama a̱ Urishelima a̱a̱ 'ya̱wa̱ e showen musula̱ n na a̱a̱ kula̱tosa̱a̱ a̱tsuka̱, agba aa wawa le shi ko ke'en a mantsa ma na addama'a a̱a̱ ta̱wa̱. 13 A̱vu Yahuda, vu ta̱ na̱ musula̱ a̱bunda̱ cine vu revei ilyuci ya̱ wu, waru musa'a n na i varai adama i kula̱tosa̱a̱ ma̱sula̱ mo o ulambu u wono u ndolo Ba'al a̱tsuka̱, a rawa ta̱ a̱bunda̱ e re va̱ Urishelima.>>

14 Reve A̱sulazuva a damma Irimiya, <<She vu yuwaan ama a nda avasa wan, ko vu yuwan ipati i ro adama e le wan, adama a na moo poloo le atsuvu shi a mantsa ma na e ɗeyi a̱ tyo ya̱'a̱ va̱, adama a̱ a̱tsuma̱lima̱ e le.>>

15 <<Zane ca nuwu ucira,

a̱vu macigata ma̱ va̱ Yahuda,

na vu ta̱wa̱i a̱tsuma̱ a̱ A̱a̱'isamapaɗa a̱ va̱,

na vaa yuwusan ifoɓi iwuya

oɓolo na ama a̱ a̱bunda̱?

Vu ta yuwusan ma̱za̱nga̱ a mantsa

ma na vaa yuwusan iwuya.

A̱ yene ya̱ wu,

nama na vu cayi kucci

u ta gura tawa oforo a̱ wu ɗa?>>

16 <<A̱sulazuva e ɗe wu ta̱,

uɗanga u zetun u na u ri nu ululu

wu ulobonu wa̱ a̱ka̱nla̱,

u na u ri na̱ muwun n sa'ani.

Amma na̱ ma̱gugwa̱

ma̱ wunla̱ ma gbain ma ɗa

wa zuwa yi akina,

a̱vu ete'en a̱ yi a kuɗa.>>

17 <<A̱mu A̱sulazuva A̱sula̱ o oɓolo a̱ a̱soja a zuva za na shuwa̱ nɗu, m paɗa ta̱ a̱sa̱la̱ a na meleshe ma̱ cipa̱a̱ ɗu, adama e iwuya i na i yuwain, a̱ɗu u'wa wa Isra'ila na̱ Yahuda. Adama a na i zuwa mu ta̱ n yuwan upan, adama a na i kula̱towa̱a̱ ta̱ Ba'al aturare a̱ ma̱guru.>>

18 <<A̱sulazuva a̱ revetyo mu ta̱ ifoɓi i le, waru n reve ta̱, adama a na a mantsa ma nda u roco mu ta̱ ili i na a yuwusan. 19 Moo o'wo ta̱ tsa̱ mokyokyon ma na ma̱ ri na̱ nla̱ngi shi, za na a tarai a̱ 'ya̱wa̱ uba̱ta̱ u na a paɗa, n shi reve, ashe aci a̱ va̱ a ɗa oo ɓoloso una̱ adansa,

<<Lyawa tsu kototoi uɗanga'a

na̱ muwun ma̱ yi suru,

lyawa tsu tawa niyi

diga o uvaɗi wa aza a wuma,

hali na a̱ da̱shi cuwan

na aala a̱yi shi.>>

20 <<Amma a̱vu, A̱sulazuva A̱sula̱

o oɓolo a̱ a̱soja a zuva,

a̱vu ɗa za vu uge'etosu wa amayun,

a̱vu ɗa za na tsu petelyuwe

okolo na̱ majiyan ma vuma.

Lyawa me ene atsupu a̱ wu

adama a̱ va̱ aci e le,

adama a na ya̱ a̱ wu ɗa

n ta̱wa̱yi na̱ mesun ma̱ va̱.>>

21 Adama o ndolo apa ili i na A̱sulazuva A̱sula̱ o oɓolo a̱ a̱soja a zuva a dammai, adama o uɓolu wu una̱ u na ama a Anatot aa yuwusan, aza a na a zama o una mu. A ta dansa, <<She vu yuwan adanshi e ikaka ya̱ A̱sula̱ na aala A̱sulazuva wan. Nna̱ vu yuwan, ne ekere a̱ tsu ɗa tsoo una wu.>> 22 Adama o ndolo apa ili i na A̱sulazuva A̱sula̱ o oɓolo a̱ a̱soja a zuva a dammai, <<N ta ca le oforo. Olobo le a̱ ta̱ kuwa̱ o ure u matsun me pe'eni, muwun molobo na̱ esheli le ambulu a ɗa o una le. 23 Ko vuma ta̱ a lyawa shi. Adama a na n ta̱ ta̱wa̱a̱ a ama a Anatot na̱ meleshe aa'wan a na a ca le oforo.>>