1 Adanshi A̱sulazuva a̱ ta̱wa̱ ta̱ ya̱ Irimiya, u damma, 2 <<Apa ili i na A̱sulazuva a̱ A̱sula̱ a Isra'ila a dammai, <Vu ɗana adanshi a na suru n damma nuwu a aatagada. 3 Adama a na mantsa ma̱a̱ ta̱ lo a̱ ta̱wa̱ a na ma̱a̱ ka̱mbuwa̱ ama a̱ va̱ aza a Isra'ila na̱ Yahuda diga uba̱ta̱ u tsugbashi. Reve fo n ka̱mba̱to le e iɗa i na n cayi nkaya nle wa agadu.> Ne ɗa A̱sulazuva a dammai.>>

4 Apa adanshi a na A̱sulazuva a dammai, adama a Isra'ila na Yahuda.

5 Apa ili i na A̱sulazuva a dammai,

<<A uwwa ta̱ yisali i wuda'un na̱ za wovon,

waru babu nden ma asuvu.

6 Gogo yuwain yeci yu uwwa,

vali ta gura matsan ɗa?

To, nye i zuwai mee eneshe vali suru

ee mereme me ikyun,

she damma ka ve teri?

Nye i zuwai urewesu wu za suru

ri ulukutu adama o wovon?

7 A̱tsuma̱lima̱ a ta cina ɗu!

Adama a na urana u nda

a̱ba̱jini o urana a ɗa,

urana wu lo tsa̱ a̱ yi shi,

mantsa ma ɗa ma̱ a̱tsuma̱lima̱

mo ugundo wa Yakubu,

amma na̱ ne suru a ta wawa yi,

diga a̱tsuma̱ a̱tsuma̱lima̱ a̱ yi.>>

8 A̱sulazuva o oɓolo a̱ a̱soja

a zuva a damma ta̱,

<<O urana u ndolo, n ta kuɗa

a̱a̱gba̱la̱ diga a̱ yinlu i le,

a̱vu mu taɓa ili i yinlu i le,

waru omocin a buwa a̱ ka̱mba̱to le

agbashi waru shi.

9 Amma a ta yuwaan A̱sulazuva

A̱sula̱ e le a̱ga̱nda̱,

nu ugundo wa̱ Da̱wuda,

mogono ma na ma̱a̱ 'ya̱sa̱n adama e le.>>

10 <<Gogo, a̱vu Yakubu aagbashi a̱ va̱,

she vu uwwa wovon wan,

a̱vu Isra'ila

she vu da'wan wan!

Adama a na a̱ yi ɗa nda n ta wawa wu

diga e iɗa ya alanga,

n ta̱ fo a wawa muwun ma̱ wu

diga e iɗa i tsugbashi.

Waru ugundo wa̱ wu u ta̱ da̱shi

tsurisa̱ nden ma asuvu,

na̱ nden n lafiya,

agba babu za na buwai

na a dada'waton wu.

Ne ɗa A̱sulazuva a dammai.

11 A̱sulazuva a damma ta̱,

n to oɓolo na̱ a̱vu,

waru n ta wawa wu.

Ko na wo o'woi n ta̱ kototo nɗa suru suru,

uba̱ta̱ u na m bete'we nɗu,

moo kototo ɗu suru suru shi.

N ta̱ ge'eto ɗu nu uge'etosu wa amayun,

na amayun maa lyawa ɗu i ka̱ra̱ fa̱a̱n,

babu na n ca ɗu oforo shi.>>

12 <<Apa ili i na A̱sulazuva a dammai,

antsu a̱ wu aza a na e ina ɗa shi,

waru wamatowun wa̱ wu za vu usa̱n ɗa lon.

13 Babu za na aa yuwan ipati

adama o usa̱n wa̱ wu,

agba babu a̱guma̱ adama antsu a̱ wu,

waru va̱a̱ tsura̱ opocino shi.

14 Ncigata ma̱ wu suru e icina ta̱ na̱ a̱vu,

agba ili i ɓa̱la̱ le na̱ a̱vu shi.

N ga̱la̱ wu ta̱ ununa

ma'yuwatan ma tsu yuwan,

reve waru n ca wu oforo

ununa za vi iwuya tsu yuwan,

adama a na unusu wa̱ wu u ta̱ a̱bunda̱ lon,

waru nusu va̱ wu yuwan ta̱ a̱bunda̱ lon.

15 Adama nye vu ri a̱ mesun

adama o usa̱n wa̱ wu,

usa̱n wa̱ wu u na u ri na̱ a̱guma̱ shi?

Adama a̱ba̱jini o unusu wa̱ wu u ɗa

na̱ nusu va̱a̱ a̱bunda̱ va̱ wu ɗa

n yuwaan nuwu ili i nda.>>

16 <<Amma aza a na o kototo nuwu suru,

e le fo o to kototo le.

Waru n'yuwatan ma̱ wu suru

n ta̱ 'ya̱wa̱ tsugbashi.

Aza a na a̱ pura̱ nuwu itana biti,

e le fo a̱ ta̱ pura̱ le i ɗa.

Aza a na a̱ lungusa̱ nuwu biti,

a̱mu fo n ta̱ lungusa̱ le.

17 Amma n ta̱ ka̱mbuwisa̱a̱ wu na̱ lafiya va̱ wu,

reve n yuwaan antsu a̱ wu opocino,

ne ɗa A̱sulazuva a dammai.

<Ko na wo o'woi a ta dansa wu

vu ri nu urana shi,

a̱vu Sihiyona na za damai na̱ yi shi.> >>

18 <<Apa ili i na A̱sulazuva a dammai,

n ta̱ ka̱mbuwa̱a̱ ogodo a Yakubu na aba'un a̱ yi,

reve fo mee ene iliyali

yu uba̱ta̱ u na u ri nden.

A̱ ta̱ da̱shi suwisa lyuci'i uba̱ta̱ u na u da̱na̱i,

reve ukobu u mogono wo o'wo ushuwu

uba̱ta̱ u na u da̱na̱i nu ufaru.

19 Diga a̱tsuma̱ e le, a ta uwwa ishipa yu ugodyusho,

oɓolo nu uɗyo u ma̱za̱nga̱.

Waru n ta̱ da̱shi le a̱bunda̱,

agba a̱ da̱na̱ uka̱la̱mu shi,

n ta ca le tsugbain,

agba o goro le shi.

20 Muwun nle n ta yuwan a̱bunda̱ tsu ufaru,

waru ama le o to o'wo ushuwu elime a̱ va̱.

Reve fo n ca za na suru

ɓongi n le oforo.

21 Zagbain le to o'wo diga a̱tsuma̱ e le,

za na a yuwan tsugono tsa̱ le waru,

diga a̱tsuma̱ e le.

N ta̱ ta̱wa̱to yi zuzu

agba u ta rawa zuzu na̱ mu,

adama a na za ne ɗa aa yuwan okolo o ugbamu

hali u ta̱wa̱ zuzu na̱ mu?

Ne ɗa A̱sulazuva a dammai.

22 I to o'wo ama a̱ va̱,

reve a̱mu fo mo o'wo A̱sula̱ a̱ ɗu.>>

23 <<Ka̱lyuwa̱, a̱yi ɗa nda wunla̱ wu upan

wu usuɗuwu wa̱ A̱sulazuva o ɓosoi o uta̱,

tsu upepu wu lipa̱ wu ukototosu,

a̱ cipusa̱ a aci a̱za̱ e iwuya.

24 Upan wa̱ a̱ A̱sulazuva wa̱a̱ ka̱mba̱ a̱ca̱pa̱ shi,

she nu u shiton ifoɓi

yi ili i na i ri okolo a̱ yi.

A rana na a̱ ta̱wa̱ ɗa,

yee reve ili i nda ulobonu.>>