1 Ele lo a̱tsuma̱ a'wan o ndolo, o woto wa tawun wa a'wan a̱ na̱shi, wu ufaru u tsugono tsa̱ mogono Zedekiya va Yahuda, reve vumava̱sula̱ Hananiya ulobo wa Azur vuma va̱ Gibiyon yuwan adanshi na̱ mu o u'wa wa̱ A̱sulazuva. Waru u yuwan ta̱ adanshi'i elime a nan ganu na ama'a suru u damma, 2 <<Apa ili i na A̱sulazuva oɓolo a̱ a̱soja a zuva, A̱sula̱ a Isra'ila a dammai, <N ta kuɗa a̱a̱gba̱la̱ a̱ yinlu a na mogono ma Babila ma̱a̱ nla̱a̱ nɗu. 3 A̱tsuma̱ a'wan e re, n ta̱ ka̱mba̱to ni itana yu u'wa wa̱ A̱sulazuva uba̱ta̱ u nda, na amayun itana i na mogono Nebukanaza va Babila pura̱i diga o u'wa wa̱ A̱sulazuva. 4 Waru n ta̱ ka̱mba̱to mogono Yekoniya ulobo u mogono Jehoyakim va Yahuda uba̱ta̱ u nda. Ne ɗa fo ma̱a̱ ka̱mba̱to aza a na a̱ pura̱i suru diga a Yahuda a̱ tyo Babila tsugbashi, adama a na n ta kuɗa a̱a̱gba̱la̱ a̱ yinlu a na Babila zuwaa nle. Ne ɗa A̱sulazuva a dammai.> >>

5 Ɗaɗa vumava̱sula̱ Irimiya usuyi vumava̱sula̱ Hananiya elime a nan ganu, na ama a na a̱ ri lo mishin o u'wa wa̱ A̱sulazuva suru, 6 u damma, <<Amin! Lyawa A̱sulazuva a zuwa wo o'wo ne! Lyawa A̱sulazuva o shiton adanshi e ikaka i na vu yuwain, na̱ a̱ ka̱mba̱to itana yu u'wa wa̱ A̱sulazuva, oɓolo na ama a na a̱ pura̱i suru a̱ tyo e iɗa i tsugbashi, diga a Babila a̱ tyo uba̱ta̱ u nda. 7 Na̱ ne suru, she vu polo atsuvu e idanshi i na maa damma atsuvu a̱ wu, oɓolo na atsuvu ama a nda suru. 8 Diga ɗe o ufaru ama̱sula̱ a na a̱ da̱na̱i elime a̱tsu, a̱mu na̱ a̱vu, a yuwan ta̱ adanshi e ikaka yu uvon, oɓolo na addama na̱ mɓa̱la̱ e ekere a nɗa ma̱a̱ a̱bunda̱ na̱ a̱za̱ o tsugono tsa a gbain. 9 Amma vumava̱sula̱ na yuwain adanshi e ikaka ya asuvu nden, a̱yi ɗa a tsu tara o una̱ wu za na A̱sulazuva a̱ lyunguyi, hali nni ili i na fo u dammai u shiwan na amayun.>>

10 Ɗaɗa vumava̱sula̱ Hananiya tawai a̱a̱gba̱la̱ a̱ yinlu a na a̱ da̱na̱i a̱ yinlu ya̱ Irimiya vumava̱sula̱ reve u kuɗa yi, 11 elime ama'a suru u damma, <<Apa ili i na A̱sulazuva a dammai, <Ne ɗa maa kuɗa a̱a̱gba̱la̱ a̱ yinlu o mogono Nebukanaza va Babila diga a̱ yinlu yi nɗa a̱tsuma̱ a a'wan e re.> >> Diga lo ɗaɗa Irimiya vumava̱sula̱ yuwain mmalu ma̱ yi.

12 Ana a tarai mantsa wa'a, a na vumava̱sula̱ Hananiya kuɗai a̱a̱gba̱la̱ a̱ yinlu a na a̱ da̱na̱i a̱ yinlu ya̱ Irimiya vumava̱sula̱, ɗaɗa A̱sulazuva a yuwain adanshi na̱ Irimiya ana, 13 <<Ka̱ra̱ vu damma Hananiya ana, <Apa ili i na A̱sulazuva a dammai, mee ene ta̱ vu kuɗai a̱a̱gba̱la̱ a̱ yinlu a aɗanga nda, o una̱ u ndolo n ta yuwan a̱a̱gba̱la̱ e irumu.> >> 14 Adama a na apa ili i na A̱sulazuva oɓolo a̱ a̱soja a zuva, A̱sula̱ a Isra'ila a dammai, <<N ta zuwa a̱a̱gba̱la̱ a̱ rumu a̱ yinlu yi nɗa nda suru, adama a na aa yuwaan mogono Nebukanaza va Babila tsugbashi, ko a 'yuwan a ciga a yuwayin tsugbashi. N ta̱ fo a zuwa yi u yuwan tsugbain a aci e inama yu una.>>

15 Ɗaɗa vumava̱sula̱ Irimiya dammai Hananiya vumava̱sula̱ ana, <<Uwwa ne'e Hananiya, A̱sulazuva a̱ lyungu wu shi, na̱ ne suru vu kpara ta̱ a ama a nda a zuwa okolo e epen. 16 Adama o ndolo, apa ili i na A̱sulazuva a dammai, <N ta̱ o mpolo nna maa tawa wu diga o urewesu wu uvaɗi. Vu ta̱ gba a̱ kuwa̱ a̱tsuma̱ a a'wan a nda, adama a na vu yuwan ta̱ alajiya aciyogbamu e ekere a̱ A̱sulazuva.> >>

17 Ɗaɗa Hananiya vumava̱sula̱ kuwa̱i o woto wa̱ cindere a aa'wan o ndolo.