1 Adanshi A̱sulazuva a̱ ta̱wa̱ ta̱ ya̱'a̱ va̱, adansa, 2 <<'Ya̱wa̱ vu damma a atsuvu ama a̱ Urishelima, apa ili i na A̱sulazuva a dammai,

<< <N cuwan ta̱ na̱ a̱ɓula̱ a̱ wu

a na vu da̱na̱i a̱ tsusheli,

icigi ya̱ wu tsu ka sa'avu na cigai vali va̱ yi,

reve vu toni mu a̱ a̱tsumona,

e iɗa i na a tsu yuwan ca̱'a̱n shi.

3 Isra'ila da̱na̱ ta̱ na a akiza e ekere a̱ A̱sulazuva,

tsu umatsun wu ufaru wu ugasa,

aza a na a lyuwa niyi suru a̱ ta̱ reme le nu unusu,

waru meleshe ma ta cina le,

ne ɗa A̱sulazuva a dammai.> >>✝

4 Uwai adanshi a̱ A̱sulazuva,

<<a̱ɗu u'wa wa Yakubu,

a̱ɗu ugundo wa Isra'ila suru.>>

5 Apa nda ili i na A̱sulazuva a dammai,

<<Unusu u ne ɗa nkaya nɗu n tsura̱a̱ numu na̱ yi?

Hali na a yuwain alanga na̱ mu?

A̱ kuru ta̱ a̱ma̱li e pere,

reve gba o'wo ili ye pere?

6 Agba a yuwan yeci,

<A̱ te ɗa A̱sulazuva,

a na o uta̱a̱ ntsu diga e iɗa ya Masar,

a̱vu u rono tsu aaɗanga a̱tsumona,

a̱tsuma̱ e iɗa ya̱ a̱tsumona na̱ a̱ka̱ri,

e iɗa yu u'yewu ni irumbu pici,

iɗa i na za tsu kuru shi

waru uba̱ta̱ u na za tsu da̱nu shi?>

7 N ta̱wa̱to ɗu ta̱ e iɗa yu umili,

adama i lyuwa limatan va̱ yi,

ni ili i mawwa mo uyo'o u na waa casu biti.

Amma a̱vu i ta̱wa̱ i ka̱mbuwa̱ iɗa'a idaba,

a̱vu waru i ka̱mbuwa̱ agadu a̱ va̱ ili yi idaba.

8 Nan ganu a yuwan yeci,

<A̱ te ɗa A̱sulazuva shi?>

Aza a na o ritosu wila̱ e reve mu shi.

Azagbain a̱ 'ya̱sa̱n mu ta̱ a aci.

Ama̱sula̱ a yuwan ta̱ adanshi e ikaka na ala a Ba'al,

o tono a̱ma̱li a na a̱ ri na̱ a̱ɓula̱ shi.

9 <<Adama o ndolo a̱mu a̱ A̱sulazuva,

n ta̱wisa̱ ta̱ na adanshi aciya̱ɗu,>>

ne ɗa A̱sulazuva a dammai.

Waru n ta̱wa̱a̱ na adanshi a aci a̱ muwun

muwun ntsukaya nɗu.

10 <<Pasai mala a̱ tyo a̱ nge'en ma Kitim yee ene,

i lyungu a̱ tyo Keda i ka̱lyuwa̱ ulobonu,

yee ene ko a yuwan ta̱ ɗe ili i ro tsunda?

11 Iɗa i ro i ta̱ lo a na,

u vadalai musula̱ ma̱ yi?

ko na wo o'woi e le musula̱ n ɗa shi,

amma ama a̱ va̱ a kita'wan mu ta̱

a̱mu na ma̱a̱ 'ya̱susa̱n le,

na̱ a̱ma̱li a na a̱ ri na̱ a̱ɓula̱ shi.

12 A̱ɗu zuva, jinga̱ɗa̱i adama o ndolo,

waru yi da'wan adama a̱ba̱jini o wovon,

ne ɗa A̱sulazuva a dammai.

13 Ama a̱ va̱ a yuwan ta̱ nusu re,

a vari mu ta̱,

a̱mu lyusu mini ma na maa casu wuma.

Reve ee she'en aciya̱le a̱ka̱ri a na a̱ da̱nu mini,

aza a na a̱ ri wukaru,

na tsu gura da̱nu mini shi.

14 <<A̱vu Isra'ila, a̱vu aagbashi o usheli a ɗa?

A matsain ta̱ a tsugbashi?

To, nye i zuwai wo o'woi ili i ma̱pura̱

e ekere a n'yuwatan nɗu?

15 Ikamu i gugwa̱ ta̱

a̱ gugwa̱ ta̱ aci a̱ yi.

A̱ lungusa̱ ta̱ iɗa ya̱ yi,

a̱ lungusa̱ ta̱ ilyuci ya̱ yi,

babu za na ri pe na̱ nden.

16 Waru ama a Memfis na aza a Takifanke,

a puna ta̱ aaci a̱ wu.

17 Ashe a̱vu ɗa vu ronoo yi aciya̱wu ili i nda shi,

a na vu lyawai A̱sulazuva A̱sula̱ a̱ wu

a mantsa ma na u ronoo nuwu

aaɗanga a̱tsuma̱ o ure shi?

18 To, nye i zuwai va̱a̱ 'ya̱wa̱ Masar,

adama vu sowo mini mo uɗolu wa̱ Nilu?

Waru nye i zuwai va̱a̱ 'ya̱wa̱ Asuriya

adama vu sowo mini mo uɗolu wa̱ Yufireti?

19 Iwuya ya̱ wu i ta ca wu a̱tsuma̱lima̱,

uvadalu wu ucina̱ wa̱ wu

u ta ca wu oforo.

A̱vu vi idana waru vu reve,

cine za vi iwuya no okono a̱ ri e ekere a̱ wu

a mantsa ma na vu lyawai A̱sulazuva A̱sula̱ a̱ wu

waru va uwwusa wovon u va̱ shi,

ne ɗa A̱sulazuva o oɓolo a̱ a̱soja a zuva a dammai.>>

20 <<A̱vu usheli Isra'ila, ɗe nu ujimu,

vu kuɗa ta̱ a̱gba̱la̱ a na a tsugba nuwu,

a̱vu vu taɓa akani a̱ wu.

Na̱ ne suru, vu damma ta̱,

<Maa yuwaan wu a̱ga̱nda̱ shi.>

Amayun, ba̱ta̱ va̱ a̱ga̱nda̱,

na̱ za̱la̱ vu uɗanga kpa̱la̱m suru,

vu ka̱ɗa̱to ta̱ aciya̱wu a yuwusan tsushakala.

21 N shuwa̱ wu ta̱,

tsa ataci a̱ ina̱bi a na n ɗangulai,

icu'un i sa'ani za na aa zuwaa ucira.

Nye i zuwai vu vadalai a̱ tsushu'un na̱ mu,

vu la̱nga̱ ta̱,

vo o'wo ta̱ tse eten ataci

o una a babu a̱ɓula̱?

22 Ko na wo o'woi vu za̱'wa̱ ta̱ aciya̱wu na̱ a̱zuma̱'a̱

vu yuwan ta̱ ulinga na̱ a̱zuma̱'a̱ lon,

na̱ ne suru, hali n gogo

alana o unusu wa̱ wu

a̱ ta̱ lo elime a̱ va̱,

ne ɗa A̱sulazuva Zagbain dammai.

23 Cine tsu ɗa va damma, <N lungusa̱ aciya̱va̱ shi?

N kuru Ba'al shi?>

Ka̱lyuwa̱ cine vu yuwain a̱tsuma̱ o uka̱ri,

vee ene ili i na vu yuwain.

Vu te e ilaɗi tsa̱ a̱na̱wu a arakumi,

a̱ 'ya̱wusa̱ na̱ vu ka̱mbi,

24 tsa̱ a̱na̱wu o mololi mo una,

na cigai nden mo a̱tsumona,

a̱ 'yuwusan upepu

a mantsa ma na u cigai tsukoɓi,

zane ɗa a gura putsayi?

Ogono a na a zama yi,

wuntsa u foro aciya̱yi shi,

adama a na o woto

u tsukumbi tsa̱ yi a̱ ta̱ tsura̱i.

25 A̱vu Isra'ila, she vu suma

hali na atan a̱ wu a taɓa wan,

hali na vaa lyawa fo

a̱la̱kutsu a̱ wu e 'yewe,

adama e itoni i musula̱ n ro wan.

Amma a̱vu vu damma,

<U ri nu urana shi!

N ciga ta̱ omocin a̱ musula̱,

waru ele ɗa ma̱ kuru!> >>

26 <<Cine vivu tsu uwwa wono,

a mantsa ma na e reme niyi,

ne ɗa u'wa wa Isra'ila wa uwwa wono,

ele, na̱ ngono nle na̱ azagbain e le,

na̱ nan ganu e le, oɓolo na a ama̱sula̱ e le.

27 Agba i ta dansaa uɗanga, <A̱vu ɗa dada va̱,>

Aatali waru, <A̱vu ɗa vu matsan numu.>

A vadalaa mu ta̱ ucina̱ u le,

o una̱ wu urewesu u le.

Na̱ ne suru a mantsa ma na a̱ ri pe

a̱tsuma̱ a̱tsuma̱lima̱,

a tsu damma ta̱,

<Ta̱wa̱ vu wawa tsu!>

28 To, gogo a te ɗa musula̱

n na i yuwayin aciya̱ɗu?

Lyawa a̱ ta̱wa̱ nna a gura wawa ɗu,

a mantsa ma na i ri a̱tsuma̱lima̱!

Adama a na i ri na̱ musula̱ ma̱ a̱bunda̱,

ununa i ri ni ilyuci,

a̱ɗu a ama a Yahuda.>>

29 <<Nye i zuwai i ta̱wa̱i,

na adanshi a aci a̱ va̱?

Suru nɗu ɗa i yuwaan numu aciyogbamu,

ne ɗa A̱sulazuva a dammai.

30 Ulinga we pere u ɗa

a na n cayi ama a̱ ɗu oforo,

a tara ulapulu shi.

Matsun me pe'eni ma̱ ɗu

ma lyuwa ta̱ ama̱sula̱ a̱ ɗu,

tsa kamu na a uwwusa ambulu.

31 A̱ɗu ama a mantsa ma nda,

uwwai ili i na A̱sulazuva a dammai.

Mo o'wo ta̱ Isra'ila tsa̱ a̱tsumona ɗa?

Ko tsi iɗa ya̱ a̱bunda̱ e irumbu pici?

Nye i zuwai ama a̱ va̱ a dansa,

<Tsu ta̱ nu ucira u na tsa̱ da̱na̱ a agara,

tsa̱a̱ da̱shi 'ya̱wa̱ uba̱ta̱ wa̱ wu shi>?

32 Usheli u te icina ni itana i wukalu ya̱ yi,

ko ka sa'avu e icina ni itana i yisukumishi ya̱ yi?

Na̱ ne suru ama a̱ va̱ e icina ta̱ na̱ mu,

rana na̱ a̱bunda̱.>>

33 <<Vu ta̱ nu ugbozu lon

uba̱ta̱ wi izami i macigata!

Hali na a̱ma̱ci a na a la'ai iwuya,

o rito a̱tsuma̱ a̱ re va̱ wu.

34 A̱ a̱tugu a̱ wu ama a tsu cina ta̱,

mpasa mo ozo o ulambu,

aza a na a̱ ri babu unusu,

ko na wo o'woi vu reme le

a na o ɓosoi a uwa shi,

suru na̱ ne,

35 vu damma ta̱, <N ri nu unusu shi,

agba u ri o upan na̱ mu shi.>

Amma n ta̱ ta̱wa̱ nu uge'etosu a aci a̱ wu,

adama a na vu dammai,

<N yuwan unusu shi.>

36 Adama a̱ nye vu ri e igaru tsunda,

a vadalasa re va̱ wu?

Masar ta ca wu wono

ununa vu sowoi wono e ekere aza a Asuriya.

37 Agba vu ta lyawa uba̱ta̱'a̱

ne e ekere a̱ wu aaci ukoru,

adama a na A̱sulazuva a 'yuwan ta̱,

aza a na vu zuwayi ucira,

agba va̱a̱ tsura̱ ikambishi diga ya̱'a̱ le shi.>>