1 Apa ili i na A̱sulazuva a dammai, <<'Ya̱wa̱ vu tsula meden uba̱ta̱ wu za vu uma'an. Vu tara ozo o ro diga a̱tsuma̱ a mbara ma ama na̱ a̱tsuma̱ a nan ganu. 2 Vu ka̱ra̱ a̱ tyo o Uka̱ri wa Ben Hinom o Uwata wa Ayimba. Lo ɗa va yuwan adanshi e ili i na ma damma wu.✝ 3 Reve vu damma, <Uwwai adanshi a̱ A̱sulazuva, a̱ɗu ngono ma Yahuda na̱ nda̱na̱ta̱ ma Urishelima. Apa ili i na A̱sulazuva o oɓolo a̱ a̱soja a zuva A̱sula̱ a Isra'ila a dansa, i polo atsuvu! N ta̱ ta̱wa̱ na addama uba̱ta̱ u nda, za na uwwai biti, lipu va̱ yi ta̱ je'en lon. 4 Adama a na ama a nda a lyawa mu ta̱, reve a̱ ka̱mba̱to uba̱ta̱ u nda, uba̱ta̱ u musula̱ mo omoci, a ca ta̱ kucci vu ukula̱tosu uba̱ta̱'a̱ a̱ tyo uba̱ta̱ u musula̱. Musula̱ nna ko le, ko nkaya nle ko ngono ma Yahuda nle e revei shi. Reve fo o shiton uba̱ta̱ u nda na̱ mpasa ma aza a babu unusu. 5 A̱vu waru a suwa ba̱ta̱ va̱ a̱ga̱nda̱ va Ba'al adama a na a ca kucci vu ukula̱tosu u muwun nle va akina, udammu u na n ca yi shi, ko wila̱ shi, waru n yuwan majiyan ma̱ yi shi✝. 6 Adama o ndolo i da̱na̱ nu urevu, mantsa ma̱ ta̱ lo a̱ ta̱wa̱ na a̱ da̱shi ɗe uba̱ta̱ u nda Tofe ko Uka̱ri wa Ben Hinom shi, amma a̱ ta̱ ɗe yi Uka̱ri u wocosu wu mpasa. Ne ɗa A̱sulazuva a dammai. 7 N ta̱ ka̱mbuwa̱ ifoɓi ya Yahuda na̱ Urishelima ili ya̱ pere uba̱ta̱ u nda. N ta zuwa n'yuwatan nle o una le na̱ matsun me pe'eni, amayun n ta zuwa le a̱ riya̱ e ekere aza a na a zama wuma u le o una le. N ta zuwa a̱kwa̱kwa̱ a̱ lipu le wo o'wo ilyalya yi nnunu ni inama yu una. 8 N ta̱ ka̱mbuwa̱ lyuci nda okongo ni ili i wovon ni ili i macuru. Za na ka̱ra̱la̱i lo uba̱ta̱'a̱ u ta lamba ili i na wa damma reve u cira adama addama a na a cinai lyuci'i. 9 N ta zuwa le a tama inama i muwun nle yo olobo ne esheli, a̱ ta̱ gba a tama inama i lipu i le yi nron mu nden nle a mantsa ma na a̱tsuma̱lima̱ a̱ ka̱nda̱ruwa̱ nle, na n'yuwatan nle n ta̱wa̱a̱ nle aza a na a zama wuma u le.> >>

10 Reve A̱sulazuva a lyuwa elime u damma,<<Vu ɓoso mede'en esu aza a na a̱ shewun nuwu e le a̱ka̱nla̱. 11 A̱vu vu damma le, <Ununa vu ɓosoi mede'en hali na u ri n lapula shi, ne ɗa a̱mu A̱sulazuva o oɓolo a̱ a̱soja a zuva moo kototo ama a̱ lyuci a nda. A̱ ta̱ ciɗo ama a Tofe hali she nu uba̱ta̱ wa̱ ciɗa̱ a̱ ka̱la̱ma̱. Ne ɗa A̱sulazuva a dammai. 12 To, gogo apa ili i na ma yuwan nu uba̱ta̱ u nda, na aza a na a̱ ri nden pa, n ta̱ gba ka̱mba̱to lyuci nda tsa̱ Tofe, ne ɗa A̱sulazuva a dammai. 13 'Wa na ri Urishelima na̱ za vu ngono ma Yahuda, o to o'woto le idaba tsa Tofe, oɓolo na̱ 'wa na aa casu kucci vu kula̱tosu wi ili i ma̱guru zuva va asula e igungu biti a̱ tyo uba̱ta̱ italyo'o ya zuva waru a casu kucci vi ili yo oso uba̱ta̱ u musula̱ n ro.> >>

14 Reve Irimiya ka̱mba̱ diga Tofe, uba̱ta̱ u na A̱sulazuva a̱ lyungu niyi na wa yuwan adanshi e ikaka, reve wi isawan okowo wu u'wa wa̱ A̱sulazuva u damma ama'a suru, 15 <<Apa ili i na A̱sulazuva o oɓolo a̱ a̱soja a zuva A̱sula̱ a Isra'ila dammai, <Uwwai! A̱yi ɗa nda n ta̱ ta̱wa̱a̱ lyuci nda na̱ nda̱na̱ta̱ nle suru na addama a na n dammai a aci le, adama a na a̱ 'ya̱sa̱n mu ta̱ aci, waru o polo atsuvu e idanshi i va̱ shi.> >>