1 <<Uwwa adanshi a na A̱sulazuva a damma nuwu, a̱vu u'wa wa Isra'ila.

2 <<Apa ili i na A̱sulazuva a dammai,

<She i rito re vu nɗa n ro wan,

ko yu uwwa wovon

wi iroci ya zuva wan,

ko na wo o'woi nɗa

n ta uwwusa wovon u le.

3 Adama a na agadu

a ama'a ili ya̱ pere i ɗa,

o tsu koɗo ta̱ ɗanga diga a̱a̱rumbu,

reve she'ein she'en yi na̱ meshe'en.

4 A tsu sura yi ta̱ na̱ azurufa na̱ zinariya,

reve a̱ shuwa̱ ɗanga'a

na̱ ma̱ka̱ta̱ ni ikusa

tsura̱ u riya̱ wan.> >>

5 <<A̱ma̱li e le o ndolo a̱ ta̱

tsi iroci yi ili i wovon

o uɗuma̱ wo oɗyoryo,

waru a tsu gura

yuwan adanshi shi,

ko na 'yuwan a ciga

usheɗu u ɗa a̱ tsu sheɗe le

adama a na a tsu gura wala shi.

She yu uwwa wovon u le wan,

adama a na a̱ ri nu ucira

u na a yuwan iwuya shi,

waru a̱ ri nu ucira

u na a yuwan isa'ani fo shi.>>

6 <<A̱sulazuva za lo tsa̱ wu shi!

A̱vu zagbain ɗa,

Ala a̱ wu a̱ ta̱ na̱

tsugbain nu ucira lon.

7 Zane ɗa a ca wu tsugbain shi,

a̱vu mogono ma nɗa?✝

Na amayun vu ntsaa ta̱

a uwwa wovon wa̱ wu.

A̱tsuma̱ aza a na a la'ai

ugbozu a̱tsuma̱ a nɗa,

na̱ a̱tsuma̱ o tsugono tsa̱ le suru,

za lo tsa̱ wu shi.

8 Ele a̱za̱ o ulambu

wu ugbozu a ɗa, waru olo,

a̱ma̱li a ɗanga

e pere a ɗa o ritosu le.

9 A̱ tsu ta̱wa̱ ta̱ nu uruma

u azurufa diga Tarshishi

na̱ zinariya diga Ufaz.

Ili i na maruma,

na̱ za vu ulinga

u zinariya u yuwain,

a̱vu o oto le mutugu n da̱nda̱n

na̱ mini ma̱ ma̱ɗiya̱,

suru le ulinga wu za vu uɗava ɗa.

10 Amma A̱sulazuva a ɗa A̱sula̱ amayun.

A̱yi ɗa A̱sula̱ a wuma,

Mogono ma na ma̱ ri nu ukosu shi.

Nna̱ u yuwan upan

uvaɗi u tsu jinga̱ɗa̱ ta̱,

waru nɗa maa gura

kaɓa asuvu nu upan wa̱ shi.>>

11 Apa ili i na vaa damma le, <<Musula̱ nda aza a na a yuwain zuva ni iɗa i ɗa shi, a̱ ta̱ puwa̱a̱n diga o uvaɗi na̱ diga za̱la̱ va zuva. >>

12 <<Amma A̱sula̱ a ɗa

a yuwain uvaɗi nu ucira wa̱ yi,

za na shuwa̱i uvaɗi

o una̱ wu ugbozu wa̱ yi,

reve u polo zuva

o una̱ wu urevu wa̱ yi.

13 A mantsa ma na u yuwain tsata,

mini ma zuva ma̱ tsu gugwa̱ ta̱.

U tsu zuwa ta̱ eleshe 'yon

diga o ukosu wu uvaɗi,

u tsu lyungu ta̱ fo

ni imaɗatsu ni iro'i,

waru u tsu uta̱a̱ ta̱ upepu

diga o u'wa wi izuwa ya̱ yi.✝

14 Za suru ri na aci shi,

waru babu ugbozu.

Za vu ulinga u zinariya suru

u ta uwwa wono adama a̱ma̱li a̱ yi,

iroci ya̱ yi suru a̱ma̱li a ɗa,

a̱ ri nu wivuwun a̱tsuma̱ e le shi.

15 Ele ili ye pere i ɗa,

ili yi izo'oshi,

na̱ mantsa mo oforo le ta̱wa̱

o to kototo le.

16 Adama a na A̱sula̱,

za na wo o'woi akunda a Yakubu

a̱ ri tsunda shi,

adama a na a̱ yi ɗa

za na yuwain ili suru,

oɓolo na̱ Isra'ila ugundo

we elentsu agadu a̱ yi,

waru ala a̱ yi ɗa,

a̱ A̱sulazuva oɓolo a̱ a̱soja a zuva.>>

17 <<Ɓolotoi itana i ɗu,

adama i lyawa lyuci'i,

a̱ɗu na i ri nden uba̱ta̱ u na

a̱ ka̱nda̱ruwa̱i nu uvon.>>

18 Adama a na apa

ili i na A̱sulazuva a dammai,

<<A mantsa ma nda

n ta̱ vuta̱la̱ n vari

aza a na a̱ ri pe na̱ nden

a̱tsuma̱ e iɗa i nda,

n ta̱ ta̱wa̱a̱ le na̱ a̱tsuma̱lima̱

adama a̱ tsura̱ e reme le.>>

19 A̱vu ama a̱ Urishelima a damma,

<<A̱tsuma̱lima̱ a cina mu ta̱

adama a̱ wufuru u va̱!

Usa̱n u va̱ za na

a̱ ka̱mba̱ gbaga ɗa shi!>>

Na̱ ne suru n damma ta̱ aciya̱va̱,

<<Mɓa̱la̱ n va̱ n ɗa,

waru ko n 'yuwan n ciga

n kaɓa asuvu na̱ yi.>>

20 <<A̱ lungusa̱ ta̱ oogodo a̱ va̱,

a taɓa ta̱ amunga a̱ yi suru,

muwun mo olobo n va̱

mu kasa ta̱ na̱ mu

waru a buwa lo shi,

babu za na buwai lo

na̱ a̱ shuwisa̱ oogodo a̱ va̱,

ko u sakato umuna

wo oogodo a̱ va̱.

21 Adama a na aza aguɓa'a

a̱ ri na aci shi,

waru a tsu pati A̱sulazuva shi.

Adama o ndolo a̱ tsura̱

ulyuwu we elime shi,

waru e bete'we ta̱ ikyon i le suru.

22 Uwwai ne'e!

Alabari a̱ ta̱ lo a̱ ta̱wa̱,

a̱ba̱jini o u'ya̱susa̱n wu ugbozu

diga o upasu wi iɗa yu ugana!

U ta̱ ka̱mba̱to ilyuci ya Yahuda okongo,

uba̱ta̱ wu nden m musa̱n yu una.>>

23 <<A̱sulazuva, n reve ta̱,

a na wuma u vuma

u ri o ukere wa̱ yi shi,

vuma ɗa ri nu ucira u na

wa walato mmalu ma̱ yi shi.

24 Zuwa mu n kira, A̱sulazuva,

a̱tsuma̱ o ure wa̱ a̱ɓula̱,

amma a̱tsuma̱ o upan wa̱ wu shi,

adama ta̱wa̱ vu kototo mu wan.

25 Tsun upan wa̱ wu a aci a nɗa

nna n reve nuwu shi,

e ekere a ama a na

e ɗesu ala a̱ wu shi,

adama a na o kototo ta̱

ugundo wa Yakubu,

a lyuwa yi ta̱ kpa̱ra̱a̱,

reve o kototo uba̱ta̱ wu nda̱na̱ta̱ ma̱ yi.>>✝