1 Reve A̱sulazuva a yuwan adanshi na̱ Irimiya a mantsa ma na Nebuzarada zagbain va̱ a̱za̱ e ipiri i mogono lyawa niyi ɗe a Rama, Nebuzarada shi ta̱ 'ya̱wa̱ ɗe na̱ Irimiya wunlu na akani, oɓolo na ama a̱ Urishelima na̱ Yahuda aza a na a tarai a̱ tyo tsugbashi a̱tsuma̱ a Babila. 2 Ana zagbain va̱ a̱za̱ e ipiri'i u cinai Irimiya, reve u damma yi, <<A̱sulazuva A̱sula̱ a̱ wu a ɗa a yuwain adanshi adama a addama o uba̱ta̱ u nda. 3 Gogo A̱sulazuva a zuwa yi ta̱ u shiwan, waru a̱ yi ɗa nda u yuwain ununa u dammai. Ili ya nda suru i fara ta̱ adama a na i yuwayin A̱sulazuva unusu, waru i yuwaan yi tsutoni shi. 4 Agba ana'an n ta̱ ba̱ɗa̱ amunga a na a̱ ri a̱ yinlu ya̱ wu. Ta̱wa̱ tsu ka̱ra̱ a̱ tyo Babila na̱ vu ciga, n ta̱ gba e idana wu ulobonu, amma na̱ vu ciga shi, she vu ta̱wa̱ wan. Ka̱lyuwa̱, agba a̱ yi ɗa iɗa'a suru i ta̱ ekere a̱ wu, vu ka̱ra̱ a̱ tyo uba̱ta̱ u na vu cigai biti.>> 5 Amma kafu Irimiya vadala na wa̱ ka̱ra̱, reve Nebuzarada da̱shi damma yi, <<Vu ka̱mba̱ uba̱ta̱ wa̱ Gedaliya ulobo wa Ahikam ulobo wa Shafa, za na mogono ma Babila ma zuwai a na wa yuwan tsugono tsi ilyuci ya Yahuda, vu da̱nu oɓolo na̱ a̱ yi na ama'a, ko gba shi vu tyo uba̱ta̱ u na ve e enei ulobono nuwu biti.>> Reve u ca Irimiya ilyalya oɓolo nu une'e, a̱vu u lyawai u ka̱ra̱. 6 Reve Irimiya ka̱ra̱ a̱ tyo ya Gedaliya ulobo wa Ahikam a̱tsuma̱ a Mizfa, a̱vu u da̱nu oɓolo na̱ a̱ yi na akapi ama na a buwai pe e iɗa'a.

7 A mantsa ma na azagbain a̱soja suru na a̱ ri a pasu va Yahuda oɓolo na ama e le, a uwwai alabari a na Mogono ma Babila ma zuwa ta̱ Gedaliya ulobo wa Ahikam wo o'wo za na a yuwan tsugbain tsi iɗa'a e ekere a ali na̱ a̱ma̱ci na̱ muwun, aza a na a̱ ri nu ulambu a̱tsuma̱ e iɗa'a, oɓolo na aza a na a̱ pura̱i a̱ tyo e iɗa ya Babila tsugbashi shi, 8 reve a̱ ta̱wa̱ uba̱ta̱ wa̱ Gedaliya a̱tsuma̱ a Mizfa, Isma'ila ulobo wa Netaniya na̱ Yohanan na̱ Jonata olobo a Kareya na̱ Seraya ulobo wa Tahume no olobo a Epai vuma va Netofa na̱ Jazaniya ulobo u vuma va Ma'aka oɓolo na ama e le. 9 Gedaliya ulobo wa Ahikam ulobo wa Shafa, ma kucinaa le ta̱ oɓolo na a ama e le u damma, <<She yu uwwa wovon u na yaa yuwaan Babila tsugbashi wan. Yuwain nden n ɗu a̱tsuma̱ e iɗa'a, i yuwaan Mogono ma Babila tsugbashi, waru u ta yuwan ɗu urana. 10 A̱mu na aciya̱va̱ n ta̱ da̱nu a̱tsuma̱ a Mizfa, na moo o'wo ɗu lyusu uba̱ta̱ wa aza a Babila aza a na a̱ ta̱wa̱i uba̱ta̱ u tsu. Amma i gasa umatsun u ina̱bi nu umatsun wu uɗanga ni irana na̱ mani'i ma̱ zetun, i zuɗa̱ le a̱tsuma̱ a̱ka̱bu e izuwa a̱ ɗu, reve waru i da̱nu a̱tsuma̱ e ilyuci i na i usai.>>

11 A mantsa ma na aza a Yahuda suru a na a̱ ri a̱tsuma̱ a Mowa na̱ Amon na̱ Edom oɓolo na akapi a nɗa a uwwai ana, mogono ma Babila ma lyawa ta̱ akapi a ama o ro a̱tsuma̱ a Yahuda, a̱vu u ɗangula Gedaliya ulobo wa Ahikam ulobo wa Shafa gwamna aci e le. 12 Reve a̱ ka̱mba̱ a̱tsuma̱ e iɗa ya Yahuda, uba̱ta̱ wa Gedaliya a̱tsuma̱ a Mizfa, diga a̱tsuma̱ e iɗa i na a̱ da̱na̱i ubetu'wu suru. A̱vu o ɓoloto masayan ma̱ ina̱bi lon nu umatsun wu ɗanga ni irana.

13 Uranu u ro a̱vu Yohanan ulobo wa̱ Kareya oɓolo na a azagbain a̱soja a na a̱ ri ubetu'wu suru a̱tsuma̱ a nɗa, a̱ ta̱wa̱ uba̱ta̱ wa̱ Gedaliya a̱tsuma̱ a Mizfa, 14 reve a damma yi, <<Ko vu ta̱ nu urevu u na Ba'ali Mogono ma aza a Amon ma̱ lyunguyi Isma'ila ulobo wa Netaniya a na wo o una wu?>> Amma Gedaliya ulobo wa Ahikam, tara adanshi e le ili ya̱ a̱ɓula̱ shi.

15 Reve Yohanan ulobo wa Kareya yuwan adanshi na̱ Gedaliya a̱tsuma̱ a Mizfa usokowu u damma, <<Lyawa n ka̱ra̱ na ma̱a̱ 'ya̱wa̱ mu una Isma'ila ulobo wa Netaniya, waru babu za na ee reve. Adama a̱ nye ɗa a̱ yi u cigai a na wo o una wu, adama u bete'we aza a Yahuda suru na a̱ ri o oɓolo na̱ a̱vu, hali na akapi a aza a Yahuda a na a buwai a̱ kuwa̱?>>

16 Amma reve Gedaliya ulobo wa Ahikam damma Yohanan ulobo wa Kareya, <<She vu yuwan cu'un vi ili i ndolo wan, adama a na ili i na va adansa adama Isma'ila, amayun a ɗa shi.>>