1 A̱sulazuva a damma ta̱, <<A mantsa mo ndolo, a̱ ta̱ o uta̱a̱ ne etele o ngono ma Yahuda, ne etele a nan ganu na aza a ama̱sula̱, ne etele a ama a̱ Urishelima diga ason le. 2 A̱ ta̱ o uta̱ le o urana no woto na̱ mutyolo'o ma zuva nna i cigai, a na wo o'woi a̱ ta̱ kurusu urana na̱ woto na̱ mutyolo'o, musula̱n nna a cigai waru aa yuwusaan le a̱ga̱nda̱. Oo ɓoloto le ko a̱ ciɗo le shi, amma o to o'wo tsa̱ edemu wocowu e iɗa. 3 Uba̱ta̱ u na m gba̱ra̱ nle a̱ 'ya̱wa̱ suru, akapi a na a buwai suru a̱tsuma̱ akapi o gundo vu nɗa n vama nda a ta la'a ciga ukwa̱ na̱ a̱ da̱na̱ wuma,>> ne ɗa A̱sulazuva o oɓolo a̱ a̱soja a zuva dammai.

4 Irimiya vu damma le,

apa ili i na A̱sulazuva a dammai,

<<Na̱ vuma riya̱ u tsu 'yowisa̱n shi?

Na̱ vuma lyawa ure wa̱ ka̱mbisa̱ shi?

5 Nye i zuwai ama a nda a vadalai ucina̱?

Nye i zuwai a̱za̱ a̱ Urishelima

a vadalai ucina̱ kuci?

A suraa ta̱ epen,

reve a 'yuwan na a vadala.

6 N polo ta̱ atsuvu ulobono,

amma a yuwan adanshi

e mejege shi.

Babu za na vadaluwai

diga e iwuya ya̱ yi,

adansa, <Nye ɗa n yuwain?>

Za suru ta̱ kurusu okolo a̱ yi,

cine do tsu foɓo

u 'ya̱wa̱ uba̱ta̱ o uvon.

7 Ko aashamuwa a na a̱ ri agalaci a zuva,

e reve ta̱ mantsa ma̱ yi.

Waru ma̱rukuku na̱ manunu na̱ a̱a̱pa̱mu,

e reve ta̱ mantsa ma na a̱ tsu ka̱mba̱,

amma ama a̱ va̱ e reve

ili i na A̱sulazuva a cigai shi.>>

8 Cine tsu ɗa yaa damma,

<<Tsu tu nu ugbozu,

adama a na tsu ta̱

na̱ wila̱ wa̱ A̱sulazuva,>>

agba a̱ yi ɗa nda,

agita a za vi iɗana

a ɗanasa epen?

9 <<A ta ca a̱za̱ o ugbozu wono,

a ta dada'wan reve e reme le,

na wo o'woi a 'yuwain

adanshi a̱ A̱sulazuva,

gogo cu'un vu ugbozu

u ne u ɗa a̱ ri na̱ yi?

10 Adama o ndolo n ta ca

ozo o ro a̱ma̱ci e le,

a̱ɗuma̱ le waru uba̱ta̱ wa aza na

a lyuwa nle nu uvon,

diga uba̱ta̱ wu za a na la'ai

uka̱la̱mu a̱ tyo a zagbain,

za suru ta zamishi u tsura̱

uda̱shiwu wa̱ a̱bunda̱,

hali fo na ama̱sula̱ na̱ nan ganu,

za suru ta yuwusan ulinga ne epen.>>

11 O tsu co'wo ta̱ antsu ama a̱ va̱

she damma ili i ro i ɗa shi.

Adansa, <<Nden ma asuvu,

Nden ma asuvu,>>

agba a̱ yi ɗa nda

babu nden ma asuvu. ✝

12 <<A ta uwwusa wono

wi ili yi idaba i na a yuwain?

O'o, a̱ ri na̱ wono shi ko ke'en,

agba e reve cine

a̱ ka̱ɗa̱to urewesu shi.

Adama o ndolo a̱ ta̱ riya̱

oɓolo na aza a na a̱ a̱risa̱,

a̱ ta̱ ka̱ɗa̱to le a mantsa

ma na n ca nle oforo,>>

ne ɗa A̱sulazuva a dammai.

13 <<N ta usa itana yu ugasa u le,>>

ne ɗa A̱sulazuva a dammai.

Muwun n ina̱bi ma̱a̱ da̱na̱ ɗe ataci'i shi,

a̱ tsura̱ muwun mu ubiri

zuva vu uɗanga shi,

waru a̱vu'un e le a̱ ta̱ 'yewe.

Utsuru u na n ca nle fo

a ta usa le ɗa.

14 Reve ama a Yahuda a damma,

<<Nye i zuwai tsu ri pa nden kuci?

Lyawa tsu ɓolotoi tsu sumai

a̱ tyo e ilyuci i na i ri

na̱ ɓaɓu vu ucira tsu kuwa̱i ɗe!

Adama a na a̱ A̱sulazuva A̱sula̱ a̱ tsu

a lyawa tsu ta̱ tsu kuwa̱i,

waru u ca tsu ta̱ mini ma yaza tsu sowo,

adama a na tsu yuwan niyi unusu.

15 Tsu zuwa ta̱ okolo

a̱ nden ma asuvu

amma babu ili i sa'ani i na i ta̱wa̱i,

a mantsa ma na tsa̱ tsura̱ opocino,

amma she wovon goon!

16 Diga o upasu wa Dan

a ta uwwusa mesun

me ido yi n'yuwatan,

a mawwa me mesun me ido i i le'e,

iɗa'a suru i jinga̱ɗa̱ ta̱.

A̱ ta̱wa̱ ta̱ adama a lyuwa iɗa'a

oɓolo ni ili i na i ri pe

a̱tsuma̱ a̱ yi suru,

waru a lyuwa lyuci gbai'in nu uvon

oɓolo na aza a na

a̱ ri pe na̱ nden suru.>>

17 A̱vu A̱sulazuva a damma,

<<Ka̱lyuwa̱i, n ta̱ lyunguwa̱a̱ ɗu

ni iyo i tsukono

e memere ma̱ ɗu,

iruku i na a gura geshe shi,

waru a̱ ta̱ a̱ ka̱ɗa̱ ɗu.>>

18 <<Za na a casu mu adanshi

a mantsa ma̱ a̱tsumola̱ngu a̱ va̱,

okolo a̱ va̱ a̱ la̱nga̱ ta̱ lon.>>

19 Vu uwwa mesun ma ama a̱ va̱,

diga e iɗa ya alanga,

<<A̱sulazuva a̱ ri pe Sihiyona shi?

Mogono ma̱ yi ma buwa pe shi?>>

Reve A̱sulazuva Mogono

ma̱ le ma̱ usu u damma,

<<Adama nye a yuwusaan

a̱ma̱li a̱ a̱ga̱nda̱?

Adama a̱ nye i zuwa numu

n yuwan upan

na yaa yuwusaan musula̱ mo omoci n ro

a̱ga̱nda̱ a na a̱ ri nu urana shi?>>

20 Reve Irimiya usu u damma,

<<Mantsa mo ugasa ma̱ ka̱ra̱ ta̱

waru lyushi koto ta̱,

agba hali gogo a wawa tsu shi.>>

21 <<Usa̱n u na amatoyin ama a̱ va̱,

wa amaton ta̱ okolo a̱ va̱

n ta̱ a̱tsumola̱ngu,

waru wovon u guza̱ mu ta̱ lon.

22 Na amayun a̱guma̱ a̱ ɗe Giliyadu shi?

Za va̱ a̱guma̱ ɗe shi?

To, nye i zuwai a yuwaayin

antsu ama a̱ va̱ opocino shi?>>