1 Ana Pashu ganu ulobo wa Imme, zagbain vu ulinga wu u'wa wa̱ A̱sulazuva, uwwai Irimiya adanshi e ikaka i nda, 2 reve u zuwa a kada Irimiya vumava̱sula̱, reve u zuwa yi gba, a̱vu a zuwai o na̱ntsu wa Zuva va Banyami o u'wa wa̱ A̱sulazuva. 3 Ana usana u tawai, a mantsa ma na Pashu tawai ana Irimiya diga a̱tsuma̱ akpata a na a̱ guzusa̱ ana'a, a̱vu Irimiya damma yi, <<A̱sulazuva a̱ da̱shi ɗe wu na aala Pashu shi, amma na aala Magomisabi.* 4 Adama a na apa ili i na A̱sulazuva a dammai, <N ta zuwa vo o'wo ili i wovon wa aciya̱wu, na̱ n'utsa̱ ma̱ wu suru. Ne esu a̱ wu a ɗa vee ene matsun me pe'eni ma n'yuwatan o kototosu le. N ta ca ama a Yahuda suru e ekere o mogono ma Babila, za na a̱ pura̱ le suru a̱ tyo tsugbashi a Babila, reve fo wu una le na̱ matsun me pe'eni. 5 N ta ca n'yuwatan nle suru utsuru u lyuci u nda, ni itana ya̱ yi suru, ni ili ya awina i le suru, ni itana isa'ani i le suru, nu utsuru wu ngono ma Yahuda suru. A̱ ta̱ pura̱ le tsi itana i na a̱ pura̱i uba̱ta̱ o uvon a̱ tyo iɗa ya Babila tsugbashi. 6 Agba a̱vu Pashu, na ama a na a̱ ri o u'wa wa̱ wu suru, a̱ ta̱ a̱ tyowetyo ɗu tsugbashi a Babila. Ɗe ɗa ya̱ kuwa̱, waru ɗe ɗa a̱ ciɗo ɗu, a̱vu na̱ n'utsa̱ ma̱ wu suru, aza a na vu yuwayin adanshi e ikaka ye epen.> >>

7 <<A̱sulazuva vu luluma̱ mu ta̱,

waru mu uwwa ta̱ wulumu'u.

Vu la'a mu ta̱ ucira,

waru vu lyuwa ta̱ aci a̱ va̱.

Mo o'wo ta̱ ili yi izo'oshi

urana ma̱ɓula̱,

waru za suru

ta yuwusaan mu ulamu.

8 A mantsa ma na

maa yuwan adanshi suru,

n tsu 'ya̱sa̱n ta̱

uɗyo n yuwan adanshi

nu ucira n damma,

u'ya̱susa̱n wu ugbozu

nu ukototosu goon.

Adama o ndolo a ɗa

adanshi a̱ A̱sulazuva

a̱ ta̱wa̱a̱ numu na̱ wisulusa

na avandaru urana ma̱ɓula̱.>>

9 Amma nna̱ n damma,

<<Mee ɗe ala a̱ A̱sulazuva shi,

ko n da̱shi yuwan

adanshi na ala'a shi,>>

reve mu uwwa adanshi a̱ yi

a̱tsuma̱ a̱ va̱ va damma akina,

tsa akina a na

a tamusa etele a̱ va̱.

N kuna̱ ta̱

a tsutsugbusa yi a̱tsuma̱ a̱ va̱,

na amayun ma gura shi.

10 Mu uwwa ta̱ ama na̱ a̱bunda̱

a̱ yemenu adansa,

<<U'ya̱susa̱n wu ugbozu mɓa̱nga̱ biti!>>

Waru a dansa,

<<Tsu 'ya̱wa̱i na adanshi a̱yi!

Naa amayun,

tsu 'ya̱wa̱i na adanshi a̱yi!>>

N'utsa̱ n va̱ suru

a ta pura a̱risa̱ a̱ va̱.

Waru a ta dansa,

<<U ta gura wo o'wo

a̱ luluma̱ yi,

adama tsu lyuwa aci a̱ yi,

tsu tsupa.>>

11 <<Amma A̱sulazuva

a̱ ta̱ oɓolo na̱ mu,

tsa yali yu uvon.

Adama o ndolo n'yuwatan n va̱

n ta̱ ta̱ɗa̱tsa̱,

waru a lyuwa aci a̱ va̱ shi.

A̱ ta̱ riya̱ a̱vu o sowo wono lon,

a̱a̱ da̱shi e icina nu ulambu

u tsutoni tsa̱ e le shi.

12 A̱sulazuva oɓolo a̱ a̱soja a zuva,

zana tsu lyungwa̱ a̱za̱ a̱ a̱ɓula̱,

zana tse ene okolo,

oɓolo na̱ majiyan ma vaɗilima̱,

lyawa me ene atsupu a̱ wu a aci e le,

adama a na ya̱'a̱ wu ɗa,

n ta̱wa̱i na adanshi a̱ va̱.

13 Canayi A̱sulazuva ishipa!

Cuwai A̱sulazuva!

Adama a na u tsu wawusa ta̱

aza a na a cigai ikambishi,

diga e ekere aza a na

a yuwusan iwuya.>>

14 <<Lyawa una̱ u reme

urana u na a matsan numu!

She urana u na mma va̱ matsa numu

da̱na̱ na aba'un wan!>>

15 Za na a yuwayin una̱ ɗa

za na 'ya̱wa̱i na aɗa

a limatan va̱

uba̱ta̱ wa abara a̱ va̱,

za na zuwai abara a̱ va̱

a yuwain ma̱za̱nga̱ a dansa,

<<A matsaan wu ta̱ ulobo!>>

16 <<Lyawa vuma ndolo o'wo

tse ilyuci i na A̱sulazuva

a̱ mula̱i babu ene iliyali.

Lyawa wu uwwa yisali nu usana,

waru wu uwwa yisali

yu uvon nu urana,

17 ana wo o'woi u kototo mu,

a̱mu a̱tsuma̱ a̱a̱tsuma̱ shi.

U shi ta la'a a damma,

a̱a̱tsuma̱ a mma va̱

wo o'wo aason a̱ va̱,

a̱a̱tsuma̱ a̱yi waru

a̱ da̱na̱ mgbain hali hali.

18 Adama nye mu uta̱i

a̱tsuma̱ a̱a̱tsuma̱ a mma va̱,

na mee ene a̱tsuma̱lima̱

na̱ a̱tsumola̱ngu,

waru n koto rana va̱,

a̱tsuma̱ a̱tsuma̱ o wono?>>