1 Ɗaɗa nan yali ya̱ a̱soja suru, oɓolo na̱ Yohanan ulobo wa̱ Kareya na̱ Yazaniya ulobo wa̱ Hoshaya, oɓolo na ama'a suru, diga a za ke'en a̱ tyo a zagbain a̱ ta̱wa̱i, 2 a̱vu a damma vumava̱sula̱ Irimiya, <<Tsu ta̱ e ipati ya̱ wu vu uwwa mesun ma̱ tsu, vu yuwan avasa a̱ tyo uba̱ta̱ wa̱ A̱sulazuva A̱sula̱ a̱ tsu, adama akapi ama a na a buwai nda'a suru. Adama a na ununa vee e nda'a gogo, ko na wo o'woi tsu da̱na̱ ta̱ a̱bunda̱ ɗe nu ufaru, agba gogo a̱ yi ɗa nda wa'a ɗa tsu buwai. 3 Vu Patiyaa tsu A̱sulazuva A̱sula̱ a̱ tsu, adama u roco tsu ure u na tso toni, oɓolo ni ili i na tsa yuwan.>>

4 A̱vu vumava̱sula̱ Irimiya usu le u damma, <<Mu uwwa ta̱, na amayun n ta yuwan avasa a̱ tyo uba̱ta̱ wa̱ A̱sulazuva A̱sula̱ a̱ tsu ununa i patiyi, waru n ta damma ɗu suru ili i na A̱sulazuva a dammai, agba babu ili i na moo soko ɗu.>>

5 A̱vu ama'a a damma Irimiya <<Lyawa A̱sulazuva wo o'wo tsu e esu a amayun na̱ a̱ɓula̱ a aci a̱ tsu, nna̱ tsu yuwan ulobonu ununa A̱sulazuva A̱sula̱ a̱ tsu a̱ lyungu nuwu vu damma tsu shi. 6 Ko na̱ shi ikaka'a za vu uyo'o ɗa ko nu ri uyo'o shi, tsu ta yuwan tsutoni na̱ A̱sulazuva a̱ A̱sula̱ a̱ tsu, za na tsu lyungu nuwu ya̱'a̱ yi, adama ili i wala tsu mejege, adama a na tsu ta yuwan tsutoni na̱ A̱sulazuva a̱ A̱sula̱ a̱ tsu.>>

7 Ana a yuwain rana kupa, a̱vu A̱sulazuva a yuwan adanshi na̱ Irimiya. 8 Ɗaɗa u ɗeyi Yohanan ulobo wa̱ Kareya, oɓolo na̱ nan yali ya̱ a̱soja a na a̱ ri oɓolo na̱ yi suru, oɓolo na ama suru diga a za ke'en a̱ tyo a zagbain. 9 A̱vu u damma le, <<Apa ili i na A̱sulazuva a̱ A̱sula̱ a Isra'ila a dammai, za na i lyungu numu ya̱'a̱ yi adama n damma yi mesun ma̱ ɗu, u damma ta̱, 10 Nni i da̱nu e iɗa nda, to, n ta suwa ɗu, mo ɓuɓoso ɗu shi. N ta̱ shuwa̱ ɗu, agba ma̱ mula̱ ɗu shi. Adama a na okolo a̱ va̱ a̱ tu ula̱ngu adama e iwuya i na n ta̱wa̱a̱ yi a aci ɗu. 11 She yu uwwa wovon u mogono ma Babila wan, za na gogo ya uwwusa wovon. She yu uwwa wovon wa̱ yi wan, adama a na n ta̱ lo oɓolo na̱ ɗu, n ta wawa ɗu diga e ekere a̱ yi. Ne ɗa A̱sulazuva a dammai. 12 N to roco ɗu iliyali, adama a̱ yi u roco ɗu iliyali, waru u ka̱mba̱to ɗu e iɗa i ɗu. 13 Amma nni i damma, <Tsee e isawan e iɗa i nda shi, i yuwan ta̱ ulambu u tsutoni na̱ A̱sulazuva a̱ A̱sula̱ a̱ tsu.> 14 Agba ni i dammisa, <O'o, tsu ta̱ ka̱ra̱ tsu 'ya̱wa̱ tsu da̱nu e iɗa ya Masar, uba̱ta̱ u na tse ene uvon ko tsu uwwa mesun ma avana shi, ko tsu uwwa ambulu shi,> >> 15 <<to, gogo uwwai adanshi A̱sulazuva, a̱ɗu akapi ama a Yahuda. A̱sulazuva o oɓolo a̱ a̱soja a zuva a̱ A̱sula̱ a Isra'ila a damma ta̱, <Nni izuwa ta̱ okolo a na ya̱a̱ 'ya̱wa̱ Masar, reve waru i ka̱ra̱ i 'ya̱wa̱ i da̱nu ɗe, 16 to, matsun me pe'eni ma na yaa uwwusa wovon wa̱ yi'i u ta cina ɗu ɗe, waru ambulu a na i ri e ilaɗi'i u ta̱ toni ɗu a̱ tyo Masar, waru ɗe ɗa ya̱ kuwa̱. 17 Na amayun, aza a na a zuwai okolo a na a̱ 'ya̱wa̱ Masar a̱ da̱nu ɗe, a̱ ta̱ kuwa̱ a̱tsuma̱ o ure u matsun me pe'eni na ambulu na̱ mɓa̱la̱. Babu vuma na a̱ da̱na̱ wuma ko u la'a diga addama a na ma̱a̱ ta̱wa̱a̱ a aci e le.> >>

18 <<Adama a na apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, ununa moo ocoyi upan u va̱ nu upan wu usuɗuwu u va̱ a̱ nda̱na̱ta̱ ma̱ Urishelima, ne ɗa moo oco upan wu usuɗuwu u va̱ aciya̱ɗu, nni i ka̱ra̱ a̱ tyo Masar. I to o'wo ili i na a yuwaan una̱ ni ili i wovon, ili yi idaba ni ili yi izo'oshi, waru ya̱a̱ da̱shi ene uba̱ta̱ u nda shi. 19 A̱ɗu akapi ama a Yahuda a na a buwai, uwwai ili na A̱sulazuva a dammai adama a̱ ɗu. <She i ka̱ra̱ a̱ tyo Masar wan!> I gura reve na̱ a̱ yi nda, na n rono nɗu atsuvu! 20 I yuwan ta̱ a̱ba̱jini o unusu, a mantsa ma na a̱ɗu na aciya̱ɗu i lyungu numu uba̱ta̱ wa̱ A̱sulazuva a̱ A̱sula̱ a̱ tsu, waru a̱vu i damma mu, <Vu Patiyaa tsu A̱sulazuva A̱sula̱ a̱ tsu, waru vu damma tsu ili i na u damma nuwu suru, tsu ta̱ gba a yuwan ulinga na̱ a̱ yi.> 21 Agba a̱ yi ɗa nda n damma n ɗu ana'an, amma hali n gogo i yuwan tsutoni na̱ A̱sulazuva a̱ A̱sula̱ a̱ tsu, a̱tsuma̱ e ili i na u lyungu numu n damma ɗu shi. 22 To, gogo she i reve ni ili i nda, i ta̱ kuwa̱ a̱tsuma̱ o ure u matsun me pe'eni, na ambulu na̱ mɓa̱la̱ a̱ tyo uba̱ta̱ u na i cigai i 'ya̱wa̱ i da̱nu.>>