1 <<Sumai adama i la'ato wuma u ɗu,

a̱ɗu ama a Banyami!

Sumai diga Urishelima!

Ivula̱i abulu a̱tsuma̱ a̱ Tekowa,

waru i 'ya̱sa̱n atuta

zuva va Bet Hakerem,

adama a na a̱tsuma̱lima̱ a̱ ta̱ 'yosun

diga upasu wu ugana,

nu ukototosu wu ucira.

2 N to kototo iɗa ya̱ Sihiyona,

a̱vu iɗa i isa'ani

uba̱ta̱ wa alyuna o ulobonu.>>

3 <<Aza a aguɓa ni ikyon i le

a̱ ta̱ ta̱wa̱ ya̱'a̱ yi,

a̱ ta̱ shuwa̱ ogodo e le

uka̱nda̱ruwu na̱ yi,

za suru e idanasa uba̱ta̱ wa̱ yi.>>

4 <<Foɓoi uvon a aci a̱ Urishelima!

'Yoyin, lyawa tsu riya̱ yi nu urana!

A'a, mantsa ma̱ ka̱ra̱ ta̱,

adama a na urana u ta̱ a̱ ma̱riya̱a̱,

ayin a ta yuwusan.

5 Adama o ndolo 'yoyin,

lyawa tsu riya̱a̱ yi na ayin,

tsu ɓoso ba̱ta̱ vu cira va̱ yi!>>

6 <<Apa ili i na A̱sulazuva

o oɓolo a̱ a̱soja a zuva a dammai,

yi koɗo ɗanga'a

reve i ɓoloto ma̱bula̱

uka̱nda̱ruwu na̱ Urishelima.

Ko a 'yuwan a ciga

a ca Lyuci Gbai'in oforo,

adama a na u shiwan ta̱ ni ɓongishi.

7 Cine oko'o a̱ tsu uta̱sa̱a̱ mini ma̱ yi,

ne ɗa wa̱a̱ uta̱sa̱a̱ iwuya ya̱ yi.

Mona nu ukototosu u ta̱

ma̱gugwa̱ a̱tsuma̱ a̱ yi,

ubanakun nan antsu a̱ yi

a̱ ta̱ a̱ ma̱ka̱ka̱n ma̱ va̱.>>

8 <<Vu uwwa tsuɓari, a̱vu Urishelima,

ko gbashi n vadaluwa wu ucina̱,

reve n ka̱mba̱to iɗa ya̱ wu okongo

adama she za da̱nu pe wan.>>

9 Apa ili i na A̱sulazuva

o oɓolo a̱ a̱soja a zuva a dammai,

<<Lyawa le a 'yanla

akapi a Isra'ila ulobonu

cine a tsu 'yanla ataci.

Vu da̱shi ba̱ruwa̱ ukere wa̱ wu e ete'en,

tsa za na o ɓolotosu ina̱bi.>>

10 <<Zane ɗa maa yuwaan adanshi,

a̱vu n ca tsuɓari?

Zane ɗa a uwwa mu?

A ula ta̱ atsuvu e le,

adama a̱ kuɗa̱ a uwwa.

Adanshi A̱sulazuva o o'wo ta̱

unusu e ekere e le,

a uwwusa uyo'o wa̱ yi shi.

11 Adama o ndolo n ta̱ tapu

nu upan wa̱ A̱sulazuva,

hali n kuɗa̱ a kaɓa asuvu.

A̱ tsun upan a aci a̱ muwun n na ri o ure,

oɓolo nu uba̱ta̱ wi iɓolo yo olobo,

a aci a ali na̱ a̱ma̱ci

na̱ mukoshi na̱ mukuci.>>

12 <<A ta ca ozo ro 'wa le,

oɓolo na̱ a̱ɗuma̱ e le

na̱ a̱ma̱ci e le suru.

Mantsa ma na n cananai ukere u va̱

nla̱ngi na̱ nda̱na̱ta̱ mi iɗa'a.

Ne ɗa A̱sulazuva a dammai.>>✝

13 <<Diga uba̱ta̱ wu za na la'ai uka̱la̱mu

a̱ tyo a zagbain a̱tsuma̱ e le,

za suru a̱tsuma̱ e le

a ta yuwusan utsa̱n u na

wa̱a̱ tsura̱ uda̱shiwu wa̱ a̱bunda̱.

Hali fo na ama̱sula̱ na̱ nan ganu,

suru nle a ta yuwusan ulambu wa̱ a̱ɓula̱.

14 O tsu co'wo ta̱ antsu ama a̱ va̱

she damma ili i ro i ɗa shi.

Adansa, nden ma asuvu,

nden ma asuvu,

agba a̱ yi ɗa nda

babu nden ma asuvu.>>✝

15 <<A ta uwwusa wono

wi ili yi idaba i na a yuwain?

O'o, a̱ ri na̱ wono shi ko ke'en,

agba e reve cine

a̱ ka̱ɗa̱to urewesu shi.

Adama o ndolo a̱ ta̱ riya̱

oɓolo na aza a na a̱ a̱risa̱,

a̱ ta̱ ka̱ɗa̱to le

a mantsa ma na n ca nle oforo,>>

ne ɗa A̱sulazuva a dammai.

16 <<Apa ili i na A̱sulazuva a dammai,

isawain a nsanji mu ure i ka̱lyuwa̱,

ye ece a te ɗa akuci o ure,

ye ece a te ɗa ure u sa'ani,

a̱vu i kuru yi.

Tsura̱ i tsura̱a̱ wuma u ɗu wivuwun.

Amma a̱vu i damma,

<Tsa̱a̱ kuru pe shi.>

17 N zuwaa ɗu ta̱ eze e ipiri, a adansa,

<Poloi atsuvu e mesun ma aavana!>

Amma a̱vu i damma,

<Tsa uwwa shi.>

18 Adama o ndolo uwwai, a̱ɗu nɗa,

waru i reve, a̱ɗu esu a ama,

ili i na yaa fara ne le.

19 Uwwa, a̱vu uvaɗi!

N ta̱ ta̱wa̱ na addama

a aci a ama a nda,

o una̱ wu linga le,

adama a na o poloo adanshi a̱ va̱ atsuvu shi,

reve a 'yuwan wila̱ u va̱.>>

20 <<E te ɗa urana u na a̱ ta̱wa̱a̱ mu

na̱ furenkisen diga a Sheba,

ko a̱ ta̱wa̱ na̱ erike

diga e iɗa ya alanga?

Kucci vu ukula̱tosu ɗu

ili i na ma̱a̱ usu ɗa shi,

waru kucci ɗu

a tawa mu esu shi.>>

21 Adama o ndolo apa ili i na

A̱sulazuva a dammai,

<<N ta zuwa ili yu uta̱ɗa̱tsa̱sa̱

elime ama a nda.

Dada na̱ muwun mo olobo ma̱ yi,

n ta̱ ta̱ɗa̱tsa̱ va̱ni le,

moron ma̱ nden ni i'utsa̱ ya̱ yi,

a̱ ta̱ kuwa̱ oɓolo!>>

22 Apa ili i na A̱sulazuva a dammai,

<<Ka̱lyuwa̱, a̱soja a̱ ta̱ lo a̱ ta̱wa̱

diga upasu wu ugana,

a̱ ta̱ 'ya̱sa̱n nɗa mu ucira

diga o ukosu wu uvaɗi.

23 A̱ tu uɓa̱nu nu ujin ni ibata,

ama a vama a ɗa

e tse ene iliyali shi,

ma̱gugwa̱ me le ma̱ ta̱

tsa̱ ma̱gugwa̱ ma mala,

mantsa ma na a̱ ri

a mmalu zuva vi ido i le,

a̱ tsu ta̱wa̱ ta̱ ugeru she damma

aza a na a darai

adama o uvon,

a̱ riya̱a̱ wu,

a̱vu Urishelima!>>

24 <<Tsu uwwa ta̱ adama a ɗa e le,

reve ekere a̱ tsu a̱ kuwa̱.

A̱tsuma̱lima̱ a cina tsu ta̱,

mɓa̱la̱ tsa ka na ri e teri.

25 She yu uta̱ a̱ 'ya̱wa̱ o uɗuma̱ wan,

ko i wala e re wan,

adama a na ma'yuwatan ma̱ ta̱

na̱ mutsun me pe'eni,

waru wovon u ta̱ lo uba̱ta̱ biti.

26 A̱ɗu ama a̱ va̱,

otoyi akashamuna

reve i bunda̱la̱ okomo,

i yuwan a̱tsumola̱ngu wu usuɗuwu,

she damma za na lambai

mawun mo ulobo ma̱ ta̱ ma̱ yi,

adama a na babu urevu

za vu ukototosu ta̱ ta̱wa̱ a aci a̱ ɗu.>>

27 Amma a̱vu Irimiya,

<<N zuwa wu ta̱

za na o rito wi irumu

a̱tsuma̱ ama a̱ va̱,

adama vu reve

waru vu kurato le.

28 Suru n le aza aciyogbamu a ɗa,

nu u'ya̱susa̱n wa a aci,

a gara a bazasa

adanshi e ke'en ke'en.

A̱ le irumushili i ɗa,

suru nle a̱za̱ o ulambu

wa̱ a̱ɓula̱ a ɗa.

29 A̱ fa̱la̱ ta̱ elentsu akina nu ucira

tsura̱ wu jeruweto rumu.

Amma wujeruwetosu'u suru

ili ye pere i ɗa,

o uta̱ aza a awuya shi.

30 A̱ ta̱ ɗesu le azurufa ve pere,

adama a na A̱sulazuva a 'yuwan nle.>>