1 A̱mu ɗa vuma na e enei a̱tsuma̱lima̱

a aaɗanga o upan wa̱ yi.

2 U gba̱ra̱ mu ta̱ a̱vu u zuwa mu mmalu

a̱tsuma̱ e irumbu o una we ekan.

3 Amayun u vadala ta̱ ukere wa̱ yi aci a̱ va̱

a̱a̱ ga̱la̱sa̱ mu kuci a̱liva̱.

4 U zuwa ta̱ ukwan u lipu u va̱

ni inama i lipu i va̱ a̱ la̱nga̱,

a̱vu wu kuɗa etele a̱ va̱.

5 U ka̱nda̱ruwa̱ mu ta̱ a̱vu u ɓa̱ru mu

no okono na̱ a̱tsuma̱lima̱ lon.

6 U zuwa mu ta̱ n da̱nu a̱tsuma̱ e irumbu,

tsa aza a na a̱ kuwa̱i ɗe nu ujumu.

7 U ka̱nda̱ruwa̱ mu ta̱ nu uɓaɓu adama n la'a wan,

wu nla̱ mu ta̱ na akani o ume.

8 Ko na n ri e mesun me izami yi ikambishi,

u ula ta̱ atsuvu a avasa a̱ va̱.

9 U geshe ta̱ ure u va̱ ni iponu ya atali,

a̱vu u zuwa ure u va̱ wo o'wo ugondoru ugondoru.

10 U vawan mu ta̱ tsa biya,

tsa kamu e ipiri uvawun.

11 U rono mu ta̱ diga o ure,

reve wu kara mu muyejin muyejin,

a̱vu u lyawa mu nde'en babu ikambishi.

12 U rono ta̱ utan wa̱ yi,

reve wo o'woto mu ili i na waa tawan.

13 U tawan ta̱ okolo a̱ va̱

na aya o ujin a̱ yi.

14 Mo o'wo ta̱ ili yi izo'oshi e ekere a ama a̱ va̱ suru,

a ta yuwusaan mu ulamu a̱tsuma̱ e ishipa a̱liva̱.

15 U shiton mu ta̱ na̱ mini mo okono

a̱vu u cuwa̱ton mu ni ili yo okono.

16 Wu kuɗa ta̱ anga a̱ va̱ na atali,

a̱vu u zuwa mu igandalu a̱tsuma̱ a̱ ma̱buta̱.

17 A putsaa mu ta̱ na asuvu nden,

mi icina ta̱ ni ili i na a̱ tsu ɗe ulyuwu we elime.

18 Ɗaɗa n salai, <<Tsugbain tsa̱ va̱ tso koto ta̱!

Ne ɗa waru ili i na n zuwai okolo uba̱ta̱ wa̱ A̱sulazuva.>>

19 N ta majiyan ma̱ a̱tsuma̱lima̱ ma̱ va̱

nu ulambu wu nda̱na̱ta̱ n va̱,

ili yo okono i ɗa na̱ tsukono.

20 N ta cuwusan ne ele kuci,

waru asuvu a̱ va̱ a kuɗa ta̱.

21 Agba n ta cuwusan ni ili i nda,

adama o ndolo n ta̱ nu uzuwu wo okolo.

22 Adama e icigi ya̱ A̱sulazuva i na i tsu vadala shi

o soɗu tsu shi,

adama a na isa'ani ya̱ yi i ri na̱ a̱tyo shi.

23 Usa'avu u ɗa a̱ ri usana biti,

a̱ɓula̱ a̱ wu a̱ ta̱ a̱bunda̱.

24 Reve n damma aciya̱va̱, <<A̱sulazuva a ɗa akunda a̱ va̱,

adama o ndolo n ta zuwa okolo ya̱'a̱ yi.>>

25 A̱sulazuva a̱ ta̱ ni isa'ani a̱ tyo e ekere

a aza a na a zuwai okolo ya̱'a̱ yi,

uba̱ta̱ wu za na a zama yi.

26 U tu ulobonu vuma piri kuci kuci

we ene iwawi ya̱ A̱sulazuva.

27 U tu ulobonu vuma kaɓa asuvu

na̱ a̱a̱gba̱la̱ o ume a̱yi a̱tsuma̱ tsulolobo tsa̱ yi.

28 Lyawa u da̱nu kpaku,

a mantsa ma na A̱sulazuva a̱ kuruwa̱a̱ niyi a̱yi.

29 Lyawa u kpa̱to urewesu wa̱ yi a̱ ma̱buta̱,

u ta gura o'wo uzuwu wo okolo u ta̱wa̱.

30 Lyawa u ca za na aa ɓasa yi ugbaguzu,

lyawa u shiwan no oso o wono.

31 Adama a na Zagbain

tsu vari vuma suru suru shi.

32 Ko na̱ shi u ta̱wa̱a̱ na̱ a̱tsumola̱ngu u tse ene ta̱ iliyali,

adama e icigi ya̱ a̱bunda̱ ya̱ yi i na i tsu vadala shi.

33 Adama a na u tsu ta̱wa̱a̱ ama na̱ a̱tsuma̱lima̱

ko a̱tsumola̱ngu nu ucigu wa̱ yi shi.

34 Nna a minjira aza a na a̱ ri

o u'wa wa ali suru na ana e iɗa,

35 nna a putsaa vuma ili i na i ri za va̱ yi

a̱ ma̱ka̱ka̱n mo Mogono ma̱ A̱sula̱,

36 nna a putsaa vuma nu uge'etosu wa amayun,

A̱sulazuva a̱ ta̱ usu ili ya̱ ndolo?

37 Zane ɗa aa yuwan adanshi a̱vu ili'i i fara

nna̱ A̱sulazuva a ɗa a zuwai shi?

38 Ashe diga o una̱ u Mogono ma̱ A̱sula̱ a ɗa

iwuya ni isa'ani i tsu uta̱ shi?

39 To, nye i zuwai vuma na ri wuma aa yuwan adanshawuya

a mantsa ma na a ca niyi oforo adama a̱ nusu va̱ yi?

40 Lyawai tsu ritoi a̱vu tsu ka̱lyuwa̱i re tsu,

a̱vu tsu ka̱mba̱i uba̱ta̱ wa̱ A̱sulazuva.

41 Lyawai tsu ca yi okolo a̱ tsu, tsu 'ya̱sa̱in ekere a̱ tsu

a̱ tyo uba̱ta̱ wa̱ A̱sula̱ a zuva tsu dammai,

42 <<Tsu yuwain ta̱ unusu a̱vu tsu 'ya̱sa̱n aci,

a̱vu gba vu yuwaan tsu gafura shi.

43 <<Vu pala ta̱ aciya̱wu nu upan a̱vu vu saɓa tsu,

o unusa babu ene iliyali.

44 Vu pala ta̱ aciya̱wu ne eleshe

adama avasa a̱ tsu a rawa uba̱ta̱ wa̱ wu wan.

45 Vo o'woto tsu ta̱ everi ne edemu

a̱tsuma̱ a nɗa.

46 <<N'yuwatan n tsu suru m kpa̱tu'wa̱ ta̱ na̱ le

a yuwusan adanshi a aci a̱ tsu.

47 Tsu shiwan ta̱ na̱ wovon na̱ maza

nu ulungusu nu ukototosu.>>

48 Aɓara e te yeneshe diga e esu a̱ va̱ tsa̱ mini mo ɗolu

adama o ukototosu wa ama a̱ va̱.

49 Aɓara a̱ va̱ a̱ ta̱ da̱na̱ e meyene

babu kasa, babu wivuwun,

50 hali she na̱ A̱sulazuva

a̱ ka̱lyuwa̱ diga zuva we ene.

51 Ili i na me enei u zuwa mu ta̱ a̱tsumola̱ngu

adama a̱ a̱tsuma̱lima̱ a na a cinai esheli a̱ lyuci va̱.

52 Aza a na a 'yuwan numu babu ufaru,

a̱ ta̱ tsuten tsa̱ va̱ tsa manunu.

53 A vari mu ta̱ a̱tsuma̱ a̱ a̱a̱ka̱ri

a̱vu a vara mu na atali,

54 mini mo soɗu ta̱ aci a̱ va̱,

reve me ene gashi za va̱ koto ta̱.

55 A̱sulazuva, n ɗe ta̱ ala a̱ wu,

diga a̱ a̱ru'un a̱ a̱a̱ka̱ri.

56 Vu uwwa ta̱ ipati i va̱, <<She vu ula atsuvu a̱ wu

e mesun ma̱ va̱ me izami yi ikambishi wan!>>

57 Vu rawa ta̱ zuzu a mantsa ma na n ɗe nuwu,

a̱vu vu damma mu, <<She vu uwwa wovon wan.>>

58 Zagbain vu tara ta̱ addama a̱ va̱,

vu tsupaa ta̱ wuma u va̱.

59 A̱sulazuva, ve ene ta̱ unusu u na a yuwaan numu.

Vu ge'eto aza a na a̱ ta̱wa̱a̱ numu na addama.

60 Ve ene ta̱ atsupu e le suru,

ni ifoɓi i le a aci a̱ va̱ suru.

61 A̱sulazuva, vu uwwa ta̱ wisulusa u le,

ni ifoɓi i le suru a aci a̱ va̱.

62 N'yuwatan n va̱ n te yemenu

na̱ majiyan a aci a̱ va̱ a̱liva̱.

63 Ka̱lyuwa̱ le! Nden ko mishin,

a ta yuwusaan mu avandaru a̱tsuma̱ a ishipa i le.

64 A̱sulazuva, tsupa le ili i na yintsayi

adama e ili i na a yuwain.

65 Vu zuwa le o'wo okolo ukwa̱,

lyawa una̱ wa̱ wu u reme le.

66 A̱sulazuva, saɓa le a̱tsuma̱ o upan wa̱ wu

vu kototo le za̱la̱ va zuva va̱ wu.