1 A̱tsuma̱ a aa'wan mata'atsu, o woto wa̱ na̱shi, o urana wa tawun u woto'o, a̱mu oɓolo na aza a Yahuda a na a̱ pura̱i zuzu nu Uɗolu wa Keba, a̱ kpa̱tu'wa̱ ta̱ zuva. Reve me ene alavu alavu a̱ A̱sula̱. 2 O urana wa tawun u woto'o, u na u shi aa'wan a tawun o upuru u Mogono Jehoyacin, 3 adanshi a̱ A̱sulazuva a̱ ta̱wa̱ ta̱ ya Izike ganu, ulobo wa Buzi, zuzu nu Uɗolu wa Keba a̱tsuma̱ e iɗa ya aza a Babila. Ukere wa̱ A̱sulazuva u shi ta̱ a aci a̱ yi. 4 Ana n ka̱lyuwa̱i reve me ene wunla̱ wu upepu o uta̱ diga ugana, ne eleshe a gbain ni imaɗatsu e ikanasa uka̱nda̱ruwu ne ekan. Memere ma akina'a u rotso ta̱ rumu madala na o gboroi. 5 E memere ma akina'a ili i ro oroci e ili i wuma i na̱shi i da̱na̱ ta̱ pe. Oroci e le o rotso ta̱ vaɗilima̱. 6 Amma koyan ɗa a̱tsuma̱ e le u ta̱ nu urewesu na̱shi ne evelu a̱ na̱shi. 7 Ana e le wuba̱ruwu, apata a ana e le tso okotsu a̱ ma̱dindim, waru a madala tsa̱ rumushili na o gboroi. 8 Za̱la̱ ve evelu e le e eɓele a̱ na̱shi e le a̱ da̱na̱ ta̱ ne ekere a vuma. Ma̱na̱shi ma̱ le suru a̱ da̱na̱ ta̱ nu urewesu ne evelu. 9 Evelu e le a̱ ji'wunla̱i ta̱. A mantsa ma na aa wala za suru tsu wala ta̱ mejege, a tsu vadala ele a mmalu shi. 10 Za suru ta̱ nu urewesu u vuma elime. Za suru a̱tsuma̱ a̱ a̱za̱ a̱ na̱shi'i u ta̱ nu urewesu wu kamu upasu wu usa'ani, o upasu wu ugula̱ waru urewesu wo oogono a nan, waru koyan ta̱ nu urewesu wa̱ a̱a̱kuru. 11 Ne ɗa urewesu u le u da̱na̱i. Evelu e le waru a baza ta̱ a gawan zuva. Za ta̱ biti ta̱ ne evelu e re za ta̱ biti uju'wun nu uvelu wu za va̱ yi. Evelu e re waru a̱ ɓa̱ru lipu va̱ yi. 12 Reve koyan ɗa reme mmalu elime. Uba̱ta̱ u na ruhu saɓai biti, ɗe ɗa a tsu saɓa, a mmalu babu vadala. 13 Ili i wuma'a o rotso ta̱ akinkana a akina a madala, ko tsa akata a akina, a̱ 'ya̱wusa̱ na̱ a̱ ka̱mbi e memere me ili i wuma'a. Akina'a a̱ shi ta̱ ne ekan lon, ni imaɗatsu o utusa̱ pe. 14 Ili i wuma'a e ilaɗi a̱ 'ya̱wusa̱ na̱ a̱ ka̱mbi tsi imaɗatsu. 15 Ana n ka̱lyuwa̱i ili i wuma'a, me ene ta̱ a̱a̱ga̱nda̱mu e iɗa zuzu ni ili i wuma'a, za ta̱ biti adama e ili i wuma i ta̱ i na i ri nu urewesu na̱shi.✝ 16 Apa nda cine a̱a̱ga̱nda̱mu'u nu uruma wa̱ yi u rotsoi, e te ikanasa tsa aatali a berili. Agba suru ma̱na̱shi me le o rotsuloi ta̱. Uruma wu za suru she damma a̱a̱ga̱nda̱mu a ɗa a̱tsuma̱ a̱ a̱a̱ga̱nda̱mu upalu. 17 Na aa wala a tsu saɓa ta̱ upasu u ta̱ a̱tsuma̱ a pasu na̱shi na a saɓai, agba a tsu vadala shi ele a mmalu. 18 Nshingi ma̱ a̱ga̱nda̱mu'u a̱ shi ta̱ uga'an waru wovon. Waru ana e le'e a̱ shi ta̱ tapu ne esu a̱ ka̱nda̱ruwa̱. 19 A mantsa ma na ili i wuma i ndolo i jinga̱ɗa̱i suru, a̱vu fo a̱ga̱nda̱mu a̱ nge'e'en a̱ jinga̱ɗa̱ oɓolo ne ele. Waru a mantsa ma na suru ili i wuma'a a̱ 'yoyin diga e iɗa, a̱vu a̱ga̱nda̱mu'u fo a̱ 'yon. 20 Uba̱ta̱ u na suru ruhu'u u cigai u 'ya̱wa̱, ɗe ɗa a̱ tsu 'ya̱wa̱, a̱vu a̱ga̱nda̱mu'u a̱ 'yon oɓolo ne ele. Adama a na ruhu vi ili i wuma'a u ta̱ pe a̱ a̱ga̱nda̱mu'u. 21 A mantsa ma na a̱ jinga̱ɗa̱i suru, ele fo a̱vu a̱ jinga̱ɗa̱, ne e isawan, ele fo a̱vu e isawan. Waru ni ili i wuma'a a 'yawan diga e iɗa, reve a̱ga̱nda̱mu'u fo a 'yawan ne ele. Adama a na ruhu vi ili i wuma'a u ta̱ pe a̱ a̱ga̱nda̱mu'u. 22 Ili i ro i da̱na̱ ta̱ zuva va aci vi ili i wuma'a wuba̱ruwu, e ikanasa tsa̱ ma̱dubi, ili i wovon. 23 Za̱la̱ vi ili'i evelu e le a̱ da̱na̱ ta̱ wuba̱ruwu uvelu suru u ju'wa̱n ta̱ za va̱ yi. Ili i wuma suru u da̱na̱ ta̱ ne evelu e re a na a palai lipu va̱ yi. 24 Reve a mantsa ma na a̱ ri a mmalu, mu uwwa mesun me evelu e le tse mesun ma̱ mini ma̱ ma̱gugwa̱, tsu uɗyo u Mogono me Ili Suru, tso yorori tso oɓolo a̱ a̱soja. Ana e isawain a̱vu o voton evelu e le. 25 Reve uɗyo wu uta̱ diga zuva vi ili i na i ri zuva va aci e le'e. Ana e isawain a̱vu o voton evelu e le. 26 Zuva vi ikpa̱ta̱tsu i na i ri zuva va aci e le'e oroci o ootogu o tsugono tsa̱ shi ta̱ ɗe, ni ili i na i rotsoi vaɗilima̱ nden zuva vi ili i na i rotsoi ootogu o tsugono'o. 27 Reve me ene diga e ikyun ya̱ yi a gawan zuva e ikanasa tsa̱ rumu na o gboroi, tsa akina a̱ ka̱nda̱ruwa̱. Diga lo waru a̱ cipa̱ za̱la̱ u rotso ta̱ akina, ne ekan e ikanasa a̱ ka̱nda̱ruwa̱ yi. 28 Cine vu revei kambu tsu uta̱ e eleshe a mantsa me iro'i, ne ɗa ekan a na a̱ ri uka̱nda̱ruwu na̱ a̱yi a̱ ri. A̱yi nda a̱yi ɗa wutu wo oroci a tsugbain tsa̱ A̱sulazuva. Reve ana me ene niyi, n riya̱ ma̱kpa̱ɓa̱, a̱vu mu uwwa uɗyo wu za na ri a adanshi'i.