1 <<A̱vu vu 'ya̱sa̱n ishipa yu ukwa̱ a aci azagbain a Isra'ila. 2 Vu damma le, <Ili i ne i ɗa mma va̱ wu? Ka vu kamu ɗa! A̱tsuma̱ e ikamu u tsu von ta̱ tsa̱ra̱ u kungwato muwun ma̱ yi. 3 U kungwato ta̱ mawun ma̱ ta̱ ma̱ yi, a̱vu wo o'wo kamu vu ucira. U rito ta̱ cine waa yuwan ugenge na̱ wukaru wi inama i ro. Reve waru u tama ama. 4 Reve nɗa mu uwwa aɗa a̱ yi, a̱vu e reme yi a̱tsuma̱ a̱ a̱ka̱ri e le. A̱vu o rono yi na̱ igon a̱ tyo e iɗa ya Masar.> >> 5 <<Ana we enei ili i na waa zuwusaa okolo wo o'woi ili ye pere, ɗaɗa gba wu uta̱yi okolo. A̱vu u tarisa mawun mo ro u ka̱mba̱to yi wo o'wo kamu vu ucira. 6 U da̱na̱ ta̱ e igaru a̱tsuma̱ e ikamu, adama a na gogo wo o'wo ta̱ kamu vu ucira. U rito ta̱ ugenge na̱ wukaru wi inama i ro, a̱vu u tama ama. 7 U lungusa̱ uba̱ta̱ u na a pa'asan, a̱vu u ka̱mba̱to ilyuci i le ofoli. Iɗa'a na ama a̱ yi suru a uwwa ta̱ wovon ana a uwwai ma̱gugwa̱ ma̱ yi. 8 A̱vu nɗa n riya̱a̱ yi nu uvon, uba̱ta̱ suru a nɗa n na n ri lo uka̱nda̱ruwu, a̱vu a azuwa yi igolo, ɗaɗa gba e reme niyi a̱ a̱ka̱ri e le. 9 Ni igon i ɗa o rono niyi, a̱vu a zuwa yi a̱ keji.* A̱vu a tara yi a̱ 'ya̱wa̱ uba̱ta̱ u mogono ma Babila. Reve a zuwa yi tsugbashi, adama tsa̱ra̱ a̱ da̱shi uwwa ma̱gugwa̱ ma̱ yi a masasan ma Isra'ila wan.

10 <<Mma va̱ wu rotso ta̱ ataci a̱ ina̱bi a na a̱ shuwa̱i zuzu na̱ mini. U matsan ta̱ muwun ne eten a̱ a̱bunda̱ adama a̱bunda̱ a̱ mini. 11 Eten a̱ yi a̱ tu ugbamu, a̱ tu ugbamu u na a ntsayi o o'wo aɗanga o mogono. Uga'an wa̱ yi u la'a ta̱ akapi a ɗanga na buwai. A tsu gura ta̱ ene yi adama o uga'an wa̱ yi na a̱bunda̱ e ete a̱ yi diga alanga. 12 Amma reve a̱ mula̱ yi a̱tsuma̱ o upan a̱vu a vari yi e iɗa. Reve upepu wa asana u 'yeweto muwun ma̱ yi, o oro ta̱ reve u kpanla. Eten o ugbamu waru e 'yewe, ɗaɗa akina a̱ kula̱to niyi. 13 Gogo a̱ shuwa̱ yi ta̱ a̱tsumona, a̱tsumona u na a̱ ri na̱ mini shi za na cigai mini. 14 A̱vu akina o uta̱ e eten a̱ yi a̱vu u kula̱to muwun ma̱ yi. Gogo a buwa a̱ tsura̱ eten o ucira shi, babu waru eten a na ntsayi wo o'wo aɗanga o mogono. A̱yi nda a̱yi ɗa mesun ma̱ a̱tsumola̱ngu, waru wo o'wo ta̱ mesun ma̱ a̱tsumola̱ngu.>>