1 <<Apa ili i na A̱sulazuva Zagbain dammai, A̱ ta̱ ɓa̱ru una̱ntsu wu ukowo wa̱ a̱tsuma̱ u na wa̱ ka̱nla̱sa̱ asana a̱tsuma̱ a rana ta̱li vu ulinga, amma o urana wa Ashibi na̱ a̱buki o woto sa'avu a ta lyawa yi ukpa̱tu'u. 2 Zagbain ta uwa o u'uwata wu ukobu diga a alanga. A̱vu wi isawan zuzu na akpata o una̱ntsu. Ganu ta ca kucci vu ukula̱tosu na̱ kucci vu ulapulu wu nden. U ta̱ ka̱ɗa̱to u yuwan a̱ga̱nda̱ o una̱ntsu reve wu uta̱ nu ure u na u ta̱wa̱yi. Agba a̱ kpa̱to una̱ntsu'u hali she ulivu. 3 Ama e iɗa'a a̱ ta̱ ka̱ɗa̱to o u'uwata wu una̱ntsu'u a̱ ma̱ka̱ka̱n ma̱ A̱sulazuva o urana wa Ashibi na̱ a̱buki o woto sa'avu. 4 Kucci vu ukula̱tosu na zagbain aa ca a̱ tyo uba̱ta̱ wa̱ A̱sulazuva o urana wa Ashibi o to o'wo mugiri n ta̱li na̱ a̱a̱giri'i a na a̱ ri na alana shi. 5 Ishina i na a ca kucci oɓolo na̱ a̱a̱giri'i u to o'wo efa, waru ishina i na aa ca kucci oɓolo na̱ mugiri'i u ta̱ da̱na̱ a̱bunda̱ cine u cigai, waru u ta ca hin ta̱ mani'in adama a̱ efa suru. 6 O urana wa̱ a̱buki o woto sa'avu u ta ca moggono ma nan, mugiri'i n ta̱li oɓolo na̱ a̱a̱giri, suru nle a̱ da̱na̱ na lana wan. 7 U ta̱ ta̱wa̱a̱ na̱ kucci vi ishina efa ta̱ oɓolo no oogono, efa ta̱ na̱ a̱a̱giri'i, oɓolo na̱ mugiri'i cine okolo a cigai u ca biti, oɓolo na̱ hin mani'in suru za na̱ efa. 8 Mantsa ma na zagbain uwai, u ta uwa nu ukobu o una̱ntsu'u, nu una̱ntsu u ndolo wa̱a̱ kuru na̱ wa̱a̱ uta̱.

9 <<Mantsa ma na ama e iɗa'a a̱ ta̱wa̱i a̱ ma̱ka̱ka̱n ma̱ A̱sulazuva a mantsa ma na a zuwai, za na uwai u yuwan a̱ga̱nda̱ nu una̱ntsu wu ugana u ta̱ uta̱ nu una̱ntsu wu uyagi, waru za na uwai nu una̱ntsu wu uyagi u ta̱ uta̱ nu una̱ntsu wu ugana. She vuma ro uta̱ nu una̱ntsu u na u uwayi wan, amma wu uta̱ nu una̱ntsu u ro ko'o. 10 Zagbai'in u da̱na̱ oɓolo ne ele mantsa ma na aa uwa. Mantsa ma na waru o uta̱ a̱yi fo wu uta̱ oɓolo ne ele.

11 <<A mantsa ma̱ a̱buki na mantsa ma na a zuwai, kucci vi ishina to o'wo efa oɓolo no oogono a nan, efa oɓolo na̱ a̱a̱giri'i, oɓolo na̱ mugiri'i cine okolo a cigai u ca, oɓolo na̱ hin mani'in adama a̱ efa suru. 12 Mantsa ma na zagbain cayi kucci vu ucigu wo okolo a̱ yi uba̱ta̱ wa̱ A̱sulazuva, wo o'wo ko kucci vu ukula̱tosu ɗa ko kucci vu ulapulu wu nden u ɗa, una̱ntsu u na wa̱a̱ ka̱nla̱sa̱ asana u da̱na̱ ukpa̱tu'u adama a̱ yi. U ca kucci vu ukula̱tosu ko kucci vu ulapulu wu nden cine u tsu yuwan urana wa Ashibi. A̱vu wu uta̱, na̱ wu uta̱ reve a̱ kpa̱to una̱ntsu'u.

13 <<Urana suru vu ta zami ma̱giri'i ma na ma̱ ri aa'wan a̱ ta̱ ma na ma ri na alana shi adama a̱ kucci vu ukula̱tosu uba̱ta̱ wa̱ A̱sulazuva, usana suru ɗa va̱a̱ ta̱wa̱ na̱ a̱yi. 14 Vu ta zami ishina adama a̱ kucci vi ishina oɓolo na̱ ma̱giri'i usana suru, akunda a̱ ta̱ a̱tsuma̱ a akunda a̱ ta̱li a̱ efa, oɓolo waru na̱ hin ta̱ mani'in ma̱ zetun adama a lapa yira yi ishina'a oɓolo na̱ a̱yi, a̱yi ɗa kucci vi ishina a̱ tyo uba̱ta̱ wa̱ A̱sulazuva. A̱yi ɗa wo o'woi ili i na a̱a̱ da̱na̱ a̱ kurusu mantsa suru. 15 Adama o ndolo a̱a̱ ta̱wa̱a̱ na̱ ma̱giri'i oɓolo na̱ mani'in usana suru adama a̱ kucci vu ukula̱tosu usana suru.

16 <<Apa ili i na A̱sulazuva Zagbain dammai, na̱ zagbain yuwaan za ro uneꞌe a̱tsuma̱ a agadu a̱ yi, u to o'wo za vu ugundo wa̱ yi, u to o'wo itana i le za va agadu. 17 Amma nu u ne'e gba a̱tsuma̱ a agbashi a̱ yi a̱tsuma̱ a agadu a̱ yi, aagbashi'i u ta gura zuwa yi hali urana u na wo o'woi fa̱a̱n. A mantsa mo ndolo iɗa'a i ta̱ ka̱mba̱ uba̱ta̱ wu zagbai'in. Amma na̱ zagbain ca muwun ma̱ yi uneꞌe, ne'e ndolo o o'wo ta̱ a̱za̱ a̱ muwun ma̱ yi hali hali. 18 She zagbain u usa akunda a agadu ozo o ro wan, o losu le a 'wa le. U ca muwun ma̱ yi agadu e le a̱tsuma̱ e itana ya̱ yi, tsa̱ra̱ ko vuma ta̱ va̱ a kasa yi ni itana ya̱ yi shi.>>

19 A̱tsuma̱ alavu alavu a̱ va̱, a̱vu vuma'a u toni na̱ a̱mu o ure u na wa̱a̱ ka̱nla̱sa̱ ugana, uba̱ta̱ u na asula a̱ ri ugeru u na a tawai adama a nan ganu, a̱ ta̱ ka̱nla̱sa̱ ugana. Ne ɗa me enei uba̱ta̱ u ro o utyo wa̱ a̱livu na asula. 20 Reve u damma mu, <<Apa uba̱ta̱ u na nan ganu a su'wan kucci vu unusu oɓolo na̱ kucci vu unusu, reve a kangala kucci vi ishina, tsa̱ ta̱ a̱ ta̱wa̱ ne ele a̱tsuma̱ o ukowo wa alanga wan, tsa̱ra̱ ama'a o o'wo na akiza wan.>>

21 Ɗaɗa u 'ya̱wa̱to numu o ukowo wa alanga, reve u toni na̱ a̱mu a̱ tyo obolu a̱ na̱shi vu uba̱ta̱'a̱. O obolo suru mokowo ma̱ da̱na̱ ta̱ lo. 22 O mokowo suru u da̱na̱ ta̱ udasuwu kupocindere, washin waru udasuwu kupoton no ozo o ton na akapi. Mokowo suru obolu a̱ na̱shi a ɗa yi, mgbain waru ili i ta̱ i ɗa le. 23 A̱tsuma̱ o mukowo n na̱shi ndolo, o ta̱ lo na atali ugeru u na a suwai. Reve waru a suwa elele o ugundo wu ugeru wa atali'i. 24 Reve u damma mu, <<Ele nda ele ɗa arungutsu uba̱ta̱ u na aza a na a yuwusan ulinga a̱tsuma̱ a̱ A̱a̱'isamapaɗa aa su'wan kucci na ama a̱a̱ ta̱wusa̱a̱.>>