1 <<Mawun ma vuma, yuwan adanshi e ikaka ya̱ A̱sula̱ a aci a nsasan ma Isra'ila, vu damma, <A̱ɗu nsasan ma Isra'ila uwwai ili i na A̱sulazuva a dammai. 2 Apa ili i na A̱sulazuva Zagbain dammai, n'yuwatan n ɗu n damma ta̱ adama a̱ ɗu a na, <<Mm! Nsasan mu ufaru mo o'wo ta̱ za tsu.>> > 3 Vu yuwan adanshi e ikaka ya̱ A̱sula̱ a aci e le vu damma, <Apa ili i na A̱sulazuva Zagbain dammai, adama a na a̱ ka̱mbuwa̱ nuwu okongo, a̱vu a̱ rukutsa̱ ɗu e re suru adama yo o'wo akunda yi iɗa i ro. Waru yo o'o ta̱ ili yu ulamu ni ili i na aa yuwaan udamu usa'ani shi a̱tsuma̱ a ama. 4 Adama o ndolo, nsasan ma Isra'ila, uwwai adanshi A̱sulazuva Zagbain. Apa ili i na A̱sulazuva aa dansaa nsasan na agaɗi na̱ muɗolu na̱ ɓaa no okongo ni iɗa ye pere ni ilyuci i na a suma a lyawai i na a̱ pura̱i ni ili yu ulamu e ekere a akapi a nɗa suru a na a̱ ri uka̱nda̱ruwu na̱ a̱ɗu. 5 Apa ili i na A̱sulazuva Zagbain dammai, a̱tsuma̱ o upan wa̱ a̱bunda̱ a̱ va̱ a ɗa n yuwain adanshi a aci a akapi a nɗa, na a aci e iɗa ya Edom waru, adama a na na̱ ma̱za̱nga̱ ma ɗa ni ikpa'a o okolo e le a̱ ka̱mba̱toi iɗa i va̱ itana i le. Adama a̱ pura̱ uba̱ta̱ wa alyuna wa̱ yi.> 6 Adama o ndolo, vu yuwan adanshi e ikaka ya̱ A̱sula̱ a aci e iɗa ya Isra'ila. Vu damma nsasan na agaɗi, na̱ muɗolu na̱ ka̱ri, <Apa ili na A̱sulazuva Zagbain dammai, n ta yuwusan adanshi a̱tsuma̱ a̱ tsushu'un o upan lon adama a na i sowo ta̱ wisulusa e ekere a nɗa na̱ a̱bunda̱. 7 Adama o ndolo apa ili i na A̱sulazuva a dammai: N kucina ta̱ nu ukere u'ya̱sun, nɗa n na n ri uka̱nda̱ruwu na̱ a̱ɗu suru o to sowo fo wisulusa.

8 << <Amma a̱ɗu nsasan ma Isra'ila, i ta̱ yuwan eten reve i matsan muwun adama a ama a̱ va̱ Isra'ila, adama a na a jima shi a̱ ta̱ ka̱mba̱ o u'wa. 9 Uwwai nda, n ta̱ aɗa a̱ ɗu, n ta̱ ka̱lyuwa̱ ɗu ni isa'ani, a ta luma iɗa i ɗu reve n cu'wa̱n ili yu una i ɗu. 10 N ta zuwa u'wa wa Isra'ila u da̱shi a̱bunda̱. Waru n ta zuwa ilyuci i shiwan na ama hali a suwisa ba̱ta̱ na vo o'woi okongo. 11 N ta zuwa ama ni iliyamunga i ɗu a̱ da̱shi a̱bunda̱ lon. N ta̱ gba a zuwa ɗu i da̱nu pe cine i shi pe, reve n roco ɗu isa'ani i na i la'ai yu ufaru. Ne ɗa yee reve a na a̱mu ɗa A̱sulazuva. 12 N ta zuwa ama, ama a̱ va̱ ama a Isra'ila a wala a̱ lipu ɗu. I to o'wo itana i le, reve yo o'wo itana ya agadu i le. I buwa a̱ da̱shi zuwa a lamba muwun n le shi.

13 << <Apa ili i na A̱sulazuva Zagbain dammai, adama a na ama a n nɗa n ro a damma ɗu ta̱, <<I tama ta̱ ama reve i zuwa le a lamba muwun n le.>> 14 Amma i buwa a̱ da̱shi tama ama shi. Waru ya̱a̱ da̱shi zuwa iɗa i ɗu i lamba muwun ma̱ yi shi. A̱sulazuva Zagbain ɗa dammai ne. 15 Ma̱a̱ da̱shi lyawa ɗu yo o'wo ili i wisulusa e ekere a ama a nɗa n ro shi. Waru ma̱a̱ da̱shi lyawa ama e iɗa i ro a̱ kuɗa̱ tara ɗu ili i ro shi. Ya̱a̱ da̱shi o'wo ili yu ta̱ɗa̱tsa̱sa̱ e ekere a ama a̱ va̱ shi. A̱sulazuva Zagbain ɗa dammai ne.> >>

16 A̱vu adanshi a̱ A̱sulazuva a̱ ta̱wisa̱ ya̱'a̱ va̱: 17 <<Mawun ma vuma, a mantsa ma na ama a Isra'ila a̱ ri nden a̱tsuma̱ e iɗa i le, a̱ lungusa̱ yi ta̱ na̱ nshinda̱ na̱ cine a yuwusain wuma u le. Ili yi idaba i ɗa aa yuwusan e ekere a̱ va̱ cine ka ri ili yi idaba a mantsa ma na u ri a̱ a̱shinda̱. 18 Adama o ndolo a ɗa n tsuwa̱a̱n nle upan u va̱ adama a mpasa n na o ocoi a̱tsuma̱ e iɗa'a. Waru adama a na a̱ lungusa̱ ta̱ iɗa'a na̱ a̱ma̱li e le. 19 M baza le ta̱ a̱tsuma̱ a nɗa. Reve gba e bete'we uba̱ta̱ suru a̱tsuma̱ o uvaɗi. N ge'eto le ta̱ o una̱ vu linga le na̱ wuma u le. 20 Amma uba̱ta̱ u na a̱ tyoi suru a̱ lungusa̱ ta̱ Ala a akiza a̱ va̱. Adama a na ama a nɗa n ro a yuwan ta̱ adanshi adama e le, <Ama a nda, ama a̱ A̱sulazuva a ɗa, agba suru na̱ ne, a 'yuwan a ciga a lyawai iɗa ya̱ yi.> 21 A̱mu gba, n ta aɗa a ala a akiza a̱ va̱ a na u'wa wa Isra'ila u lungusa̱i a̱tsuma̱ a nɗa n na a̱ tyoi.

22 <<Adama o ndolo vu damma u'wa wa Isra'ila, <Apa ili i na A̱sulazuva Zagbain dammai, adama o u'wa wa Isra'ila ma yuwan ili i ro shi, amma adama n ca ala a akiza a̱ va̱ tsugbain za na i tarai ili i ro i ɗa shi a̱tsuma̱ a nɗa n na i tyoi. 23 N to roco akiza a tsugbain tsa ala a̱ va̱, za na a tarai ili i ro shi a̱tsuma̱ a nɗa reve waru i lungusa̱ yi a̱tsuma̱ e le. Ɗaɗa ama ee reve a̱mu ɗa A̱sulazuva. A̱sulazuva Zagbain ɗa dammai ne, a mantsa ma n rocoi aciya̱va̱ na akiza e ekere a̱ ɗu e esu e le.

24 << <N to ɓoloto ɗu suru diga a nɗa, reve m ɓoloto ɗu diga a nɗa suru a̱vu n ta̱wa̱to ɗu e iɗa i ɗu. 25 N to kyo'onuwo ɗu mini me cece, i ta̱ gba a̱ ka̱mba̱ cece, waru n ta̱wa̱to nshinda̱ n ɗu suru na̱ a̱ma̱li a̱ ɗu suru. 26 N ta ca ɗu okolo a sa'avu, waru n ta zuwaa ɗu ruhu sa'avu. N ta tawa okolo a atali a̱ ɗu reve n ca ɗu okolo e pete. 27 N ta zuwa Ruhu va̱ a̱tsuma̱ a̱ ɗu waru n ta zuwa ɗu i kuru wila̱ u va̱, i toni wila̱ u va̱ ulobonu. 28 Ɗaɗa ya̱a̱ da̱nu a̱tsuma̱ e iɗa i na n cayi nkaya n ɗu. I to o'wo ama a̱ va̱, a̱mu waru n to o'wo A̱sula̱ a̱ ɗu. 29 N ta̱ wawa ɗu mu uta̱a̱ ɗu a̱ nshinda̱ n ɗu. Waru n ta zuwa ilyalya i yuwan a̱bunda̱. Maa lyawa ambulu a cina ɗu shi. 30 N ta zuwa umatsun wu ɗanga ɗu ni itana ya̱ a̱ɗuma̱ a̱ ɗu a̱ da̱shi a̱bunda̱. Adama i da̱shi sowo wono a̱tsuma̱ a nɗa adama a ambulu wan. 31 Ɗaɗa yaa cuwan ni iwuya ni ili i vama i na i yuwusain. I te ene aciya̱ɗu ili yi idaba adama a̱ nusu ɗu na̱ linga vi idaba i ɗu. 32 I reve, adama a̱ ɗu a ɗa maa yuwan ili i nda shi. A̱sulazuva Zagbain ɗa dammai ne. I ta uwwa wono waru aa tara ɗu ili i ro shi adama a̱ cu'un wuma u ɗu, a̱ɗu u'wa wa Isra'ila.

33 << <Apa ili i na A̱sulazuva Zagbain dammai, o urana u na n ka̱mba̱to nɗu cece diga a̱ nusu ɗu, n ta zuwa ɗu i da̱nu a̱tsuma̱ e ilyuci i ɗu, reve i suwisa ba̱ta̱ na vo o'woi okongo. 34 Iɗa i na i shi yo o'woi okongo, a ta cimbisa le. A na woo o'wo okongo cine u shi e esu a aza a na a̱ ka̱ra̱sa̱ lo suru. 35 A ta damma, <<Iɗa i nda i na i shi yo o'woi okongo a̱yi ɗa nda gogo u ka̱mba̱i tsa̱ a̱a̱rumbu a Adini. Ilyuci i na o ɓosoi a̱ ka̱mba̱i okongo, iɗa ye pere, gogo a̱ tsura̱ ta̱ aza a na a̱ ri pe nden nu ukari uka̱nda̱ruwu ne ele.>> 36 Ilyuci i na i buwai uka̱nda̱ruwu na̱ a̱ɗu e te reve a na a̱mu A̱sulazuva a̱mu ɗa n suwisai ba̱ta̱ na o ɓuɓosoi. A̱mu ɗa n 'ya̱sisa̱in ba̱ta̱ na shi vo o'woi okongo. A̱mu A̱sulazuva, a̱mu ɗa n dammai waru n ta̱ gba a yuwan ne.>

37 <<Apa ili i na A̱sulazuva Zagbain dammai, n ta̱ gba a yuwan ili i na u'wa wa Isra'ila u pati numu. N ta zuwa le a yuwan a̱bunda̱ tso oɓolo e ikyon. 38 Cine oɓolo e ikyon o tsu shiton Urishelima a mantsa ma̱ a̱buki, ne ɗa ilyuci i na yo o'woi okongo a shiwan na ama. Ɗaɗa ee reve a na a̱mu ɗa A̱sulazuva.>>