1 A̱tsuma̱ a aa'wan a̱ ta̱li, o woto wa̱ ta̱li, o urana wa tawun, a̱mu nden o u'wa u va̱ na̱ mbara ma Yahuda nden a̱ ma̱ka̱ka̱n ma̱ va̱, a̱vu ukere wa̱ A̱sulazuva Zagbain u cipa̱ a aci a̱ va̱. 2 Ana n ka̱lyuwa̱i, reve me ene uruma oroci a vuma. Za̱la̱ na rotsoi ikyun ya̱ yi u rotso ta̱ akina, zuva vi ikyun ya̱ yi a gawan u rotso ta̱ ekan a̱ rumu madala na o gboroi. 3 Reve wu ba̱ruwa̱ ili i ro tsu ukere, a̱vu u sheɗe mu na̱ a̱nji a aci a̱ va̱. Reve Ruhu 'ya̱sa̱n mu e memere mo uvaɗi na̱ zuva. Reve u ta̱wa̱ na̱ a̱mu a̱tsuma̱ a alavu alavu a̱ A̱sula̱ hali Urishelima, a̱ tyo o u'uwata wu una̱ntsu wu ugana wa̱ a̱tsuma̱ o ukowo, uba̱ta̱ u na a̱ma̱li a na a tsu zuwa tsushu'un tsa̱ ri mishin. 4 Reve gba a̱yi ɗa nda tsugbain tsa̱ A̱sula̱ a Isra'ila lo, tsa alavu alavu a na me enei a̱tsuma̱ a agalaci'i. 5 Reve u damma mu, <<Mawun ma vuma, 'ya̱sa̱n esu a̱ wu vu ka̱lyuwa̱ a̱ tyo ugana.>> Ɗaɗa n 'ya̱sa̱in esu a̱ va̱ n ka̱lyuwa̱i a̱ tyo ugana, reve gba me ene upasu wu ugana wu u'uwata wu una̱ntsu u masa'a'a a̱ma̱li a na a tsu zuwa tsushu'u'un lo. 6 Reve A̱sulazuva a damma mu, <<Mawun ma vuma, vee ene ta̱ ili i na aa yuwusan, ili yi idaba suru suru i na u'wa wa Isra'ila waa yuwusan pa, ili i na ya̱a̱ gba̱ra̱ mu alanga nu u'wa u va̱? Agba vu te ene ili i na i la'ai idaba.>> 7 Reve u ta̱wa̱ na̱ a̱mu o u'uwata wu ukowo'o. Ana n ka̱lyuwa̱i reve me ene wa̱nci o uɓaɓu. 8 Reve u damma mu, <<Mawun ma vuma, ka̱pa̱ o uɓaɓu.>> Ɗaɗa n ka̱pa̱i o uɓaɓu'u, a̱vu me ene una̱ntsu pe. 9 Reve u damma mu, <<Uwa pe ve ene ili i iwuya ni ili yi idaba i na aa yuwusan pa.>> 10 Ɗaɗa n uwai pe reve me ene ushe'un ɗe o uɓaɓu suru a̱ ka̱nda̱ruwa̱ cu'un vi ili yi ika̱ta̱pu suru na̱ cu'un vu nama vi idaba suru, na̱ a̱ma̱li o u'wa wa Isra'ila suru. 11 A̱ ma̱ka̱ka̱n me le mbara kupocindere mu u'wa wa Isra'ila n da̱na̱ ta̱ lo mishin, na̱ Jazaniya ulobo wa Shafa waru u shi ta̱ mishin oɓolo ne ele. Za suru a̱tsuma̱ a mbara'a u shi ta̱ na ayimba a̱ a̱tsuka̱ o ukere wa̱ yi, no oɓolo a̱ mikyon a gawasan zuva. 12 Reve u damma mu, <<Mawun ma vuma, ve ene ta̱ ili i na mbara mu u'wa wa Isra'ila maa yuwusan a̱tsuma̱ e irumbu, za suru a̱tsuma̱ a aasula a yima'ishi ya̱ a̱ma̱li ya̱ yi? Adama a na a damma ta̱, <A̱sulazuva ee inda tsu shi, A̱sulazuva a vari ta̱ iɗa'a.> >> 13 Reve waru u damma mu, <<Vu ta̱ da̱shi ene le a yuwusan ili i na i la'ai idaba.>> 14 Reve u ta̱wa̱ na̱ a̱mu o u'uwata wu upasu wu ugana wu u'wa wa̱ A̱sulazuva, ɗaɗa me enei a̱ma̱ci nden pe e mesun ma̱ a̱tsumola̱ngu adama a̱ a̱ma̱li Tamuz. 15 A̱vu u damma mu, <<Mawun ma vuma ve ene ta̱ ili i nda? Vu ta̱ da̱shi ene le a yuwusan ili i na i la'ai idaba.>> 16 Reve wo oto mu o ukowo wa̱ a̱tsuma̱ wu u'wa wa̱ A̱sulazuva. Reve lo o u'uwata wa̱ A̱a̱'isamapaɗa'a e memere mo ukobu na̱ masa'a, me ene ama a na aa rawa ushin no ozo o ton. A vadalai ucina̱ u le a̱ tyo uba̱ta̱ wa̱ A̱a̱'isamapaɗa wa̱ A̱sulazuva urewesu u le waru a̱ ka̱lyuwusa̱ asana. A̱ ka̱ɗa̱towa̱ yi urana asana. 17 Reve u damma mu, <<Ve ene ta̱ ili i nda, mawun ma vuma? Ili ye ke'en i ɗa e ekere o u'wa wa Yahuda a yuwan ili yi idaba i na aa yuwusan uba̱ta̱ u nda, na hali o shiton iɗa'a nu u'ya̱susa̱n wu ugbozu. A̱vu a lyuwa elime na a zuwusa numu upan? Ka̱lyuwa̱, e te isulusa mu o ure u na u la'ai usuɗuwu! 18 Adama o ndolo n ta yuwan ne ele a̱tsuma̱ o upan. Mee ene iliyali i le ko n roco le isa'ani shi. Ko na ee ɗesu mu na̱ mesun, maa uwwa le shi.>>