1 <<A̱vu waru mawun ma vuma, tara matsun me pe'eni ma wali. Reve vu yuwan ulinga na̱ a̱yi tso utanu wu za vi ipuna vu puna aaci a̱ wu na̱ ntsuka̱ ma̱ wu. Reve vu tara ili yu uritosu vu ɓatsalai a̱nji'i. 2 A mantsa ma na vu kotoi urocosu cine a̱a̱ ka̱nda̱ruwa̱ lyuci'i nu uvon, a̱vu vu tara uɓatsu u ta̱ wa ta'atsu wa̱ a̱nji'i vu zuwa yi pe a̱ lyuci'i, a̱vu vu kula̱to yi pe. Uɓatsu u ta̱ vu baza yi o uka̱nda̱ruwu'u, a̱vu vu koɗo le na̱ matsun me pe'eni. Uɓatsu u ta̱ waru vu kusha'wa le o upepu. Adama a na n ta saɓa le na̱ matsun me pe'eni utalu. 3 Vu kene a̱nji'i ke'en a̱vu vu nla̱ le e elentsu o utugu wa̱ wu. 4 Reve waru vu kene wa'a vu vari le a̱tsuma̱ a akina vu kula̱to le. Diga lo akina a̱ to uta̱ o u'wa Isra'ila suru*.>> 5 <<Apa ili i na a̱mu A̱sulazuva Zagbain dammai, a̱yi nda a̱yi ɗa Urishelima za na n shuwa̱i e memere ma ama na̱ nɗa uka̱nda̱ruwu na̱ a̱yi. 6 Agba reve u yuwaan re va̱ na̱ wila̱ u va̱ aciyogbamu hali a la'a ama na̱ nɗa n na n ri uka̱nda̱ruwu na̱ a̱yi suru. U 'yuwan ta̱ ure u va̱ waru u toni wila̱ u va̱ shi.>> 7 <<Adama o ndolo apa ili i na a̱mu A̱sulazuva Zagbain dammai, adama a na vu la'ai nɗa n na n ri uka̱nda̱ruwu na̱ a̱vu ula̱ngu, agba vu kuru uritosu u va̱ shi ko vu yuwan tsutoni na̱ wila̱ u va̱ shi, waru vu yuwan ili i na nɗa n na n ri uka̱nda̱ruwu na̱ a̱vu a yuwain shi, 8 Adama o ndolo, apa ili i na a̱mu A̱sulazuva Zagbain dammai, a̱mu na aciya̱va̱ n ta̱ a̱ nla̱ngi na̱ a̱vu. Waru n ta ca wu oforo e esu nɗa'a. 9 Adama a̱ a̱bunda̱ a̱ a̱ma̱li e idaba a̱ wu, n ta yuwan na̱ a̱vu ili i na koto n shi n yuwain shi, waru ma̱a̱ da̱shi yuwan yi shi. 10 Adama o ndolo nan dada i ta tama olobo a̱ ɗu a̱tsuma̱ a̱ ɗu, olobo waru a tama nan dada le. N ta ca ɗu oforo reve aza a na a la'ai suru m bete'we le uba̱ta̱ suru. 11 Adama o ndolo, n kucina ta̱ na̱ wuma u va̱, A̱sulazuva Zagbain dammai, o una̱ u na vu lungusa̱i a̱a̱'isa̱ a̱ va̱ na̱ a̱ma̱li e idaba a̱ wu ni ili yi idaba ya̱ wu suru, a̱mu fo n ta tawa isa'ani i va̱. Moo roco wu isa'ani ko n lyawa wu shi. 12 Uɓatsulai u ta̱ wa ta'atsu wa ama a̱ wu a̱ ta̱ kuwa̱ na̱ mɓa̱la̱ ko a̱ kuwa̱ na ambulu a̱tsuma̱ a̱ wu. Uɓatsulai u ta̱ wa ta'atsu waru a̱ ta̱ kuwa̱ na̱ matsun me pe'eni a alanga o uɓaɓu wa̱ wu. Reve uɓatsulai u ta̱ wa ta'atsu waru m bete'we le upasu biti, a̱vu n saɓa le na̱ matsun me pe'eni utalu. 13 Reve upan u va̱ u koto, asuvu usuɗuwu u va̱ waru u von a̱ tyo ya̱'a̱ le, reve n cuwa̱n. A mantsa ma na upan u va̱ u voyin a aci e le, a̱vu e reve a na a̱mu A̱sulazuva n yuwan ta̱ adanshi a̱tsuma̱ a̱ tsushu'un tsa̱ va̱. 14 Waru n ta̱ ka̱mba̱to wu okongo ni ili yi izo'oshi e ekere a nɗa n na n ri uka̱nda̱ruwu na̱ a̱vu ne e esu a aza a na suru a̱a̱ ka̱ra̱sa̱ lo. 15 Vu to o'wo ili i wono ni ili yi izo'oshi ni ili yu uritosu ni ili i wovon e ekere a nɗa n na n ri uka̱nda̱ruwu na̱ a̱vu. A mantsa ma na n ge'eto nuwu a̱tsuma̱ o upan na̱ tsuɓari tsu usuɗuwu lon. A̱mu A̱sulazuva n damma ta̱. 16 A mantsa ma na n tewin nuwu na aya a̱ tsukwa̱ tsa ambulu, aya o ukototosu, n ta̱ tewin le adama n kototo wu. N ta̱ ta̱wa̱a̱ wu na ambulu a aci a ambulu reve n koɗo ure u ma̱tsura̱ me ilyalya ma̱ wu. 17 N ta̱ lyunguwa̱ na ambulu ni inama yu una a aci a̱ wu, a̱vu a lyawa wu babu mawun. Mɓa̱la̱ na̱ moco ma mpasa ma̱a̱ te iza̱ o utula̱i a̱tsuma̱ a̱ wu, reve n ta̱wa̱a̱ na̱ matsun me pe'eni a aci a̱ wu.>> A̱mu A̱sulazuva n damma ta̱.