1 Reve adanshi A̱sulazuva a̱ ta̱wa̱ ya̱'a̱ va̱, 2 <<Mawun ma vuma vu ta yuwaan yi uge'etosu? Vu ta yuwaan lyuci gbain wocosu wu mpasa nda uge'etosu? To vu damma yi idaba i na waa yuwusan suru. 3 Reve vu damma, <Apa ili i na A̱sulazuva Zagbain a dammai: Lyuci gbain na o ocosu mpasa a̱tsuma̱ a̱ yi, u ronoo ta̱ aciya̱yi mantsa mo ukototosu. A̱yi waru na u lungusa̱i aciya̱yi ni itoni ya̱ a̱ma̱li. 4 Vo o'wo ta̱ za vu unusu adama a mpasa n na vo ocoi, a̱vu vu lungusa̱ aciya̱wu adama a̱ a̱ma̱li a na vu yuwain. Vu rawato ta̱ rana vu ukototosu va̱ wu zuzu, waru a'wan a̱ wu a rawa ta̱ o ukosu. Adama o ndolo n ta̱ ka̱mbuwa̱ wu ili ya adanshi uba̱ta̱ wa ama ni ili yi izo'oshi uba̱ta̱ a nɗa. 5 Ilyuci i na i ri zuzu na aza a na a̱ ri alanga na̱ a̱vu a ta yuwaan wu ulamu. Aala a̱ wu a̱ la̱nga̱ ta̱, vu shiwan ta̱ na̱ u'ya̱susa̱n wu ugbozu ama a ta yuwusan ili i na a cigai.

6 << <Ka̱lyuwa̱, cine azagbain a Isra'ila suru aza a na a̱ ri a̱tsuma̱ a̱ wu a yuwusan ulinga nu ucira u le uba̱ta̱ u wocosu wu mpasa. 7 A̱tsuma̱ a̱ wu a tara dada na̱ mma ili i ro shi. Ya̱'a̱ wu ɗa waru oo ɓongishi omocin na̱ mkpa'an waru na̱ nra̱na̱. 8 Vu zo'oso ta̱ ili ya akiza i va̱ waru vu tara urana wa Ashibi a̱ va̱ ili i ro shi. 9 A̱tsuma̱ a̱ wu ama a adanshi epen a̱ ta̱ pe adama o oco mpasa. Waru pe ɗa aza a na a lyuwusa ilyalya uba̱ta̱ a̱ a̱ma̱li zuva masasan a̱ ri, waru a ta yuwusan ili yu uwuyanu. 10 A̱tsuma̱ a̱ wu aza a na oo vosun na̱ a̱ma̱ci a dada le a̱ ta̱ pe. A̱tsuma̱ a̱ wu waru aza a na o vosun na̱ a̱ma̱ci nu ucira mantsa mo usumbu u le a̱ ta̱ pe, mantsa ma na a̱ ri a̱tsuma̱ a̱ a̱shinda̱. 11 Ozo o ro a ta yuwusan ili yi idaba na̱ a̱ma̱ci o nron mu nden n le, ozo o ro waru a ta̱ lungususa̱ ejene e le. A̱tsuma̱ a̱ wu waru ozo o ro o to vosun na̱ mawun ma̱ a̱sho n le me esheli, aza a na a̱ ri dada ta̱ nu ucira. 12 A̱tsuma̱ a̱ wu a̱ ta̱ ushishi utowusu wu una̱ adama o oco mpasa. Vu ta̱ ushishi uda̱shiyi u na u ka̱ra̱la̱i nu ushishi wo okopu nu uda̱shiyi wa̱ a̱bunda̱, a̱ tsura̱sa̱ uda̱shiyi uba̱ta̱ a̱ nron mu nden ma̱ wu nu ule'e. Amma vi icina ta̱ na̱ a̱mu, A̱sulazuva Zagbain ɗa dammai ne.

13 << <A̱yi ɗa nda n ta ɓasa ukere u va̱ adama o uda̱shiyi u vama u na u ka̱ra̱la̱i za na vu yuwain, na̱ wocosu wu mpasa n na a yuwain a̱tsuma̱ a̱ wu. 14 Vu ta gura kaɓa asuvu, waru ekere a̱ wu a ta yuwan ugbamu o urana u na maa ga'an na̱ a̱vu? A̱mu A̱sulazuva ɗa a dammai, waru n ta yuwan yi. 15 N ta̱ bete'we wu a̱tsuma̱ a ama waru n ta̱ bete'we wu a̱ tyo a nɗa, waru n to kototo idaba ya̱ wu. 16 Na̱ vo o'wo ili yi idaba e esu a ama, vu te reve a na̱ a̱mu ɗa A̱sulazuva.> >>

17 Waru adanshi A̱sulazuva a̱ ta̱wa̱ ta̱ ya̱'a̱ va̱: 18 <<Mawun ma vuma u'wa wa Isra'ila wo o'wo ta̱ ili ye pere ya̱'a̱ va̱. Suru nle irumushili i ɗa, atali a kuza ni irumu, na̱ rumu lima̱ na a lyawai a̱tsuma̱ a̱ a̱a̱ka̱ri a akina. A̱shinda̱ a azurufa a ɗa. 19 Adama o ndolo apa ili i na A̱sulazuva Zagbain dammai, <Adama a na suru nɗu yo o'wo ta̱ a̱shinda̱, n to ɓoloto ɗu a̱tsuma̱ a̱ Urishelima. 20 Cine vuma tsu ɓoloto azurufa ni irumushili na̱ rumu lima̱ na̱ daluma na̱ kuza a zuwa le a̱ a̱ka̱ri a akina, adama e ivula̱a̱ le akina tsura̱ e jeruweto yi, ne ɗa mo ɓoloto ɗu a̱tsuma̱ o upan u va̱ waru nu upan wu usuɗuwu u va̱. Waru n ta zuwa wu pe a̱vu mu jeruweto wu. 21 N to ɓoloto wu reve mi ivula̱ wu nu upan wu usuɗuwu u va̱, waru vu ta̱ jeruwe a̱tsuma̱ a̱ yi. 22 Cine azurufa tsu jeruwe a̱tsuma̱ a̱ a̱ka̱ri akina, ne ɗa vee jeruwe a̱tsuma̱ a̱ yi. Waru ne ɗa ve reve a na̱ a̱mu A̱sulazuva n tsuwa̱n wu ta̱ upan u va̱ aci a̱ wu.> >>

23 Waru adanshi A̱sulazuva a̱ ta̱wisa̱ ta̱ ya̱'a̱ va̱, 24 <<Mawun ma vuma, damma iɗa'a, <A̱vu iɗa i na i ri cece ɗa shi ko o ro'o wu o urana wu upan shi.> 25 Iɓolo ya azagbain a̱ yi aza a na o ɓoloso una̱ a̱ ta̱ tsa kamu ma̱gugwa̱ mantsa ma na waa kakarasa nama. O tsu soɗu ta̱ wuma u vuma, a tsu tara ta̱ izuwa ni ili i sa'ani. A tsu zuwa ta̱ a̱ma̱ci na̱ a̱bunda̱ o o'wo nruna̱. 26 Nan ganu a̱ yi a yuwan ta̱ ili ye pere na̱ wila̱ u va̱ waru a̱ lungusa̱ ta̱ ili ya akiza i va̱. A kakasa ili i na i ri na akiza na̱ za babu akiza shi. A ta yuwusan uritosu a na babu ili i na yi kasai ili yi idaba na̱ za cece. Waru a tara Ashibi a̱ va̱ na̱ a̱ɓula̱ shi, ne ɗa mo o'woi idaba a̱tsuma̱ e le. 27 Azagbain a na a̱ ri a̱tsuma̱ a̱ yi a̱ ta̱ tsa̱ nkerenkesu a karasa inama, o ocosu mpasa, waru o unasa ama tsa̱ra̱ a̱ tsura̱ uda̱shiyi u vama. 28 Ama̱sula̱ a̱ yi o soko ta̱ linga le uba̱ta̱ a alavu alavu e epen na̱ epen a̱ yindi. A damma ta̱, <Apa ili i na A̱sulazuva Zagbain dammai,> agba A̱sulazuva a yuwan adanshi shi. 29 Ama e iɗa'a a rito ta̱ a'usa na a yuwusain ugeshe wu ure, o ɓongi ta̱ a̱za̱ o ulambu na aza a na a cigai ikambi. A ta yuwusan omocin ule'e a putsusaa le ni ili i na i ri za le.

30 <<Waru n zami ta̱ vuma a̱tsuma̱ e le za na aa suwa uɓaɓu a̱vu wi isawan a abala o uɓaɓu'u a̱ ma̱ka̱ka̱n ma̱ va̱ e memere adama e iɗa'a tsa̱ra̱ n kototo yi wan, agba n tsura̱ za shi. 31 Adama o ndolo n ta̱ tsuwa̱n le upan u va̱ a aci e le. A̱vu n kula̱to le nu upan wu usuɗuwu u va̱. N ka̱mbuwa̱a̱ le ta̱ ili i na a yuwain a aci e le, A̱sulazuva Zagbain ɗa dammai ne.>>