1 Reve u tara mu a̱ tyo o una̱ntsu u na wa̱a̱ ka̱lyuwusa̱ asana. 2 Reve gba me eneshi tsugbain tsa̱ A̱sula̱ a Isra'ila a̱ ta̱wa̱ diga asana. Ilama yu uta̱wa̱ wa̱ yi u rotso ta̱ ilama i mini ma̱ ma̱gugwa̱. Reve iɗa'a yi ikana ne ekan a tsugbain tsa̱ yi. 3 Alavu alavu a nda a na me enei o rotso ta̱ alavu alavu a na me enei a mantsa ma na u ta̱wa̱i u kototo lyuci'i waru tsa alavu alavu a na me enei a̱ nge'en mu Uɗolu ma Keba. A̱vu n von ma̱kpa̱ɓa̱. 4 Ana tsugbain tsa̱ A̱sulazuva tsa uwai a̱ A̱a̱'isamapaɗa'a nu una̱ntsu u na wa̱a̱ ka̱lyuwusa̱ asana, 5 a̱vu Ruhu'u u 'ya̱sa̱n mu a̱vu u ta̱wa̱to mu a̱tsuma̱ a agalaci a̱ a̱tsuma̱. A̱vu tsugbain tsa̱ A̱sulazuva tsa shiton A̱a̱'isamapaɗa'a. 6 Vuma'a mishin zuzu na̱ a̱mu, a̱vu mu uwwa nanza aa yuwusan adanshi na̱ a̱mu diga pe a̱tsuma̱ a̱ A̱a̱'isamapaɗa'a. 7 A̱vu u damma mu, <<Mawun ma vuma, uba̱ta̱ u nda uba̱ta̱ wu nda̱na̱ta̱ n tsugono tsa̱ va̱ tsa ɗa nu uba̱ta̱ wu udasata wa ana a̱ va̱. Pa ɗa uba̱ta̱ u na ma̱a̱ da̱nu oɓolo na aza a Isra'ila kukuci. U'wa wa isra'ila u buwa a̱ lungusa̱ ala a akiza a̱ va̱ shi, ko ele ko ngono n le, na̱ tsushakala tse le tsa̱ a̱ga̱nda̱ tsa̱ a̱ma̱li. Waru a buwa a̱ da̱shi shushuwa̱ ili yu ucuwusan na̱ ngono n le n na n kuwa̱i ba̱ta̱ a̱ a̱ga̱nda̱ a agaɗi shi. 8 A mantsa ma na a varai na̱ntsu le zuzu nu una̱ntsu u va̱ na akpata a̱ na̱ntsu le zuzu na akpata a̱ na̱ntsu va̱, uɓaɓu u ɗa goon wu kasa numu ne ele. A̱ lungusa̱ ta̱ ala a akiza a̱ va̱ ni ili yi idaba i le i na a yuwain. Ɗaɗa gba n soɗu nle a̱tsuma̱ o upan u va̱. 9 Gogo lyawa a tawa tsushakala tse le ni ili yu ucuwusan na̱ ngono n le n na n kuwa̱i alanga na̱ a̱mu, a̱vu gba n da̱nu e memere me le babu ukotu.>>

10 <<Mawun ma vuma, vu cuɗuwa u'wa wa Isra'ila A̱a̱'isamapaɗa, adama a uwwa wono wu nusu le. Lyawa le a̱ ka̱lyuwa̱ cine o rono niyi. 11 Reve na a uwwa wono wi ili i na a yuwain suru, vu cuɗuwa le cine o ronoi A̱a̱'isamapaɗa'a, cine e gere niyi, na̱ wuta̱ta̱ va̱ yi na̱ u'wata va̱ yi, ni ili i na suru i rotso niyi suru. Vu cuɗuwa le ili i na a zuwai na̱ wila̱ va̱ yi suru. Vu ɗanaa le cine o foɓo niyi na̱ wila̱ wa̱ yi suru ele a̱ a̱ka̱nla̱ adama e reve a cuwan a̱ kuru le. 12 Apa wila̱ wa̱ A̱a̱'isamapaɗa'a, zuva masasa'a suru a̱ ka̱nda̱ruwa̱, u to o'wo uba̱ta̱ u na u la'ai akiza. A̱yi nda a̱yi ɗa wila̱ wa̱ A̱a̱'isamapaɗa.>>

13 <<Apa mgbain m masa'a o uritowu wu uga'an, uritowu suru ukere u ta̱ u ɗa na akapi o ukere u ta̱. A̱ka̱ri o uyene a masa'a'a a̱ru'un a̱ yi udasu u ta̱, washin wa̱ yi waru udasu u ta̱. Asa'a a na a suwai a̱ nge'en ma̱ yi gba washin wa̱ yi udasu u ta̱. A̱yi nda a̱yi ɗa uga'an u masa'a'a. 14 Diga a̱ a̱ka̱ri'i e iɗa masa'a'a ma̱ ta̱ na̱ pasu ta'atsu. Upasu wi iɗa uga'an wa̱ yi udasu u re, washin wa̱ yi udasu u ta̱. Upasu u memere, uga'an wa̱ yi udasu una̱shi washin wa̱ yi udasu u ta̱. 15 Zuva masa'a'a uga'an wa̱ yi udasu una̱shi, na avana a̱ na̱shi wuba̱ruwu zuva ɗe zuva masa'a'a. 16 Zuva masa'a'a uga'an wa̱ yi nu uga'an e iɗa una̱ta̱ u ɗa u ri, udasu kupa ne ejere re. 17 Upasu wo go'on fo washin nu uga'an wa̱ yi una̱ta̱ u ɗa u ri, uga'an wa̱ yi udasu kupa na̱ a̱za̱ a̱ na̱shi washin wa̱ yi waru udasu kupa na̱ a̱za̱ a̱ na̱shi. U ta̱ na akpata a̱ nge'en ma̱ yi a̱ ka̱nda̱ruwa̱ washin wa̱ yi akapi o udasu u ta̱. Waru u ta̱ na̱ a̱ka̱ri o uyene a̱ ka̱nda̱ruwa̱ a̱ru'un a̱ yi ukere a̱ ta̱. Dasata va̱ yi a gawan a̱ ta̱ upasu wa asana.>>

18 Reve vuma'a u damma mu, <<Mawun ma vuma, apa ili i na A̱sulazuva Zagbain dammai, ele nda ele ɗa ili i na a zuwai adama a masa'a'a, na a suwa yi adama a̱ kucci vu ukula̱tosu na̱ wukyo'onusu wu mpasa a aci a̱ yi. 19 Vu ta ca nan ganu vu umatsun wa Saduku wu ugundo wa̱ Levi aza a na aa yuwusan a̱ga̱nda̱ a̱ ma̱ka̱ka̱n mo moggono ma nan adama a̱ kucci vu unusu. A̱sulazuva Zagbain ɗa dammai ne. 20 A̱vu vu kene mpasa ma̱ yi vu daɓa yi a avana a̱ na̱shi a masa'a'a. Reve waru vu tsun o obolu a̱ na̱shi o ukosu wu upasu wo gon u masa'a'a, na a akpata a̱ nge'en a na a̱ ri a̱ ka̱nda̱ruwa̱ nge'en ma̱ yi. Ne ɗa vaa lapula masa'a'a a̱vu waru a yuwaan yi kucci matara mo ume mo unusu. 21 Vu tara moggono ma̱ ma̱dindim adama a̱ kucci vu unusu a̱vu vu kula̱to yi uba̱ta̱ u na a zuwai a̱ A̱a̱'isamapaɗa a alanga a̱ a̱a̱'isa̱'a̱.>>

22 <<O urana we ire vu ta ca a̱ga̱ji za na ri na̱ mɓa̱la̱ shi kucci vu unusu, a̱vu a lapula masa'a'a cine a lapula niyi na̱ mpasa m moggono ma nan. 23 Na̱ vu koto ulapulu wa̱ yi, a̱vu vu ca moggono a nan ma na ma̱ ri na̱ mɓa̱la̱ shi na̱ a̱a̱giri'i a na a̱ ri na̱ mɓa̱la̱ shi diga o oɓolo e inan ni ikyon. 24 Vu ta ca le a̱ ma̱ka̱ka̱n ma̱ A̱sulazuva, a̱vu nan ganu o kyo'onuwo le akpaɗi a̱vu a ca A̱sulazuva ele kucci vu ukula̱tosu. 25 Usana suru vu ta ca a̱a̱ga̱ji a̱ ta̱ hali rana cindere, na̱ moggono ma nan na̱ a̱giri'i diga o oɓolo e inan ni ikyon kucci vu unusu, suru nle aza a na a̱ ri na̱ mɓa̱la̱ shi. 26 Rana cindere aa yuwan kucci ma matara mo ume mo unusu ma masa'a'a a̱vu a lapula yi. Ne ɗa aa tawa yi la̱nga̱. 27 O ukosu wu rana nda'a, a̱vu o urana wa̱ kunla̱ a̱ 'ya̱wa̱ nan ganu a̱ ta̱wa̱ na̱ kucci vu ukula̱tosu ɗu na̱ kucci muwwulai a masa'a'a. Ɗaɗa ma̱a̱ usu ɗu. A̱mu A̱sulazuva Zagbain ɗa dammai.>>