1 <<A mantsa ma na yee ne'eshen iɗa'a yo o'wo agadu, i ta tawaa A̱sulazuva upasu u ro wi iɗa'a la̱nga̱ wo o'wo upasu wa akiza. Uga'an wa̱ yi u da̱na̱ mili kupakunla̱ nu uɓatsulai uta'atsu washin wa̱ yi waru mili kupota̱li ne ejere nu uɓatsulai uta'atsu. Uba̱ta̱'a̱ suru u to o'wo uba̱ta̱ wa akiza. 2 Pe a̱tsuma̱ a̱ yi a ta tawa udasu ukpaku kunla̱ na̱ kupocindere no ozo o ton (875) nu ukpaku kunla̱ na̱ kupocindere no ozo o ton (875) adama a̱a̱'isa̱ a̱ A̱sulazuva. A ta lyawa agalaci o ro udasu kupakunla̱ nu uɓatsulai a̱ ka̱nda̱ruwa̱. 3 A̱tsuma̱ o uba̱ta̱ wa akiza u na a tawai'i vu rito upasu u na uga'an mili kupakunla̱ na̱ za ta̱ nu uɓatsulai uta'atsu na̱ washin mili mata'atsu na̱ za ta̱ nu uɓatsulai uta'atsu. Pe ɗa a̱a̱'isa̱ a̱ da̱na̱, Upasu u na u La'ai Akiza. 4 U to o'wo uba̱ta̱ wa akiza wi iɗa'a adama a nan ganu, aza a na aa yuwusan a̱ga̱nda̱ a̱a̱'isa̱'a̱ aza a na waru aa rawusa zuzu na̱ A̱sulazuva a yuwusaan yi a̱ga̱nda̱. U to o'wo uba̱ta̱ u na aa suwa 'wa le nu uba̱ta̱ wa akiza wa̱ a̱a̱'isa̱'a̱. 5 Upasu u na waru za na ri uga'an mili kupakunla̱ na̱ za ta̱ nu uɓatsulai uta'atsu na̱ washin mili mata'atsu na̱ za ta̱ nu uɓatsulai uta'atsu u to o'wo uba̱ta̱ wu nden n nan Levi, aza a na aa yuwusan a̱ga̱nda̱ a̱ A̱a̱'isamapaɗa. U to o'wo za le ni ilyuci i le na a̱a̱ da̱nu. 6 E eɓele o upasu u na a tawai'i i ta tawa upasu u ro uga'an wa̱ yi mili kupa kunla̱ na̱ za ta̱ nu uɓatsulai uta'atsu na̱ washin mili kupa ne ejere nu uɓatsulai uta'atsu. A ta tawa upasu u nda wo o'wo za vu u'wa wa Isra'ila suru.>>

7 << <Mogono mo to o'wo na̱ pasu re vi iɗa'a upasu u na u ri na̱ a̱tyo nu upasu wa akiza wi iɗa'a nu upasu u lyuci'i nu upasu wa̱ a̱livu nu upasu wa asana. Uga'an u le u da̱na̱ una̱ta̱ nu upasu u na a tawayi ugundo biti wu umatsun wa Isra'ila. U reme diga utyo wa̱ a̱livu a̱ tyo utyo wa asana. 8 Iɗa i nda i to o'wo za va̱ yi a̱tsuma̱ a Isra'ila. Waru mogono ma̱ va̱ ma buwa o ɓongi ama a̱ va̱ shi, amma u ta lyawa u'wa wa Isra'ila a̱ tsura̱ iɗa o una̱ wu gundo le.> >>

9 Apa ili i na A̱sulazuva Zagbain dammai, <<U rawa ta̱ ne a̱ɗu ngono ma Isra'ila! I zuwa utyo wa a'usa ni iɓongi i ɗu, i yuwan ili i na i ri mejege ni ili ya̱ a̱ɓula̱. Lyawai a̱ gba̱ra̱sa̱ ama a̱ va̱. A̱sulazuva Zagbain ɗa dammai ne. 10 I yuwan ulinga ni ili yu uritosu i na yi ntsayi, makundatsu ma efa ma na ma ntsayi na̱ bat na vu ntsayi. 11 Makundatsu ma efa na̱ bat a̱ da̱na̱ mgbain n ta̱. Batu u tara uɓatsulai u ta̱ wa kupa wa homa, efa'a waru u tara uɓatsulai u ta̱ wa homa. Homa ɗa o'wo makundatsu ma na ma ntsayi. 12 Makundatsu me shekel u to o'wo ume u gera ushin. Shekele ushin o ɓolo na̱ shekel ushin no ozo o ton na̱ shekel kupa no ozo o ton u to o'wo mina ta̱.>>

13 << <A̱yi nda a̱yi ɗa utafa u na yaa ca, uɓatsu u ta̱ a̱tsuma̱ o uɓatsulai uta̱li wa efa ta̱ diga a homa ta̱ vi yitabo nu uɓatsu u ta̱ a̱tsuma̱ o uɓatsulai u uta̱li u ta̱ diga a homa ta̱ vo oroci a yitabo. 14 Ukunzuwu u na a zuwai u mani'in, u na a̱ kunzuyi na̱ bat a̱yi ɗa akunda a̱ ta̱ a̱tsuma̱ a kupa a bat vu kor ta̱ biti, (kor na̱ homa suru bat kupa ɗa). 15 Waru a ta tara kyon ta̱ a̱tsuma̱ o oɓolo e ikyon a na a̱ ri ni ikyon ukpaku ure (200) wa Isra'ila. A̱yi nda a̱yi ɗa woo o'wo kucci vi ishina, kucci vu ukula̱tosu na̱ kucci muwwulai, na aa yuwan adama a matawa mo unusu ma ama, A̱sulazuva Zagbain ɗa dammai ne. 16 Ama e iɗa'a suru a ta ca ucasu u nda a̱ tyo uba̱ta̱ u mogono ma Isra'ila. 17 U to o'wo ulinga u mogono'o u ta̱wa̱a̱ na̱ kucci vu ukula̱tosu, na̱ kucci vi ishina na̱ kucci vo oso uba̱ta̱ wa̱ a̱buki'i, a̱buki o Woto u Sa'avu na Ashibi, a̱ a̱buki a̱ la̱nga̱ a na a zuwayi a̱za̱ o u'wa wa Isra'ila. U ta̱ ta̱wa̱a̱ na̱ kucci vu unusu na̱ kucci vi ishina na̱ kucci vu ukula̱tosu na̱ kucci muwwulai, adama a yuwan kucci matawa mo unusu adama o u'wa wa Isra'ila.> >>

18 << <Apa ili i na A̱sulazuva Zagbain dammai, O urana wu ufaru u woto wu ufaru, i ta tara moggono ma nan ma na ma̱ ri na̱ mɓa̱la̱ shi i lapula A̱a̱'isa̱'a̱. 19 Ganu te kene mpasa n kucci vu unusu a̱vu u tsun yi a akpata o una̱ntsu wa̱ A̱a̱'isamapaɗa, no o obolu a̱ na̱shi a zuva a masa'a'a na a akpata o una̱ntsu wu ukowo wa̱ a̱tsuma̱. 20 I ta yuwan ne waru o urana we cindere u woto'o adama a za na suru yuwain unusu nu ucigu wa̱ yi shi ko a̱tsuma̱ o ulambu wu urevu. Ne ɗa yaa lapula A̱a̱'isamapaɗa'a.> >>

21 << <O urana wa kupa na̱ a̱za̱ a̱ na̱shi o woto wu ufaru ta yuwan A̱buki a Mapasa. A̱buki'i a ta yuwan rana cindere, waru opopofu a na yaa tama a mantsa'a a ta yuwan yi babu wolilo. 22 O urana u ndolo mogono ma̱ ta̱ ta̱wa̱a̱ na̱ moggono ma nan kucci vu unusu adama a aciya̱yi na adama a ama e iɗa'a suru. 23 O urana biti a̱tsuma̱ a rana cindere va̱ A̱buki'i u ta̱ ta̱wa̱a̱ no ogono e inan e cindere na̱ a̱giri'i e cindere aza a na a̱ ri na̱ mɓa̱la̱ shi kucci vu ukula̱tosu e ekere a̱ A̱sulazuva, na̱ a̱ga̱ji kucci vu unusu. 24 Reve u ta̱wa̱a̱ na̱ efa ta̱ o una̱ wo oogono a̱ ta̱ na̱ efa ta̱ o una̱ wa̱ a̱a̱giri'i ta̱ suru, oɓolo na̱ meden ma mani'in adama a efa biti. 25 A̱tsuma̱ o woto we cindere, o urana wa kupa no ozo o ton, waru a̱tsuma̱ a rana cindere va̱ A̱buki'i, u ta̱ ta̱wa̱ ni ili'i una̱ta̱ adama a̱ kucci vu unusu na̱ za vu ukula̱tosu, na̱ za vi ishina oɓolo na̱ mani'in.> >>