1 <<A̱vu mawun ma vuma, tara akpata o olo'o, vu zuwa yi elime a̱ wu a̱vu vu rono ɗe ululu u lyuci va̱ Urishelima. 2 Reve vu ka̱nda̱ruwa̱ lyuci'i nu uvon. Reve vu ronoo yi uɓaɓu a̱ ka̱nda̱ruwa̱, a̱vu vu ɓolotowo yi ma̱bula̱ ma na a kumba uɓaɓu. A̱vu waru a̱ va̱la̱a̱ yi a̱ ka̱nda̱ruwa̱, a̱vu waru vu yuwaan yi a̱kpa̱mkpa̱la̱ a gbagbain o wuɓosuso a̱ ka̱nda̱ruwa̱. 3 A̱vu vu tara apara a̱ rumu, reve vu zuwa yi tsu uɓaɓu e memere ma̱ wu na̱ lyuci'i. A̱vu vu vadala urewesu wa̱ wu a̱ ka̱lyuwusa̱ yi, reve vu zuwa yi wo o'wo she damma a̱ ka̱nda̱ruwa̱ yi ta̱ nu uvon, a̱vu vu ka̱nda̱ruwa̱ yi nu uvon. A̱yi nda iroci i ɗa a̱ tyo o u'wa wa Isra'ila. 4 Reve vu von nu upasu wu ukere ugula̱ reve vu zuwa iwuya yu u'wa wa Isra'ila a̱ lipu va̱ wu. A̱bunda̱ a rana na vu voyin e eɓele'e vu ta tanu iwuya ya aza a Isra'ila. 5 Adama a na n zuwaa wu ta̱ rana la̱nga̱, rana ukpaku uta'atsu na̱ kupakucci (390) una̱ta̱ na̱ a̱bunda̱ a a'wan vo oforo e le. Adama o ndolo vu ta yuwan mantsa mo ndolo utanuwu na a'wan o unusu wu u'wa wa Isra'ila. 6 Na̱ vu koto ili i nda, a̱vu vu vowison, agba a mantsa ma nda o ukere usa'ani, vu tanu iwuya yu u'wa wa Yahuda. N zuwaa wu ta̱ a'wan amunga, urana u ta̱ o una̱ wa aa'wan ta̱. 7 Reve vu vadala urewesu wa̱ wu a̱ ka̱lyuwusa̱ uka̱nda̱ruwu wa̱ Urishelima nu uvon. Ne ekere a̱ wu lya̱nga̱ vu yuwan adanshi e ili i vama i na yaa fara na̱ a̱yi elime. 8 Uwwa nda, n ta̱ nla̱ wu na amunga adama vu gura vadala eeɓele wan, hali she na̱ vu koto a̱bunda̱ a rana vu uka̱nda̱ruwusa̱ wa̱ Urishelima nu uvon va̱ wu. 9 Vu tara yitabo no oroci a yitabo na aluba na aluba e mere'on na̱ ya̱nji ni itawan. A̱vu vu ɓolo le e medele mo utomo, a̱vu vu yuwaan aciya̱wu opopofu ne ele. A̱yi ɗa va̱ da̱na̱ a tamusa a̱tsuma̱ a rana ukpaku uta'atsu na̱ kupakucci (390) na va̱a̱ da̱na̱ nven e eeɓele a̱ wu'u. 10 Vu kunzu makundatsu ushin me shekel me ilyalya i na vaa lyuwa urana suru. Vu lyuwa yi mantsa mantsa. 11 Waru vu kunzu medele ma̱ mini ma na voo sowo. Vu sowo yi mantsa mantsa. 12 Vu ta tama yi tsa akala o oroci a yitabo. Vu kangala yi e esu e le a akina a na a zuwai na̱ a̱ya̱n a ama.>> 13 A̱vu A̱sulazuva a damma, <<Ne ɗa aza a Isra'ila aa tama opopofu e idaba e le a̱tsuma̱ a nɗa n na mee bete'we le a̱ tyo.>> 14 Reve n damma, <<Ne ɗa shi, A̱sulazuva Zagbain! Koto n lungusa̱ aciya̱va̱ shi. Diga o u'ya̱wun u va̱ hali a̱ tyo gogo koto n tama ili i na i kuwa̱i na aciya̱yi ko ili i na nama vu una vu karai shi ko ke'en. Ko nama vi idaba koto uwa o una̱ u va̱ shi.>> 15 Reve u usu mu, <<Ka̱lyuwa̱, n ta zuwa wu vu kangala opopofu na̱ a̱ya̱n e inan o una̱ wa̱ a̱ya̱n a vuma.>> 16 Reve u dammisa mu, <<Mawun ma vuma, uwwa, n to koɗo ure u ma̱ tsura̱ me ilyalya a̱tsuma̱ a̱ Urishelima. A ta lyuwa ilyalya ukunzuwu na̱ wovon, reve o sowo mini ukunzuwu wuda'un. 17 Adama o ulambu wi ilyalya na̱ mini a̱ ta̱ ka̱lyuwula̱i wuda'un, reve a shama adama o unusu u le.>>