1 Ukere wa̱ A̱sulazuva u ta̱ oɓolo na̱ a̱mu, wu uta̱a̱ mu ta̱ nu ucira u ruhu va̱ yi, reve u cipa̱to mu e memere mo uɓaa, uɓaa'a gba u ta̱ tapu ne etele. 2 A̱vu u ka̱nda̱ruwa̱ na̱ a̱mu a̱tsuma̱ e le suru, reve me ene uɓaa'a tapu ne etele o 'yewu a̱bunda̱. 3 Reve we ece, <<Mawun ma vuma etele a nda a ta gura ka̱mba̱ wuma?>>

Reve a̱mu gba n usu n damma, <<A̱sulazuva Zagbain a̱vu ɗa goon vu revei.>> 4 Reve u damma mu, <<Vu yuwan adanshi aci e etele a nda. Vu damma le, <A̱ɗu etele o 'yewu, uwwai adanshi A̱sulazuva!> 5 Apa ili i na A̱sulazuva Zagbain dammai etele a nda. N ta zuwu wivuwun u wuma i uwa a̱tsuma̱ a̱ le, a̱ɗu gba i ta ka̱mba̱ wuma. 6 N ta zuwaa ɗu aruva, reve n zuwa inama i lipu i pala ɗu. A̱vu waru n zuwa ukwan u lipu u pala ɗu a̱vu n zuwa wivuwun u wuma a̱tsuma̱ a̱ ɗu, a̱ɗu gba i ta̱ ka̱mba̱ wuma. Ɗaɗa yee reve a̱mu A̱sulazuva.>> 7 Reve n yuwan adanshi e ikaka cine a damma numu n yuwan. Ana n yuwain adanshi, reve a uwwa ilama na̱ ma̱zungwa̱. A̱vu etele'e o ɓoluloi, reve eetele suru o ɓolo uba̱ta̱ u na wu ntsayi u ɓolo. 8 Ana n ka̱lyuwa̱i, reve me ene aruva aci e le, waru inama i lipu i pala le ta̱ ɗe. Waru ukwan u lipu u pala ta̱ ɗe etele'e, agba a̱ ri e ivuwusan shi. 9 Reve u damma mu, <<Vu yuwan adanshi aci o upepu uwivusan u wuma. Mawun ma vuma, yuwan adanshi vu damma wivuwun u wuma, a̱mu A̱sulazuva A̱sula̱ a̱mu ɗa n dammai. A̱vu wivuwun u wuma, vu ta̱wa̱ diga eɓele a̱ na̱shi, vu cipa̱a̱ a̱kwa̱kwa̱ a nda adama a̱ ka̱mba̱ wuma. 10 A̱vu gba n yuwan adanshi e ikaka cine a damma numu n yuwan. Reve wivuwun u wuma u uwa a̱tsuma̱ e le, reve a̱ ka̱mba̱ wuma. Reve a̱ 'yon a isawan a ana a̱ le na aciyele. Reve o o'wo a̱ba̱jini oɓolo a̱za̱ o uvon.>>

11 Reve u damma mu, <<Mawun ma vuma, etele a nda u'wa wa Isra'ila u ɗa suru. Ele ɗa nda a dansa, a na <Etele a̱ tsu e 'yewe ta̱ suru, tsu uta̱a̱ ta̱ okolo a tarasa a na o kototo tsu ta̱ ɗe suru.> 12 Adama o ndolo, vu yuwan adanshi vu damma, <A̱mu A̱sulazuva Zagbain a̱mu ɗa n dammai, ama a̱ va̱, n ta̱ kpa̱tu'wa̱ ason reve mu uta̱a̱ ɗu a̱tsuma̱ e le. N ta̱ ka̱mba̱to ɗu a̱tsuma̱ e iɗa ya Isra'ila. 13 Ɗaɗa yee reve a na a̱mu ɗa A̱sulazuva, nna̱ n kpa̱tu'wa̱ ason a̱ ɗu reve waru mu uta̱a̱ a̱tsuma̱ e le ama a̱ va̱. 14 N ta zuwa ruhu va̱ a̱tsuma̱ a̱ ɗu reve i ka̱mba̱ wuma. N ta zuwa ɗu a̱tsuma̱ e iɗa i ɗu. Ɗaɗa yee reve a na a̱mu A̱sulazuva na̱ n yuwain adanshi, n tsu yuwan ta̱ ili i na n dammai. A̱mu A̱sulazuva a̱mu ɗa n dammai.> >>

15 Reve adanshi A̱sulazuva a̱ ta̱wa̱ ya̱'a̱ va̱ a dansa, 16 <<Muwun ma vuma, vu tara aaɗanga. Vu yuwan iɗana a aaɗanga'a vu damma, <Adama a Yahuda oɓolo na ama a Isra'ila aza a na o ɓoloi aci na̱ a̱yi.> Vu da̱shi tara aaɗanga o ro vu ɗana aci a̱ yi a na, <Adama a̱ Isuhu aaɗanga a Ifiramu, nu u'wa wa Isra'ila aza a na o ɓoloi aci na̱ a̱yi.> >> 17 Vu ɓolo aɗanga e re'e o o'wo aaɗanga a̱ ta̱ o ukere wa̱ wu. 18 <<Nna̱ ama a̱ wu a damma wu, <Voo roco tsu urevu wi ili i nda shi?> 19 Vu damma le, apa ili i na A̱sulazuva Zagbain dammai, <N ta tara aaɗanga a̱ Isuhu za na ri o ukere wa Ifiramu oɓolo na̱ gundo va Isra'ila aza a na o ɓoloi aci na̱ a̱yi. N ta̱ ɓolo yi na aaɗanga a Yahuda reve n ka̱mba̱to le aaɗanga a̱ ta̱. Adama o o'wo aaɗanga a̱ ta̱ o ukere u va̱.> 20 Vu guza̱ aɗanga a na vu yuwain iɗana aci e le ama enishe, 21 reve vu damma le, <Apa ili i na A̱sulazuva Zagbain dammai, n ta tara ama a Isra'ila o uta̱ a̱tsuma̱ e iɗa i na a̱ tyo yi suru. N to ɓoloto le a̱ ka̱nda̱ruwa̱ reve n ka̱mba̱to le a̱tsuma̱ e iɗa i le. 22 N ta̱ ka̱mba̱to le iɗa i ta̱ a̱tsuma̱ e iɗa'a zuva vu nsasan mgbagbain ma Isra'ila. Mogono ma̱ ta̱ ma ɗa maa yuwan tsugono tse le suru. A buwa a̱ da̱shi o'wo iɗa i re shi. Waru a̱ da̱shi ne'eshen o'wo na̱ ngono n re shi. 23 A buwa da̱shi lungusa̱ iɗa i le na̱ a̱ma̱li shi na̱ mayan me ili yi idaba i le shi. Waru a̱ da̱shi lungusa̱ aciya̱le na̱ mayan mo unusu ana'a na̱ nfa'an shi. N ta wawa le ekere a̱ nusu le reve n ka̱mba̱to le cece. O to o'wo ama a̱ va̱, a̱mu waru n to o'wo A̱sula̱ e le.>

24 << <Aagbashi a̱ va̱ Da̱wuda ta yuwan tsugono aaci e le. Suru nle a̱ ta̱ da̱na̱ na̱ za va aaguɓa ta̱. A ta̱ guza̱ wila̱ u va̱ reve o toni le ulobonu. 25 A̱ ta̱ da̱nu a̱tsuma̱ e iɗa i na n cayi aagbashi a̱ va̱ Yakubu, uba̱ta̱ u na nkaya nle n da̱nuyi. Ele na̱ muwun nle na̱ muwun ntsukaya nle, a̱ ta̱ da̱nu ɗe hali uvaɗi u koto. Da̱wuda aagbashi a̱ va̱ a ɗa wo o'wo mogono ma̱ le hali uvaɗi u koto. 26 N ta yuwan nzuwulai vu nden ma asuvu ne ele. N ta zuwa nzuwulai nda n da̱na̱ lo hali uvaɗi u koto. N ta zuwa le waru n ta̱ da̱shi le a̱bunda̱. Waru n ta̱ shiwa̱n nda̱na̱ta̱ n va̱ ma akiza n na n ri n koto shi. 27 Nda̱na̱ta̱ n va̱ n ta̱ da̱na̱ e memere ma̱ le. N to o'wo A̱sula̱ e le, ele waru o to o'wo ama a̱ va̱. 28 Ɗaɗa ama e reve a na a̱mu A̱sulazuva a̱mu ɗa n ka̱mba̱toi Isra'ila cece. A mantsa ma na n shuwa̱i nda̱na̱ta̱ n va̱ n na ri n koto shi.> >>