1 <<Mawun ma vuma, vu yuwan adanshi e ikaka ya̱ A̱sula̱ a aci a Gog vu damma, <Apa ili i na A̱sulazuva Zagbain dammai, N ta̱ nla̱ngi na̱ a̱vu Gog. Mogono ma Mesheke na̱ Tubala! 2 N ta vadala wu reve n zuwa wu elime. N ta̱ ta̱wa̱to wu diga e iɗa ya alanga yu ugana a̱vu n 'ya̱wa̱to wu a nsasan ma Isra'ila. 3 Ɗe ɗa maa faba utan wa̱ wu o ukere wu ugula̱ reve n zuwa aya a̱ wu a̱ riya̱ diga o ukere u sa'ani wa̱ wu. 4 Vu ta̱ riya̱ zuva vu nsasan ma Isra'ila. A̱vu na̱ a̱soja a̱ a̱bunda̱ a̱ wu suru oɓolo na̱ a̱soja a nɗa n ro aza a na a̱ ri oɓolo na̱ a̱vu. N ta ca lipu va̱ wu wo o'wo ilyalya ya asala ne ekere e inama yu una. 5 Vu ta̱ riya̱ a alanga eteshe, adama a na n yuwan ta̱ adanshi. A̱sulazuva Zagbain ɗa dammai ne. 6 N ta̱ lyungu na akina a aci a Mago waru a aci a aza a na a̱ ri a̱ nden n lafiya e memere ma̱ mini. A̱ ta̱ gba ee reve a na a̱mu ɗa A̱sulazuva.> >>

7 << <N ta lyawa ama e reve ala a akiza a̱ va̱ a̱tsuma̱ a ama a̱ va̱ aza a Isra'ila. M buwa a̱ da̱shi lyawa a tara ala a akiza a̱ va̱ ili ye pere shi. Nɗa n te reve a na a̱mu ɗa A̱sulazuva, Za va Akiza a Isra'ila. 8 Urana'a u ta̱ lo a̱ ta̱wa̱! Ili yi lo i na yee geshe yi shi, u ta̱ lo a̱ ta̱wa̱, A̱sulazuva Zagbain ɗa dammai ne. Urana u nda u ɗa n yuwain adanshi a̱ yi.

9 << <Aza a na a̱ ri nden e ilyuci ya Isra'ila a̱ to uta̱ reve o ɓoloto itana yu uvon. Ele ɗa a̱ra̱ga̱ na̱ a̱tugu e irumu o uvon, na̱ tan na aya na aɗanga ni ibata. Itana i nda i ta yuwan a̱bunda̱, hali a̱ ka̱ra̱ a zuwusa akina ne ele hali a'wan e cindere. 10 Yoo sowo a̱tsuma̱lima̱ e izami yi ɗanga a̱tsumona a na yaa zuwa akina shi. Ko a gasa ɗanga a̱tsuma̱ o ogozo, adama a na a̱ ta̱ da̱na̱ a zuwusa akina ni itana yu uvon. A̱ ta̱ pura̱ itana e ekere a aza a na a̱ pura̱i itana ya̱'a̱ le. A̱ ta̱ pura̱ akunda e itana i le aza a na a̱ pura̱i ya̱'a̱ le. A̱sulazuva Zagbain ɗa dammai ne.

11 << <O urana u ndolo n ta ca Gog uba̱ta̱ a̱ a̱ciɗa̱ a̱tsuma̱ a Isra'ila. N ta ca le uba̱ta̱ o ure u na aza a mmalu o tsu toni a̱ tyo o uɓaa wa asana u mala*. Uba̱ta̱'a̱ u to to ure u na aza a mmalu o tsu toni adama a na uba̱ta̱ u ɗaɗa a̱ ciɗo Gog na̱ a̱soja a̱ a̱bunda̱ a̱ yi suru. A̱ ta̱ ɗe uba̱ta̱'a̱ uɓaa wa Hamon Gog, za na ri nu urevu waru Uɓaa wo oɓolo wa̱ a̱za̱ o uvon wo Gog. 12 U'wa wa Isra'ila u ta yuwan woto cindere a̱ ciɗosu a̱kwa̱kwa̱ a̱ a̱soja o Gog adama a̱ ka̱mba̱to iɗa'a cece. 13 Ama e iɗa'a suru a ta yuwan ulinga wa̱ a̱ciɗa̱ wa̱ a̱kwa̱kwa̱'a̱. Urana u na n tsura̱i tsugbain, u to o'wo le urana wu ucuwusan. A̱sulazuva Zagbain ɗa dammai ne. 14 O ukosu u woto cindere'e, a ta ɗangwa ali aza aa na a yuwan woto cindere o tonishi ba̱ta̱ suru a̱tsuma̱ e iɗa'a e izami ya̱ a̱kwa̱kwa̱ adama a̱ ciɗo a̱kwa̱kwa̱ a̱ a̱soja a na a̱ ta̱wa̱i uvon reve a̱ kuwa̱ a̱tsuma̱ e iɗa'a. Ne ɗa a̱ ka̱mba̱to iɗa'a cece. 15 A mantsa ma na a̱za̱ e izami'i o toniyi a̱tsuma̱ iɗa'a, za na e enei etele a vuma reve u zuwa urotsu uba̱ta̱'a̱, tsa̱ra̱ a̱za̱ a̱ ciɗa e ene reve a tara a̱ 'ya̱wa̱ a̱ ciɗo o Uɓaa wa Hamon Gog. 16 Lyuci ta̱ da̱na̱ lo uba̱ta̱'a̱ za na a̱ tsu ɗe Hamona za na ri nu urevu oɓolo a̱ a̱za̱ o uvon. Ne ɗa a̱ ka̱mba̱to iɗa'a cece.>

17 <<Mawun ma vuma, apa ili i na A̱sulazuva Zagbain dammai, vu yuwan adanshi na̱ cu'un manunu suru ni inama yu una suru, vu damma, <I ɓoloto uba̱ta̱ suru, reve i ta̱wa̱ uba̱ta̱ a̱ a̱buki a̱ kucci za na moo foɓuso adama a̱ ɗu. A̱buki a gbain a ɗa zuva vu nsasan ma Isra'ila uba̱ta̱ u na yaa tama inama reve waru i sowo mpasa. 18 I ta tama inama ya ama aza a tsugbain. Reve i sowo mpasa mu ngono mu uvaɗi aza a na o unai cine a tsu paɗa inama i na a tsu yuwaan kucci, inama tsa̱ a̱giri'i na̱ mukyokyon na̱ mugbele no ogono e inan a̱za̱ a̱ lipu icu'un ya Bashan. 19 I ta tama mani'in, she nu wu uta̱ ɗu a aci. I to sowo mpasa hali she na̱ yo o'wo usowu uba̱ta̱ u mayan ma̱ kucci u na mo foɓusoo ɗu. 20 I ta̱ cuwa̱n a apada a alya e ilyalya i va̱ ni inama yi ido na aza a na a kumbusa le. Ni inama ya aza a na a gurai uvon na̱ cu'un soja suru. A̱sulazuva Zagbain ɗa dammai ne.>

21 <<Na̱ ne ɗa moo roco tsugbain tsa̱ va̱ a̱tsuma̱ a nɗa. Ama a nɗa suru e te ene uge'etosu u na n yuwain waru ni ili i na n yuwain. Waru nu ucira u na n rocoi a aci e le. 22 Diga o urana u ndolo a̱ 'ya̱wa̱, u'wa wa Isra'ila u te reve a na a̱mu ɗa A̱sulazuva A̱sula̱ e le. 23 Ama a nɗa e te reve a na ama o u'wa wa Isra'ila a̱ 'ya̱wa̱ ta̱ tsugbashi adama a̱ nusu le, adama a na a 'yuwan ta̱ a̱ guza̱ mu. A̱yi ɗa i zuwai m palai urewesu u va̱ diga ya̱'a̱ le a̱vu n ca le e ekere a n'yuwatan n le. Reve gba o una le suru na̱ matsun me pe'eni. 24 N tsupa le ta̱ o una̱ wu nshinda̱ n le na adama a̱ nusu le. A̱vu gba n soko le urewesu u va̱.

25 <<Adama o ndolo, apa ili i na A̱sulazuva Zagbain damma, gogo n ta̱ ka̱mbuwa̱a̱ Yakubu na aba'un a̱ yi, reve n roco u'wa wa Isra'ila iliyali i va̱, adama a na n ta̱ tsushu'un n ca ala a Akiza a̱ va̱ tsugbain. 26 A ta uwwa wono wa aciya̱le adama e ili i wono i na a yuwain a̱ tyo ya̱'a̱ va̱. A mantsa ma na a yuwain nden ma alafiya a̱tsuma̱ e iɗa i le, agba za ro a ca le wovon shi. 27 A mantsa ma na n ka̱mba̱to nle diga a nɗa reve waru m ɓoloto le diga a nɗa mu n'yuwatan n le, ya̱'a̱ le ɗa moo roco akapi a nɗa a na a̱mu za va akiza ɗa. 28 Ɗaɗa ee reve a na a̱mu ɗa A̱sulazuva A̱sula̱ e le za na keɓe nle a̱ 'ya̱wa̱ tsugbashi a̱tsuma̱ a nɗa. N to ɓoloto le e iɗa i le. N ri gba a lyawa ko za ta̱ le a̱tsuma̱ e iɗa i ro shi. 29 M buwa a̱ da̱shi pala urewesu u va̱ uba̱ta̱ u le shi adama a na n ta̱ tsun Ruhu va̱ o u'wa wa Isra'ila. A̱sulazuva Zagbain ɗa dammai ne.>>