1 Adanshi a̱ A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma, zuwa urewesu wa̱ wu a̱ tyo upasu wa aza a Amon waru vu yuwan adanshi e ikaka ya̱ A̱sula̱ aci e le. 3 Vu damma le, <Uwwai adanshi a A̱sulazuva Zagbain. Apa ili i na A̱sulazuva Zagbain dammai, Adama a na i damma ta̱ <<Mm!>> a aci a̱ a̱a̱'isa̱ a̱ va̱ mantsa ma na u la̱nga̱i, waru a aci e iɗa ya Isra'ila ana a̱ ka̱mbuwa̱ niyi okongo, na a aci o u'wa wa Yahuda ana a̱ pura̱ nle a̱ 'ya̱wa̱ tsugbashi. 4 Adama o ndolo n ta ca ɗu e ekere a ama a asana yo o'wo za le. A ta yuwan va̱la̱ta̱ le reve a yuwan ogodo e le a̱tsuma̱ a̱ ɗu. A ta lyuwa matsun vu ɗanga ɗu waru o to sowo maani ma̱ ɗu. 5 N ta̱ ka̱mbuwa̱ Raba uba̱ta̱ wa alyuna adama a arakumi waru Amon wivuwatan adama e ikyon. Ne ɗa yee reve a na a̱mu ɗa A̱sulazuva. 6 Adama a na apa ili i na A̱sulazuva Zagbain dammai, Adama a na i ɓasa ta̱ ekere a̱ ɗu waru i yuwan uje'en na ana a̱ ɗu, a yuwusan ma̱za̱nga̱ adama a na i roco ta̱ tsushu'un tsa̱ ɗu a̱ tyo e ekere e iɗa ya Isra'ila. 7 Adama o ndolo n ta̱ buba̱ruwa̱ ukere u va̱ a aci a̱ wu, waru n ta ca wu e ekere a nɗa tse itana i na a̱ pura̱i uba̱ta̱ o uvon. N ta tawa ɗu diga a nɗa a̱vu n tasa ɗu a̱tsuma̱ a ama. N to kototo ɗu a̱vu i reve a na a̱mu ɗa A̱sulazuva.> >>

8 <<Apa ili i na A̱sulazuva Zagbain dammai, <Adama a na Mowa na̱ Seyi a damma ta̱, <<Ka̱lyuwa̱ a̱yi ɗa nda u'wa wa Yahuda u ka̱mba̱i tsa akapi a nɗa suru.>> 9 Adama o ndolo n ta zuwa a̱ pa̱lu'wa̱ eɓele a̱ Mowa diga e ilyuci i gbain ya̱ yi, Bet Jeshimo na̱ Ba'al Meyo na̱ Kiriyatayim, aza a na ele ɗa tsugbain tsi iɗa'a. 10 N ta ca Mowa oɓolo na aza a Amon e ekere a ama upasu wa asana o o'wo za le, tsura̱ a̱ da̱shi cuwan na aza a Amon a̱tsuma̱ a nɗa wan. 11 Waru n ta ca aza a̱ Mowa a̱tsuma̱lima̱. Ne ɗa ee reve a na a̱mu ɗa A̱sulazuva.> >>

12 <<Apa ili i na A̱sulazuva Zagbain dammai, <Aza a Edom tsupa ta̱ u'wa wa Yahuda waru u yuwan ta̱ unusu u gbain a na u yuwain ne. 13 Adama o ndolo apa ili i na A̱sulazuva Zagbain a damma, n ta̱ buba̱ruwa̱ ukere u va̱ a aci a Edom reve mu una ama ni iliyamunga i le. N ta̱ ka̱mbuwa̱ le okongo, diga Teman a̱ tyo Dedan a̱ to una le na̱ matsun me pe'eni. 14 N ta tsupa aza a Edom nu ukere wa ama a̱ va̱ aza a Isra'ila, waru a ta yuwan na̱ Edom cine upan u va̱ nu upan wu usuɗuwu u va̱ u ri. E te reve atsupu a̱ va̱, A̱sulazuva a Zagbain ɗa dammai ne.> >>

15 <<Apa ili i na A̱sulazuva Zagbain dammai, <Aza a Filistiya a tsupa ta̱, a yuwan atsupu na̱ tsushu'un tsa̱ a̱ca̱pa̱, tsa̱ra̱ o kototo Yahuda, 16 adama o ndolo apa ili i na A̱sulazuva Zagbain dammai, uwwai nda, n ta̱ buba̱ruwa̱ ukere u va̱ a aci a aza a Filistiya. Waru n ta tawa aza a Keretiya, a̱vu n kototo akapi a na a buwai na̱ nden e ikyun i mala. 17 N ta tsupa le nu usuɗuwu reve n ca le a̱tsuma̱lima̱ nu upan wu usuɗuwu u va̱. Na̱ n tsupa a aci e le ne ɗa ee reve a na a̱mu ɗa A̱sulazuva.> >>