1 Reve adanshi a̱ A̱sulazuva a̱ ta̱wa̱ ya̱'a̱ va̱, 2 <<Mawun ma vuma yuwan adanshi e ikaka ya̱ A̱sula̱ a aci a aza aguɓa a Isra'ila, vu damma le, <A̱ɗu aza a aguɓa a Isra'ila, a̱mu A̱sulazuva Zagbain n damma ta̱, woo yo'ono ɗu shi, woo yo'ono ɗu shi, a̱ɗu aza aguɓa a ama a Isra'ila, a̱ɗu na i ri a aguɓa a aciya̱ɗu goon! Za va aguɓa ɗa wu ntsayi u yuwan aguɓa e ikyon shi? 3 I ta lyuwusa mani'in me le, waru i ta yuwusaan aciya̱ɗu a̱tugu ne eleme e le. I ta paɗasa ikyon i na a̱ ri na̱ lipu, agba i yuwan aguɓa e ikyo'on shi. 4 I gbamato aza a na a̱ ri nu ucira shi, i ka̱mba̱to aza a na a̱ ri ubanakun gbaga shi, waru yi nla̱ aza a na a kuɗai shi, i ka̱mbuwa̱ aza na a̱ puwa̱yin shi ko i izami le shi. Agba nu ucira u lipu u ɗa nu usuɗuwu yaa yuwusan tsugono tse le. 5 Adama o ndolo a ɗa e bete'wei o ulambu wu za va aguɓa. Reve o o'wo ilyalya yi inama yu una. 6 Ikyon i va̱ i bete'we ta̱ zuva vu nsasan na agaɗi. E bete'we ta̱ a̱tsuma̱ o uvaɗi ma̱ɓula̱, agba za lo na bingiyi ko u zami le shi.

7 << <Adama o ndolo, a̱ɗu aza a aguɓa, uwwai adanshi A̱sulazuva, 8 a̱mu A̱sulazuva Zagbain n damma ta̱, ikyon i va̱ i ɗa nda o o'woi ili yu ugenge e ekere e inama yu una adama o ulambu wu za va aguɓa. Agba aza aguɓa'a a bunga̱ ikyon i va̱ shi, amma a ta aguɓa aciyele, a yuwan aguɓa e ikyon i va̱ shi. 9 A̱ɗu aza a aguɓa, uwwai adanshi A̱sulazuva. 10 Apa nda ili A̱sulazuva Zagbain a dammai, n ta̱ a̱ nla̱ngi na aza aguɓa, waru n ta zami ikyon i va̱ e ekere a̱ ɗu. N ta putsa ɗu na aguɓa e ikyo'on, i buwa gba a̱ da̱shi yuwan aguɓa aciya̱ɗu shi. N ta wawa ikyon i va̱ e ekere a̱ ɗu tsura̱ a̱ da̱shi o o'wo ilyaya i ɗu wan. 11 <<Adama a na apa ili i na A̱sulazuva Zagbain a dammai, a̱mu na aciya̱va̱ ɗa maa bingi i ikyon i va̱ waru n ta̱ tsura̱ le na aciya̱va̱. 12 Cine za va aguɓa tsu zami ikyon ya̱ yi a mantsa ma na e bete'wei ne ɗa a̱mu maa zami ikyon i va̱. N ta wawa le, waru n ka̱mba̱to le diga a̱ ba̱ta̱ na e bete'we nle suru o urana we eleshe na̱ a̱tsuma̱ e irumbu. 13 N to uta̱a̱ le diga a̱tsuma̱ a nɗa reve m ɓoloto le diga a nɗa, a̱vu n ta̱wa̱to le a̱tsuma̱ e iɗa i le. N ta lyuwato le a nsasan ma Isra'ila no o ɗolu, na̱ a̱ ba̱ta̱ na ama'a a̱ ri nden a̱tsuma̱ e iɗa'a suru. 14 N ta̱ lyuwato le uba̱ta̱ wa alyuna u sa'ani. Nsasan ma Isra'ila n to o'wo uba̱ta̱ wa alyuna u le. Ɗe ɗa oo von o uba̱ta̱ wa alyuna u sa'ani. A ta yuwan alyuna a alya a sa'ani a nsasan ma Isra'ila. 15 A̱mu na aciya̱va̱ a ɗa moo o'wo za va aguɓa e ikyon i va̱, n 'ya̱wa̱to le uba̱ta̱ u na ee ivuwan. A̱sulazuva Zagbain ɗa dammai ne. 16 N ta zami aza a na a̱ puwa̱yin, waru n ka̱mba̱to aza a na a tsulai. Reve mu nla̱ aza a na a kuɗai, reve n gbamato aza a na a̱ ri nu ucira shi. Amma n ta̱ lungusa̱ a̱za̱ o ucira na̱ a̱za̱ a̱ lipu. N ta yuwan aguɓa e ikyon i va̱ na̱ a̱ɓula̱.

17 << < <<Apa ili i na A̱sulazuva Zagbain dammai, a̱ɗu oɓolo e ikyon i va̱, n ta̱ ge'eto kyon na̱ kyon, waru n ta̱ ge'eto a̱giri'i na̱ nga̱ji. 18 Wuntsa ɗu i yuwan alyuna a alya a sa'ani shi? U tu ulobonu i dadasa alya a na a buwai na ana a̱ ɗu? Wu ntsa ɗu na i sowoi mini ma akiza shi, u tu ulobonu i lukuta̱ mini ma na ma buwai na ana a̱ ɗu? 19 A̱ yindi i ɗu, she ni ikyon i va̱ i 'yuwan a ciga a tama ili i na yi dasai na ana a̱ ɗu waru o sowo mini ma na i lukuta̱i na ana a̱ ɗu?

20 << < <<Adama o ndolo apa ili i na A̱sulazuva Zagbain damma nle, a̱mu na aciya̱va̱ a ɗa mee ge'eto ikyon i lipu na arambi e ikyon. 21 Ana wo o'woi a̱ɗu a̱za̱ a̱ lipu, i ta̱ keɓushe aza a na a̱ ri nu ucira shi na avangaci a̱ ɗu, waru i ta zuzumusa̱ le na avana a̱ ɗu hali i baza le, 22 N ta wawa oɓolo e ikyon i va̱. A̱a̱ da̱shi o'wo ili yu ugenge e ekere a za ro waru shi. Waru n ta̱ ge'eto kyon na̱ kyon. 23 N ta zuwaa le za va aguɓa ta̱, aagbashi a̱ va̱ Da̱wuda. A̱yi u ta lyuwato le reve wo o'wo za va aguɓa le. 24 A̱mu A̱sulazuva n to o'wo A̱sula̱ e le. Aagbashi a̱ va̱ Da̱wuda o to o'wo mogono ma̱ le.>> A̱sulazuva Zagbain ɗa dammai ne.

25 << <N ta yuwan akucunu a asuvu nden ne ele. Waru n to loso inama yu una a̱za̱ o ulungusu a̱tsuma̱ e iɗa'a adama ikyon i va̱ i da̱nu gbaga a̱tsumona. Reve waru e ivuwan a̱tsuma̱ o ogozo gbaga. 26 N ta zuwaa le aba'un na̱ ba̱ta̱ na ri uka̱nda̱ruwu na agaɗi a̱ va̱. Waru n ta̱ lyungu ni iro'i a mantsa ma̱ yi, u to o'wo iro'i ya aba'un. 27 Ɗanga vu uɗuma̱ a ta matsan muwun mu ɗanga. Iɗa i ta ca limatan vi ili i na a̱ cu'wa̱in. Ama a̱ va̱ a ta yuwan nden fa̱a̱n a̱tsuma̱ e iɗa i le. E te reve a na a̱mu ɗa A̱sulazuva, a mantsa ma na n kuɗai a̱a̱gba̱la̱ o ule'e u le, a̱vu waru n usa le e ekere aza a na a̱ guza̱ nle a̱tsuma̱ a tsugbashi. 28 Aa buwa a̱ da̱shi ka̱mba̱to le agbashi e ekere a nɗa n ro shi. Inama yu una ya̱a̱ da̱shi tama le shi. A̱ ta̱ da̱nu e iɗa'a gbaga, za lo na aa dada'waton le shi. 29 N ta zuwa a̱ɗuma̱ e le a matsan lon adama ambulu a̱ da̱shi lyuwa le a̱tsuma̱ e iɗa'a wan. Waru a̱a̱ da̱shi o'wo ili i wisulusa ekere a nɗa n ro shi. 30 E te reve a na a̱mu A̱sulazuva A̱sula̱ e le n to oɓolo ne ele. Waru u'wa wa Isra'ila ama a̱ va̱ a ɗa. A̱sulazuva Zagbain ɗa dammai ne. 31 A̱ɗu ikyon i va̱ i ɗa, ikyon i na n ri aa yuwusan aguɓa e le, a̱mu A̱sula̱ a̱ ɗu a ɗa. A̱sulazuva Zagbain ɗa dammai ne.> >>