1 Reve Ruhu 'ya̱sa̱n mu zuva a̱vu u ta̱wa̱to mu o una̱ntsu wu u'wa wa̱ A̱sulazuva u na wa̱a̱ ka̱lyuwusa̱ asana. Lo o una̱ntsu'u me ene ta̱ lo ama ushin no ozo o ton. Reve me ene a̱tsuma̱ e le Ja'azaniya ulobo wa Azur na̱ Pelatiya ulobo wa Benaya, azagbain a ama. 2 Reve u damma mu, <<Mawun ma vuma, ele nda ele ɗa ama a na oo foɓuso iwuya waru aa casu a̱sa̱la̱ a vama a̱ lyuci gbain nda. 3 Ele ɗa aa dansa, <Mantsa ma masuwa ma 'wa koto ma yuwan zuzu shi? Lyuci nda upondo u ɗa, a̱tsu ɗa gba inama.> >> 4 Adama o ndolo yuwan adanshi e ili i na yaa fara a̱ tyo e ekere e le, a̱vu mawun ma vuma. 5 Reve Ruhu va̱ A̱sulazuva cipa̱a̱ mu, reve u damma mu n damma, <<Apa nda ili i na A̱sulazuva a dammai, ne ɗa yaa yuwusan majiyan, u'wa wa Isra'ila. N reve ta̱ ili i na i ri o okolo a̱ ɗu. 6 Yu una ta̱ ama a̱ a̱bunda̱ a̱ lyuci nda, a̱vu i shiton re gbain va̱ yi na̱ a̱kwa̱kwa̱.>> 7 <<Adama o ndolo apa ili i na A̱sulazuva Zagbain dammai, a̱kwa̱kwa̱ a na yo ocoi pe'e ele ɗa inama, lyuci'i waru a̱yi ɗa upondo. Agba n ta̱ gba̱ra̱ ɗu o uta̱ pe a̱tsuma̱ a̱ yi. 8 Yu uwwa ta̱ wovon u matsun me pe'eni, agba matsun me pe'eni ma ɗaɗa ma̱a̱ ta̱wa̱a̱ a aci a̱ ɗu, A̱sulazuva Zagbain ɗa dammai ne. 9 N ta̱ gba̱ra̱ ɗu o uta̱ a̱tsuma̱ a̱ lyuci'i reve n ca̱co ɗu e ekere o omocin, a̱vu n ge'eto ɗu. 10 A̱ to una ɗu na̱ matsun me pe'eni. N ta̱ gba e ge'eto ɗu hali a̱ tyo o utyo wi iɗa ya Isra'ila, reve i reve a na a̱mu ɗa A̱sulazuva. 11 Lyuci nda woo o'wo ɗu upondo shi, ko gba yo o'wo inama pe a̱tsuma̱ a̱ yi shi. N ta̱ gba e ge'eto ɗu o utyo wi iɗa ya Isra'ila. 12 Reve i reve a na a̱mu ɗa A̱sulazuva, adama a na i kuru ili i na n zuwai shi ko i guza̱ wila̱ u va̱ shi, amma a̱vu i pura̱ ili i na nɗa n na n ri uka̱nda̱ruwu na̱ a̱ɗu maa yuwusan.>> 13 Reve a̱mu ubuwu a dansa ili i na yaa fara, a̱vu Pelatiya ulobo wa Benaya u kuwa̱. Reve n riya̱ ma̱kpa̱ɓa̱ n saala nu uɗyo zuva, a̱vu n damma, <<A̱sulazuva Zagbain! Vu ciga ta̱ vu kototo akapi a Isra'ila a na a pasai suru suru?>> 14 A̱vu adanshi a̱ A̱sulazuva a̱ ta̱wa̱ ya̱'a̱ u damma, 15 <<Mawun ma vuma, a̱za̱ a̱ wu, a̱za̱ a̱ wu a na i ri mpasa n ta̱, na ama o u'wa wa Isra'ila suru, ele aza a na aza a na a̱ ri nden Urishelima a dansa yi, <A yuwan ta̱ alanga na̱ A̱sulazuva, a̱tsu ɗa a cayi iɗa inda wo o'wo za tsu.> >> 16 Adama o ndolo damma, <<Apa ili i na A̱sulazuva Zagbain dammai, ko na n ca̱co nle alanga a̱tsuma̱ ama, waru ko na m bete'we nle a̱tsuma̱ a nɗa, suru na̱ ne mo o'wo le ta̱ A̱a̱'isa̱ a mantsa wa'a a̱tsuma̱ a nɗa n na a̱ tyoi.>> 17 Adama o ndolo vu damma, <<Apa ili i na A̱sulazuva Zagbain dammai, n to ɓoloto ɗu diga a ama a̱vu n ka̱mba̱to ɗu diga a nɗa n na e bete'we nɗu, a̱vu n cayisa ɗu iɗa ya Isra'ila.>> 18 <<Mantsa ma na a̱ ka̱mba̱i e iɗa'a a ta tawa ma'an vi idaba ni ili yi idaba i na i ri pe. 19 N ta ca le okolo a̱ ta̱, a̱vu n zuwa ruhu sa'avu a̱tsuma̱ e le. N to foɗo okolo a atali a̱ lipu le a̱vu n ca le okolo a nama. 20 Ne ɗa a̱ kuru ili i na n zuwai a̱vu a̱ guza̱ wila̱ u va̱. O to o'wo ama a̱ va̱, a̱vu a̱mu mo o'wo A̱sula̱ e le. 21 Amma aza a na a zuwai okolo e le a̱ kurusu ma'an vi idaba i le ni ili yi idaba i le, n ta̱ ta̱wa̱a̱ a aci e le ili i na a yuwain, A̱sulazuva Zagbain ɗa dammai.>> 22 Reve nan kerobobi'i a̱ 'ya̱sa̱n evelu e le oɓolo na̱ a̱ga̱nda̱mu e eɓele e le na̱ tsugbain tsa̱ A̱sula̱ a Isra'ila uva̱lu zuva le. 23 Reve tsugbain tsa̱ A̱sulazuva tsa̱ ka̱ra̱ a gawan diga e memere ma̱ lyuci'i reve wi isawan zuva masasan ma na ma̱ ri asana a̱ lyuci'i. 24 Reve Ruhu sheɗe mu a̱tsuma̱ a alavu alavu a̱vu u tyowetyo mu Babila uba̱ta̱ wa aza a na a̱ pura̱i. Reve alavu alavu a na Ruhu va̱ A̱sula̱ roco numu o koto. 25 Reve n damma aza a na a̱ pura̱i ili i na A̱sulazuva o roco numu suru.