1 O urana wu ufaru u woto wa a'wan a kupa na̱ za ta̱, adanshi A̱sulazuva a̱ ta̱wa̱ ta̱ ya̱ va̱, 2 <<Mawun ma vuma, adama a na Taya damma ta̱ adama a̱ Urishelima, <Mm! A̱yi za na ri o una̱ntsu wu nɗa u kuɗa ta̱, u kpa̱tu'wa̱ ta̱ adama a̱ va̱. Gogo na wo o'woi okongo, n ta lyuwa elime.> >> 3 Adama o ndolo apa ili i na A̱sulazuva Zagbain dammai, n ta yuwusan nla̱ngi na̱ a̱vu, a̱vu Taya, waru n ta̱ 'ya̱sa̱n nɗa ma̱ a̱bunda̱ a yuwan nla̱ngi na̱ a̱vu, cine mala ma̱ tsu 'ya̱sa̱n ikeɗu ikeɗu ya̱ yi. 4 O to kototo uɓaɓu wa Taya reve o ɓuɓoso atsura a̱ yi a na a̱ ri mishin. N ta̱ kura ma̱bula̱ ma̱ yi reve n lyawa yi atali can. 5 U to o'wo uba̱ta̱ o u'yetsusu wi igolo i na a̱ tsu remee mugula e memere ma mala, adama a na a̱mu ɗa n yuwain adanshi, A̱sulazuva Zagbain ɗa yuwain adanshi. U to o'wo itana i na a̱ pura̱i uba̱ta̱ o uvon uba̱ta̱ a nɗa. 6 Waru esheli a̱ yi a na a̱ ri a̱ mulyuci n na n ri e iɗa a̱ to una le na̱ matsun me pe'eni. Ne ɗa ee reve a na a̱mu ɗa A̱sulazuva.

7 <<Adama a na apa ili i na A̱sulazuva Zagbain dammai, uwwai nda, n ta̱ ta̱wa̱ na̱ Nebukanaza mogono ma Babila mogono mo ngono diga upasu wu ugana u yuwan nla̱ngi na̱ Taya. U ta̱ ta̱wa̱ oɓolo ni ido ni ikeke yi ido, na aza akumba e ido na̱ a̱soja a̱ a̱bunda̱. 8 U to esheli a̱ yi a na a̱ ri a̱ mulyuci n na n ri e iɗa na̱ matsun me pe'eni. U ta yuwan atsura a na waa kumba uɓaɓu, u to ɓolotowo ɗu a̱jili a na aa kumba, reve a̱ 'ya̱sa̱n a̱a̱ra̱ga̱ e geshe ɗu. 9 U to ɓuɓoso ɓaɓu va̱ wu nu ucira wa̱ a̱a̱kpa̱mkpa̱la̱ o wuɓosu, waru u to ɓuɓoso atsura a̱ wu ni itana yu uvon ya̱ yi. 10 Ido ya̱ yi i ta yuwan a̱bunda̱ hali ma̱buta̱ ma̱ le ma̱ ɓa̱ru wu. Uɓaɓu wa̱ wu u ta̱ jinga̱ɗa̱ adama e elemu e ido yu uvon na̱ a̱ga̱nda̱mu ni ikeke yi ido, mantsa ma na u uwai o una̱ntsutsu wa̱ wu cine a̱soja a tsu uwa a̱ lyuci gbain nu uɓaɓu u na a̱ ba̱ma̱i. 11 No okotsu e ido ya̱ yi ɗa waa dadasa re va̱ wu suru. U to una ama a̱ wu na̱ matsun me pe'eni, waru atsura o ucira a̱ wu o to oco e iɗa. 12 A̱ ta̱ pura̱ utsuru wa̱ wu ni itana ya atsulu na awina ya̱ wu. O to ɓuɓoso ɓaɓu va̱ vu, waru o kototo 'wa sa'ani va̱ wu waru o vuvu atali a̱ wu na akpata na̱ ma̱buta̱ o oco le e memere ma̱ mini. 13 N ta zuwa utyo we elemu e ishipa i ɗu, a̱a̱ da̱shi uwwa mesun me ikumburu i ɗu shi. 14 N ta̱ ka̱mbuwa̱ wu aatali can, vu to o'wo uba̱ta̱ o u'yetsusu wi igolo i na a̱ tsu remee mugula. A̱a̱ da̱shi suwisa wu waru shi, adama a na a̱mu A̱sulazuva n yuwan ta̱ adanshi.>> A̱sulazuva Zagbain ɗa dammai ne.

15 <<Apa ili i na A̱sulazuva Zagbain dammai a̱ tyo ya Taya, Pasu vu nge'en m mala a̱ ta̱ jinga̱ɗa̱ adama e ilama ya̱ a̱risa̱ a̱ wu, na aza a na a uwwai usa̱n a̱ ri a̱ ma̱nga̱ waru mantsa ma na a̱ ri a̱ mona a̱tsuma̱ a̱ wu? 16 Adama o ndolo suru ngono mu nge'en m mala n ta̱ cipa̱ diga o otogu o tsugono tse le ne'en. Reve o foɗo a̱tugu o uga'an e le a̱tugu a sa'ani a na a kalai yu ulinga yu uɗavu. E te je'en lipu lon. A̱ ta̱ da̱nu e iɗa reve a̱ da̱na̱ e meje'en kukuci. A ta da'wan e ekere a̱ wu. 17 Waru a ta yuwan mesun mo ukwa̱ adama a̱ wu reve a damma wu, <Cine tsa ɗa vu puwa̱yin, a̱vu lyuci gbain na e revei na̱ a̱yi uba̱ta̱ suru, a̱vu na vu ri na̱ nden e ikyun i mala, a̱vu na ri nu ucira a mala. I shi ta̱ i zuwa wovon uba̱ta̱ wa aza a na a̱ ri lo nden suru. 18 Gogo nɗa n na n ri na̱ nden e ikyun i mala i te je'en o urana u na va̱a̱ riya̱. Iɗa yi nge'en m mala n ta dada'wan nu uriyu wa̱ wu.> >>

19 <<Apa ili i na A̱sulazuva Zagbain dammai, mantsa ma na n ka̱mbuwa̱i lyuci gbain ookongo, tsa̱ lyuci gbain na a buwai nden pe shi, a mantsa ma na n rumbu nuwu pe a̱ mini ma mala ma̱ a̱ru'un, reve mini ma̱ a̱bunda̱ ma pala wu. 20 Ne ɗa ma̱ tewetyo wu e i iɗa oɓolo na aza a na a̱ tyoi a̱ a̱ka̱ri, uba̱ta̱ wa ama o ufaru. Waru n ta zuwa wu vu da̱nu za̱la̱ vi iɗa, ba̱ta̱ na ri no okongo diga o ufaru, oɓolo na aza a na a̱ tyoi a̱ a̱ka̱ri. Waru va̱a̱ ka̱mbisa̱ ko vu tsura̱ uba̱ta̱ e iɗa ya aza a wuma shi*. 21 N ta zuwa ukosu wa̱ wu wo o'wo ili i wovon waru a̱a̱ da̱shi ene wu shi. A̱ ta̱ bunga̱ wu agba a̱a̱ da̱shi ene wu shi ko ke'en. A̱sulazuva Zagbain ɗa a dammai ne.>>