1 Reve vuma'a u tara mu a̱ tyo upasu wu ugana a uwa o ukowo wa alanga, a̱vu u ta̱wa̱ na̱ a̱mu a asula a na a̱ ri a̱ nka̱la̱la̱i nu ukowo wa̱ A̱a̱'isamapaɗa waru u ri a̱ nka̱la̱la̱i nu uɓaɓu nu upasu wu ugana. 2 Uga'an wi iɗa wu usaa'a u na una̱ntsu wa̱ yi wa̱a̱ ka̱lyuwusa̱ ugana u shi ta̱ udasu ukpaku (100) na̱ washin udasu kupoton. 3 Ugeru u ta̱ wa asula wu usaa u ta̱ ka̱lyuwusa̱ uɓaɓu wa̱ A̱a̱'isamapaɗa na agalaci a na a̱ ri pe na̱ a̱tsuma̱. Ugeru wa asula we ire waru u ta̱ ka̱lyuwusa̱ agalaci a alanga. Ugeru wu usaa'a za ta̱ suru asula a zuva a ta'atsu a ɗa a calai ta̱ ucina̱. Agalaci a na a̱ ri e memere mo usaa o uta̱ na̱ A̱a̱'isamapaɗa, udasu ushin u ɗa. 4 Elime a asula'a ure u shi ta̱ lo washin wa̱ yi udasu kupa nu uga'an e iɗa udasu ukpaku (100). Na̱ntsu le da̱na̱ ta̱ ugana. 5 Ukuruwu u ta̱ biti wu ukuruwu ure wa asula a zuva'a u la'a ta̱ za na ri za̱la̱ va̱ yi uɓoru adama a na ure u na a̱a̱ kuru a katsa zuva u koto ta̱ ure'e. 6 Adama a na a̱ shi ta̱ o ugeru wa ta'atsu, agba a̱ shi na atsura shi cine ukobu u ri shi. Adama o ndolo a ɗa a̱ yuwan nle uka̱la̱mu o ure wi iɗa na aza a na a̱ ri za̱la̱ na̱ memere. 7 Uɓaɓu u ta̱ lo za na kakasai asula'a na agalaci a alanga, u ta̱ a̱ nka̱la̱la̱i na asula'a, uga'an wa̱ yi udasu kupoton. 8 Ugeru wa asula a na a̱ ri a alanga zuzu na agalaci a alanga uga'an u le udasu kupoton. Aza a na gba a̱ ri a̱ nge'en zuzu na̱ a̱a̱'isa̱ uga'an u le udasu ukpaku (100). 9 Za̱la̱ va asula a nda u'uwata u ta̱ lo nu upasu wa asana na vuma aa uwa a asula'a na agalaci a alanga. 10 Upasu wu uyagi wa̱ A̱a̱'isamapaɗa'a ugeru u re wa asula a̱ ta̱ lo uyagi wa agalaci a̱ a̱tsuma̱ e memere ma̱ A̱a̱'isamapaɗa nu ukowo wa alanga. 11 Ure u ta̱ lo e memere ma ugeru we ire cine ure wu upasu wu ugana u ri. Uga'an u le na̱ washin u le u ta̱. U'uwata u le na̱ na̱ntsu le una̱ta̱ u ɗa a̱ ri na̱ za vu ugana'a. 12 Adama o ndolo u'uwata u ta̱ lo o uɓaɓu'u a̱ ka̱lyuwusa̱ na̱ntsu vu usaa va asula'a na̱ za ro waru nu upasu wa asana o ukosu wu ure wu mmalu. 13 Reve u damma mu, <<Asula o ugana na̱ a̱za̱ o uyagi a na a̱ ri a̱ nka̱la̱la̱i na agalaci a̱ A̱a̱'isamapaɗa aza a akiza a ɗa, uba̱ta̱ u na nan ganu a na a̱ ta̱wusa̱ zuzu na̱ A̱sulazuva aa lyuwa kucci na la'ai akiza. Ɗe ɗa aa zuwa kucci na la'ai akiza, ele ɗa kucci vi ishina na̱ kucci matawa mo unusu kucci matara mo unusu, adama a na uba̱ta̱'a̱ u ta̱ na akiza. 14 A mantsa ma na nan ganu a uwwai uba̱ta̱ wa akiza, oo uta̱ pe a uwa a agalaci a alanga shi she no o foɗo a̱tugu a̱ a̱ga̱nda̱ e le. Adama a na a̱tugu a nda aza a akiza ɗa. O to oto a̱tugu a ndana kafu a rawa zuzu nu uba̱ta̱ u na u ri za va ama.>> 15 Ana u kotoi uritosu wi itana i na i ri pe a̱tsuma̱ upasu wa̱ A̱a̱'isamapaɗa'a, reve wu uta̱ na̱ a̱mu nu una̱ntsu wa asana. Reve u rito uba̱ta̱'a̱ suru a̱ ka̱nda̱ruwa̱ A̱a̱'isamapaɗa'a. 16 A̱vu u rito upasu wa asana na aɗanga o uritosu uritowu udasu ukpaku uton (500) wa aɗanga o uritosu. 17 A̱vu u rito upasu wu ugana udasu ukpaku uton (500) wa aɗanga o uritosu. 18 A̱vu u rito upasu wu uyagi udasu ukpaku uton (500) wa aɗanga o uritosu. 19 A̱vu u vadala upasu wa̱ a̱livu a̱vu rito udasu ukpaku uton (500) wa aɗanga o uritosu. 20 Ne ɗa u ritoi ba̱ta̱ vu pasu na̱shi'i suru. U ta̱ nu uɓaɓu a̱ ka̱nda̱ruwa̱ udasu ukpaku uton uga'an wa̱ yi, washin waru udasu ukpaku uton, adama wu kasa uba̱ta̱ wa akiza nu uba̱ta̱ wa ndana.