1 Adanshi a̱ A̱sulazuva a̱ ta̱wa̱ ta̱ uba̱ta̱ u va̱, 2 <<Mawun ma vuma, zuwa urewesu wa̱ wu a̱ tyo Urishelima a̱vu vu yuwan alajiya a aci a̱ a̱'isa̱. Vu yuwan adanshi e ikaka ya̱ A̱sula̱ a aci e iɗa ya Isra'ila. 3 Waru vu damma iɗa ya Isra'ila, <Mpa ili i na A̱sulazuva a dammai, n ta yuwusan nla̱ngi na̱ a̱vu. N ta tala matsun me pe'eni ma̱ va̱ e ibici ya̱ yi waru n to una a̱za̱ a̱ a̱ɓula̱ na̱ a̱za̱ e iwuya a̱tsuma̱ a̱ wu. 4 Adama a na n to una suru a̱za̱ a̱ a̱ɓula̱ na̱ eze e iwuya i ɗu, matsun me pe'eni ma̱ va̱ ma ta tala diga e ibici ya̱ yi a aci a za suru diga uyagi a̱ tyo ugana. 5 Waru vuma suru ta̱ reve a̱mu ɗa A̱sulazuva n tala ta̱ matsun me pe'eni ma̱ va̱ diga e ibici ya̱ yi, waru wa̱a̱ ka̱mbisa̱ shi.>

6 <<Adama o ndolo a̱nga̱ e esu e le, mawun ma vuma, no okolo ukuɗu na̱ a̱tsumola̱ngu a̱bunda̱, yuwan ma̱nga̱. 7 Waru ne e ece wu, <Nye i zuwai vu ri a̱ ma̱nga̱?> Reve vu damma, <Adama a alabari a na a̱ ri lo a̱ ta̱wa̱. Ookolo suru e te jeruwe waru ukere suru u ta̱ kuwa̱, ruhu suru ta̱ lima̱, waru a̱lu suru a̱ ta̱ kuwa̱ tsa̱ mini. U tu lo a̱ ta̱wa̱, amayun waru u ta shiwan A̱sulazuva Zagbain ɗa dammai ne.> >>

8 Waru adanshi a̱ A̱sulazuva a̱ ta̱wa̱ ta̱ ya̱'a̱ va̱, 9 <<Mawun ma vuma yuwan adanshi e ikaka ya̱ A̱sula̱ vu damma, apa ili i na A̱sulazuva a dammai, <Matsun me pe'eni, matsun me pe'eni ma na e tewein waru o gboroi.> >> 10 E tewen yi ta̱ adama a mapaɗa. O gboro yi ta̱ tsa̱ra̱ u dala tse imaɗatsu! << <Tsu ta yuwan ma̱za̱nga̱ na aaɗanga a mawun ma̱ va̱ Yahuda? Matsun me pe'eni'i u tara cu'un vu uɗanga suru ili i ro shi. 11 A ca ta̱ matsun me pe'eni o gboro yi, adama a ɓana yi ugbamu o ukere. E tewen yi ta̱ waru o gboro yi adama u da̱na̱ ufoɓu o ukere wu za mona. 12 Shon a̱vu vo oruwo, mawun ma vuma, adama a na u ta yuwusan nla̱ngi na ama a̱ va̱. U ta yuwusan nla̱ngi na̱ ngono ma Isra'ila suru. A vari le ta̱ a̱ tyo a matsun me pe'eni oɓolo na ama a̱ va̱. Adama o ndolo lapai ma̱ka̱ka̱n.

13 << <Ma̱lyungwa̱ ma̱ ta̱ lo a̱ ta̱wa̱. Nye yaa fara n na aaɗanga a na matsun me pe'eni ma tarai ili shi maa buwa shi? A̱sulazuva Zagbain ɗa dammai ne.>

14 <<A̱vu gba shi, mawun ma vuma, yuwan adanshi e ikaka ya̱ A̱sula̱. Vu ɓasa ekere a̱ wu a̱vu matsun me pe'eni ma̱ cipa̱ toto ure, ee, mantsa ma ta'atsu. Matsun me pe'eni adama a mapaɗa, matsun me pe'eni ma ɗa adama a mapaɗa ma̱ a̱bunda̱, waru u tu uka̱nda̱ruwu ne ele. 15 Adama okolo e jeruwe, waru ama na̱ a̱bunda̱ o oco, n zuwa ta̱ matsun me pe'eni adama a mapaɗa a̱ na̱ntsu le suru. To, a yuwan yi ta̱ adama u dala tse imaɗatsu, a ɓana yi ta̱ adama a mapaɗa. 16 A̱vu matsun me pe'eni, gasa nu uta̱ a̱ tyo wu usa'ani, gasa a̱ tyo ugula̱, uba̱ta̱ u na vu vadalai suru vu gasa. 17 A̱mu fo n ta ɓasa ekere a̱ va̱, waru n to shiton upan u va̱. A̱mu A̱sulazuva a ɗa a dammai ne.>>

18 Adanshi A̱sulazuva a̱ ta̱wisa̱ ta̱ ya̱'a̱ va̱: 19 <<Mawun ma vuma, yuwan iroci yi re ejere adama o uba̱ta̱ u na matsun me pe'eni mo mogono ma Babila ma̱ kuru, suru nle a fara e iɗa i ta̱. Reve vu zuwa urotsu uba̱ta̱ u na ure u ɓatsalai u lyuci'i. 20 Yuwan iroci yu ure u ta̱ adama a matsun me pe'eni a̱ tyo Raba va aza a Amon na̱ a̱ tyo Yahuda, waru a̱ tyo Urishelima lyuci vu uɓaɓu wu ucira. 21 Adama a na mogono ma Babila me isawan ta̱ a nsanji mu ure, uba̱ta̱ u na re re ga'asain, adama u yuwan yindi, u jinga̱ɗa̱sa̱ ta̱ aya, a zamishi a̱sa̱la̱ uba̱ta̱ a̱ a̱ma̱li a̱ yi, a̱ ka̱lyuwusa̱ assuvu ben. 22 O ukere usa'ani, yindi'i u roco yi ta̱ Urishelima, uba̱ta̱ u na u foɓoi a̱kpa̱mkpa̱la̱ a gbagbain o wuɓosuso, adama u ca ure u mona, adama a̱ mesun me iroci yu uvon tsa̱ra̱ u foɓo ili yu uvon a̱ na̱ntsu, adama u ɓoloto a̱jili a̱vu a suwa aburu adama a kumba uɓaɓu adama o uvon. 23 E yeni ya ama a na a yuwaan niyi akucunu u to rotso iroci ye epen, amma u ta cuwaan le unusu u le a̱vu u pura̱ le tsugbashi.

24 <<Adama o ndolo apa ili i na A̱sulazuva Zagbain dammai, <Adama a na i zuwa ta̱ a cuwan nu nusu u ɗu, a na i rocoi aciyogbamu, i kpa̱tu'wa̱i nusu vi ili i na i yuwain suru. Adama a na i yuwain ili i nda, a̱ ta̱ pura̱ ɗu a̱ 'ya̱wa̱ tsugbashi.>

25 << <A̱vu gba za vu iwuya na̱ mogono ma vama ma Isra'ila, za na rana va̱ yi shiwain, mantsa ma̱ wu ma rawa ta̱, mantsa mo oforo a̱ wu ma rawa ta̱. 26 Apa ili i na A̱sulazuva Zagbain dammai, foɗo melezu mo tsugono reve vu ba̱ɗa̱ ookokolo. Wa̱a̱ da̱na̱ tsu ufaru shi: A̱ ta̱ 'ya̱sa̱n aza a na a̱ ka̱ɗa̱toi, reve a̱ ka̱ɗa̱to aza a na a̱ 'ya̱sa̱in. 27 Ukototosu! Ukototosu! N ta̱ ka̱mbuwa̱ yi okongo! A̱a̱ ka̱mbuwa̱ yi shi, hali she na̱ za na uge'etosu wa amayun za va̱ yi ɗa u ta̱wa̱, a̱yi ɗa maa ca a̱yi.> >>

28 <<A̱vu gba mawun ma vuma, yuwan adanshi e ikaka ya̱ A̱sula̱ vu damma, <Apa ili i na A̱sulazuva Zagbain a dammai adama a aza Amon na adama a wisulusa u le, vu damma, <<Matsun me pe'eni matsun me pe'eni ma̱ tu utalu adama a mapaɗa. O gboro yi ta̱ adama u lyuwa waru adama u dala tse imaɗatsu!>> 29 Suru na alavu alavu e epen a na a yuwain adama a̱ ɗu, na̱ yindi ye epen adama a̱ ɗu, a ta zuwa yi a̱ yinlu ya aza a wuya aza a na a paɗa, aza a na urana u le u rawai, aza a na mantsa mo oforo e le a rawai. 30 Ka̱mbuwa̱ yi e ibici ya̱ yi. Uba̱ta̱ u na a yuwan nuwu, e iɗa yu umatsun ya̱ wu, n ta̱ ge'eto wu. 31 N ta̱ tsun upan u va̱ a aci a̱ wu waru mi ivula̱a̱ wu upan wa̱ a̱bunda̱ a̱ va̱ ya̱'a̱ wu, n ta ca wu e ekere a̱za̱ o ulambu u majiyan, ama a na a gurai mona. 32 Vu to o'wo mani'in adama a akina, mpasa ma̱ wu n to oco e iɗa ya̱ wu, a̱a̱ da̱shi cuwan na̱ a̱vu shi. A̱mu A̱sulazuva ɗa a dammai ne.> >>