1 Reve u damma mu, <<Mawun ma vuma, 'yon mishin, n ta yuwan adanshi na̱ a̱vu.>> 2 A̱yi a adanshi na̱ a̱mu, reve Ruhu uwa mu a̱vu u 'ya̱sa̱n mu mishin, a̱vu n tsuwa atsuvu a̱yi adanshi na̱ a̱mu. 3 A̱vu u damma mu, <<Mawun ma vuma, n ta̱ lyungusu wu uba̱ta̱ wa ama a Isra'ila uba̱ta̱ wi iɗa yu u'ya̱susa̱n wa aci i na i 'ya̱sa̱a̱n numu aci. Ele na̱ nkaya n le a 'ya̱sa̱a̱n mu ta̱ ugbozu hali a̱ tyo ana'an. 4 Ama'a ugundo wa aciyogbamu u ɗa no okolo ugbamu. Vu damma le, <Apa ili i na A̱sulazuva Zagbain dammai.> 5 Agba ko no o polo atsuva ko na a 'yuwan o polo, adama a na ele u'wa wu u'ya̱susa̱n wa aci u ɗa, e te reve a na vumava̱sula̱ ri a̱tsuma̱ e le. 6 A̱vu gba mawun ma vuma, she vu uwwa wovon u le wan ko vu uwwa wovon wa adanshi e le wan. She vu uwwa wovon wan ko na wo o'woi ma̱lyo na awanda a̱ tu uka̱nda̱ruwu na̱ a̱vu, waru vu ta̱ nden a̱tsuma̱ a agashi*. She vu uwwa wovon wi ili i na a dansa wan, waru she vu da'wan na̱ cu'un va̱ a̱ka̱nla̱ a na aa yuwaan wu wan, ko a na wo o'woi ele aza a aciyogbamu a ɗa. 7 Vu ta yuwaan le adanshi a̱ va̱, ko no o polo atsuva ko a 'yuwan, adama a na ele a̱za̱ o u'ya̱susa̱n wa aci u ɗa. 8 Agba a̱vu mawun ma vuma, vu polo atsuvu e ili i na maa dansa wu. She vu 'ya̱sa̱n aci tso u'wa wu u'ya̱susa̱n wa aci u ndolo wan. Vaa apuwa una̱ vu lyuwa ili i na maa casu wu.>> 9 Reve ana n ka̱lyuwa̱i a̱vu me ene ukere wuba̱ruwu a̱ tyo ya̱'a̱ va̱, na aatagada o ukutsuluwu uguzu. 10 Reve wu ba̱ruwa̱ yi a̱ ma̱ka̱ka̱n ma̱ va̱. U shi ta̱ ni iɗana elime no o ucina̱, iɗana i mesun mo ukwa̱ na̱ ya̱ a̱tsumola̱ngu na̱ ya̱ a̱tsuma̱lima̱.