1 Waru adanshi a̱ A̱sulazuva a̱ ta̱wisa̱ ta̱ ya̱'a̱ va̱, 2 <<Mawun ma vuma, vu revetyo Urishelima ili yi idaba ya̱ yi. 3 Vu damma, apa ili i na A̱sulazuva Zagbain dammai, nkaya ma̱ wu nu uba̱ta̱ u na a matsan nuwu a̱tsuma̱ aza a Ka'ana a ɗa. Dada va̱ wu gba za va Amoriya, mma va̱ wu waru za va Hitiya ɗa. 4 O urana u na a matsan nuwu, babu vuma na foɓo nuwu. Babu za na koɗoi uben wa̱ wu, waru babu za na sumba̱ nuwu. Waru babu za na sukuma nuwu akpaɗi ko u katala nuwu amuna. 5 Babu za na enei iliyali ya̱ wu ko u yuwaan wu isa'ani na waa yuwan ili i ro adama a̱ wu. Agba a vari wu ta̱ a̱tsumona. Adama a na vo o'wo ta̱ ili yi idaba o urana u na a matsan nuwu.>>

6 <<A̱mu a̱ ka̱ra̱, a̱vu me ene wu pe o ula̱cishi a̱tsuma̱ a mpasa ma̱ wu. A̱vu pe nven a̱tsuma̱ a mpasa'a ɗaɗa maa damma wu, <Vu da̱na̱ wuma!> >> 7 N zuwa ta̱ vu kungwa cine vu revei a̱vu'un a̱tsuma̱ a atsusa. A̱vu vu kungwa vu yuwan mgbain vo o'wo usheli u sa'ani. Vu yuwan agaɓa a̱vu eleme a̱ wu a kungwa. Na̱ ne suru vu da̱na̱ nu utugu a̱ lipu va̱ wu shi, waru vu da̱na̱ ta̱ ataɓu.

8 <<Ana pasai lo waru me ene nuwu, a̱vu me ene vu rawa ta̱ a na maa ciga. Ɗaɗa mu palai ataɓu a̱ wu na̱ nge'en ma aapalutsu a wupalu. Reve n yuwaan wu nzuwulai oɓolo na akucunu. Ne ɗa A̱sulazuva Zagbain dammai, ɗaɗa vo o'woi za va̱.

9 <<Reve n sumba̱ wu na̱ mini tsa̱ra̱ mpasa n koto a̱ lipu va̱ wu, a̱vu n sukuma nuwu mani'in ma̱ zetun. 10 Ɗaɗa mu pala nuwu na̱ a̱tugu a na a ɗavai reve waru mo oto wu atan o ukwan. Mu pala wu ta̱ no okoro a sa'ani na amuna e ikebe. 11 A̱vu n yuwaan wu kombo ni itana yi ikebe, a̱vu mo oto wu nshingi oɓolo ni iliyinlu a̱ yinlu ya̱ wu. 12 A̱vu n zuwaa wu makawani a̱ vunu ni iliyatsuvu a atsuvu a̱ wu no okokolo a sa'ani a aaci a̱ wu. 13 Tsundolo tsa ɗa a yuwaan nuwu kombo zinariya oɓolo na̱ azurufa, itana ya̱ wu waru tso okoro a sa'ani na amuna e ikebe na amuna a na a ɗavai. Vu lyuwa ta̱ ilyalya i sa'ani oɓolo ni ishiki na̱ mani'in ma̱ zetun na̱ yira i na i ri lashi. Vo o'wo ta̱ ulobonu lon a̱vu waru vo o'wo egbere. 14 Ala a̱ wu a rawa ta̱ a nɗa adama o ulobonu wa̱ wu. Ulobonu wa̱ wu u na n ca nuwu u rawa ta̱ ulobonu.>> Ne ɗa A̱sulazuva Zagbain dammai.

15 <<Agba a̱vu vu zuwa ucira wa̱ wu o ulobonu wa̱ wu a̱vu waru vu ka̱mba̱to urevu u na e reve nuwu wo o'wo wu tsushakala e ekere a za suru. Vu ca ta̱ aciya̱wu e ekere a za na ka̱ra̱la̱i nuwu lo biti. A̱vu vu ca yi ulobonu wa̱ wu. 16 Vu tara ta̱ itana i ro i na i ri ya̱ wu, a̱vu vu yuwaan aciya̱wu a̱'isa̱ a na a kalai na̱ mini icu'un icu'un, ɗe ɗa vu yuwain tsushakala. Cu'un ndolo she u fara wan, ko a yuwan yi wan ko ke'en. 17 Vu tara ta̱ waru itana yi ikebe i na n ca nuwu, aza a na a yuwain na̱ zinariya oɓolo na̱ azurufa. A̱vu waru vu yuwaan aciya̱wu musula̱ n na n ri ali, a̱vu vu ka̱ra̱ a yuwusan tsushakala ne ele. 18 A̱vu vu tara itana ya̱ wu i na i ri uɗavu a̱vu vu pala le, a̱vu waru vu ca le kucci mani'in ni ili i ma̱guru ma̱ va̱. 19 Waru ilyalya i na n ca nuwu, yira i na i ri lashi, mani'in ma̱ zetun ni ishiki i na n ca nuwu vu lyuwa, vu ca ta̱ kucci vu ukula̱to tsi ili i ma̱guru a̱ ma̱ka̱ka̱n me ele. Ili i na i farai i ɗa nda, ne ɗa A̱sulazuva Zagbain dammai.

20 <<A̱vu vu tara olobo ne esheli a na vu matsaan numu a̱vu vu ca le kucci tsi ilyalya a̱ tyo uba̱ta̱ u musula̱. Tsushakala tsa̱ wu tsa rawa shi? 21 Vu paɗa ta̱ muwun n va̱ a̱vu vu ca le tsa̱ kucci a̱ musula̱. 22 A̱tsuma̱ e ili yi idaba na̱ tsushakala tsa na vaa yuwusan suru vu cuwan nu urana u tsumuwun tsa̱ shi, a na vu da̱na̱i ataɓu babu waru utugu, a̱vu o ula̱cishi a̱tsuma̱ a mpasa ma̱ wu.

23 <<A̱tsuma̱lima̱! A̱tsuma̱lima̱ a ta cina wu, ne ɗa A̱sulazuva a dammai. Babu ni i wuya ya̱ wu i na i buwai, 24 vu suwaa ta̱ aciya̱wu a̱'isa̱, a̱vu vu yuwaan aciya̱wu uba̱ta̱ wa̱ a̱ga̱nda̱ uba̱ta̱ u na ama o tsu ɓolotosu a̱tsuma̱ a̱ lyuci. 25 A nsanji suru vu suwa ta̱ a̱a̱'isa̱ a̱vu vu lungusa̱ ulobonu wa̱ wu, vu cayi lipu va̱ wu e ekere a aza a na a̱ ka̱ra̱sa̱ suru, a̱vu vu da̱shi a̱bunda̱ a tsushakala tsa̱ wu. 26 A̱vu waru vu reme tsushakala na aza a Masar, nron mu nden ma̱ wu aza a na a cigai lipu. A̱vu vu zuwa mu n yuwan upan adama a na va̱a̱ da̱shishi a yuwusan tsushakala. 27 Uwwa nda, reve mu ba̱ruwa̱ ukere u va̱ a aci a̱ wu a̱vu n jiba wu a̱bunda̱ e iɗa i na n ca nuwu. A̱vu n ca wu e ekere a n'yuwatan ma̱ wu aza a na ili i tsu rawa le shi, esheli a aza a Filistiya aza a na a uwwai wono cine yaa yuwusan nden mi idaba ma̱ wu. 28 Waru vo oto ta̱ aciya̱wu a̱tsuma̱ a tsushakala na aza a Asiriya, adama a na u rawa nuwu shi. Vu yuwan ta̱ tsushakala ne ele, suru na̱ ne, u rawa wu shi. 29 Vu da̱shi ta̱ tsushakala tsa̱ wu na aza a Babila, iɗa ya aza a atsulu na awina, na̱ ne suru u rawa wu shi.>>

30 <<Cu'un vo okolo o ubanakun u ne u ɗa vu ri na̱ a̱yi! Ne ɗa A̱sulazuva Zagbain dammai. A̱yi ɗa nda vu yuwain ili i nda suru, ili i na aashakala a na a̱ ri na̱ wono shi a yuwain. 31 Ana vu ɓolotoi aganga a atali a nsanji mu ure suru, a̱vu vu yuwan 'wa e memere ma̱ lyuci. Agba vu la'a ta̱ aashakala adama a na vu ushi atsupu shi.

32 <<A̱vu ka tsipere! Vu la'a ta̱ ciga omocin na̱ vali va̱ wu! 33 Ali a tsu ca ta̱ aashakala uneꞌe, a̱vu gba vu tsu ca ta̱ za na vu cigai biti uneꞌe. Vu tsu ca ta̱ utowusu wu una tsa̱ra̱ a̱ ta̱wa̱ uba̱ta̱ wa̱ wu diga uba̱ta̱ suru adama o von na̱ a̱vu. 34 Tsundolo tsa ɗa ahali a̱ wu a tawai ko'o na akapi a aashakala, adama a na babu vali na a zama u tsupa tsa̱ra̱ u von na̱ a̱vu, a̱vu ɗa vu tsu tsupu. Tsundolo tsa ɗa tsushakala tsa̱ wu tsa tawai ko'o.

35 <<Adama o ndolo, a̱vu aashakala, vu uwwa ikaka uba̱ta̱ wa̱ A̱sulazuva! 36 Apa ili i na A̱sulazuva Zagbain dammai, adama a na vu kpa̱tu'wa̱i ataɓu a̱ wu e ekere a za na vu cigai a̱tsuma̱ a tsushakala tsa̱ra̱ u von na̱ a̱vu. Adama a̱ a̱ma̱li e idaba a̱ wu na adama a na vu ca nle mpasa m muwun ma̱ wu, 37 o una̱ u ndolo n to ɓoloto aza a na a ciga nuwu suru, aza a na vaa uwwusa uyo'o, aza a na vu cigai na aza a na vu 'yuwain. N to ɓoloto le adama a 'yuwan wu uba̱ta̱ suru, waru n ta̱ kpa̱tu'wa̱a̱ le lipu va̱ wu tsa̱ra̱ e ene ataɓu a̱ wu. 38 N ta paɗaa wu uge'etosu wa̱ a̱ma̱ci a na aa yuwusan tsipere na̱ za na unai vuma. N ta tsupa wu na̱ wocosu wu mpasa a̱tsuma̱ o upan na̱ tsushu'un tsa̱ va̱. 39 A̱vu n ca wu e ekere a aza a na a ciga nuwu, a̱vu gba o ɓoso aganga a atali a̱ wu a̱vu waru a̱ lungusa̱ 'wa va̱ wu. O to foɗo wu itana vo o'wo ataɓu, a̱vu a usa wu itana yi ikebe ya̱ wu a̱vu a lyawa wu ataɓu suru suru. 40 O to ɓolotowo wu ama a̱vu a yuwan nla̱ngi na̱ a̱vu, aza a na a vuvara wu na atali waru aza a na a pupaɗa wu musaji musaji na̱ matsun me pe'eni. 41 A̱ ta̱ kula̱to 'wa va̱ wu a̱vu a zuwaa wu a̱tsuma̱lima̱ a̱ ma̱ka̱ka̱n ma̱ a̱ma̱ci ma̱ a̱bunda̱. N ta zuwa wu vu lyawa tsushakala, waru vu buwa a tsupa aza a na a ciga nuwu shi. 42 Tsundolo tsa ɗa upan u va̱ woo von a̱vu waru tsushu'un tsa̱ va̱ tsoo koto a aci a̱ wu. N to voton waru ma̱a̱ da̱shi yuwan upan shi.>> 43 Adama a na vu cuwain na̱ rana tsumuwun tsa̱ wu shi, amma vu zuwa ta̱ upan a̱tsuma̱ e ili i nda suru, uwwai, n ka̱mbuwa̱ ta̱ linga va̱ wu a aci a̱ wu, ne ɗa A̱sulazuva Zagbain dammai. Babu nu ulungusu u na vu yuwain vu yuwan ta̱ nden mi idaba.

44 <<Uwwa nda, vuma na suru yuwain ulinga nu udammu u ta yuwan ulinga nu udammu u nda aci a̱ wu, <Cine mma ri, ne ɗa usheli u ri.> >> 45 A̱vu vu rotso ta̱ mma va̱ wu, za na 'yuwain vali va̱ yi oɓolo na̱ muwun ma̱ yi. Waru a̱vu mawun ma̱ a̱na̱wun me esheli me esheli ma̱ wu ma ɗa aza a na 'yuwain itana ya ali e le na̱ muwun n le. Dada va̱ wu gba za va Amoriya, mma va̱ wu waru za va Hitiya ɗa. 46 Zakpara vu usheli va̱ wu Samariya ɗa, za na ri nden o ugana wa̱ wu oɓolo ne esheli a̱ yi. Zawa'a va̱ wu vu usheli gba, za na ri na̱ nden uyagi na̱ a̱vu oɓolo ne esheli a̱ yi, a̱yi ɗa Sodom. 47 Vu yuwan mmalu na̱ linga vi idaba le goon shi, amma e re va̱ wu waru suru vu la'a le ta̱ yuwan ili yi idaba. 48 Amayun n kucina ta̱ na̱ wuma u va̱, A̱sulazuva Zagbain dammai, Sodom oɓolo ne esheli a̱ yi koto a yuwan ili i na a̱vu oɓolo na̱ muwun ma̱ wu n yuwain shi.

49 <<Uwwa nda, apa cu'un vu nusu na mawun ma̱ a̱na̱wun mo usheli ma̱ wu Sodom ma yuwain: A̱yi oɓolo na̱ muwun ma̱ yi a̱ da̱na̱ ta̱ na aciyogbamu. A ta̱ ni ilyalya hali u la'a le a̱bunda̱, nu uyo'o wa̱ a̱bunda̱, agba a kamba alambi oɓolo na aza a na a cigai ikambishi shi. 50 A̱ da̱na̱ ta̱ nu uvaɗu, waru a yuwusan ta̱ ili i na yi idaba a̱ ma̱ka̱ka̱n ma̱ va̱. Ɗaɗa gba n tawa nle cine ve enei. 51 Samariya koto yuwan ekpe'win a̱ nusu va̱ wu shi. Vu yuwan ta̱ ili yi idaba i na i la'ai za le, a̱vu vu zuwa aza wawa'a a̱ wu e esheli o rotso a̱za̱ a̱ a̱ɓula̱ a̱tsuma̱ e ili i na vu yuwain. 52 Vu tanu wono wa̱ wu, adama a na adama e idaba yu unusu wa̱ wu vu zuwa ta̱ muwun ma̱ a̱na̱wun me esheli ma̱ wu o rotso a̱za̱ a̱ɓula̱. Adama a̱ nusu vi idaba na vu yuwain na a la'ai za le, o rotso ta̱ a̱za̱ a̱ a̱ɓula̱ a na a la'a nuwu. Adama o ndolo vu uwwa wono vu tanu wono wa̱ wa̱ wu, adama a na vu zuwai muwun ma̱ a̱na̱wun me esheli ma̱ wu o rotsoi a̱za̱ a̱ a̱ɓula̱.

53 <<N ta̱ lapula Sodom na̱ muwun me esheli ma̱ yi, hali na muwun me esheli ma̱ yi ma̱ tsura̱ aba'un. N ta lapula Samariya oɓolo ne esheli a̱ yi na a̱a̱ tsura̱ aba'un. A̱vu fo n ta̱ ka̱mbuwa̱a̱ wu na aba'un a̱ wu oɓolo ne ele. 54 Tsundolo tsa ɗa vaa tanu wono wi ili i na suru vu yuwain na amayun. Ne ɗa a̱ ta̱na̱to okolo e le adama a na nusu le rawa aza a na vu yuwain shi. 55 Muwun ma̱ a̱na̱wun ma̱ wu esheli gba, Sodom oɓolo ne esheli a̱ yi na̱ Samariya ne esheli a̱ yi, a̱ ta̱ ka̱mba̱ cine a̱ da̱na̱i ɗe nu ufaru. A̱vu fo ne esheli a̱ wu i ta̱ ka̱mba̱ cine i da̱na̱i ɗe nu ufaru. 56 Mawun ma̱ a̱na̱wun ma̱ wu Sodom ma̱ shi ta̱ mo o'wo wu ili yi izo'oshi a mantsa ma na vu da̱na̱i nu uvaɗu, 57 kafu a̱ pa̱lu'wa̱ iwuya a alanga. Ɗaɗa vo o'woi ili ya adanshi e ekere a̱ muwun me esheli ma Edom, oɓolo na aza a na a̱ ri uka̱nda̱ruwu na̱ a̱yi suru, na̱ muwun me esheli ma Filistiya aza a na a̱ ri uka̱nda̱ruwu na̱ a̱vu vo o'wo le ta̱ ili i na o ronuso e iɗa. 58 Vu ta tara ume wa̱ a̱tsuma̱lima̱ a̱ nden mi idaba ni ili yi idaba na vu yuwain suru,>> ne ɗa A̱sulazuva a dammai. 59 <<Apa ili i na A̱sulazuva Zagbain dammai, n ta yuwaan wu cine wu ntsayi, adama a na vu tarai nzuwulai n va̱ na̱ a̱ɓula̱ shi na̱ cine vu kuɗai akucunu'u. 60 Na̱ ne suru n ta cuwan na akucunu a̱ va̱ a na n yuwain na̱ a̱vu a mantsa ma na vu da̱na̱i a̱ tsumuwun, a̱vu n shiton akucunu a babu ukotu na̱ a̱vu. 61 Tsundolo tsa ɗa vaa yuwan a̱vu vu cuwan na̱ re va̱ wu a̱vu vu uwwa wono a mantsa ma na vu ushiyi muwun ma̱ a̱na̱wun ma̱ wu, suru azakpakpara a̱ wu na aza wawa'a a̱ wu. N ta ca wu ele tse esheli, ko na wo o'woi a̱ ri a̱tsuma̱ a akucunu a̱ tsu shi. 62 N ta̱ 'ya̱sa̱n akucunu a̱ va̱ na̱ a̱vu, a̱vu vu reve a na a̱mu ɗa A̱sulazuva. 63 A̱vu na̱ n tsupa adama e ili i na vu yuwain, vu ta cuwan a̱vu vu uwwa wono va̱a̱ da̱shi kpa̱tu'wa̱ una̱ wa̱ wu shi adama e idaba i na vu yuwain, ne ɗa A̱sulazuva Zagbain dammai.>>