1 Adanshi A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma,>> damma zagbain va Taya, <<Apa ili i na A̱sulazuva Zagbain dammai, <A̱tsuma̱ o uvaɗu wa̱ wu,> vu damma ta̱, <A̱mu ma̱sula̱ ma ɗa, n da̱nu ta̱ o ootogu o tsugono m ma̱sula̱ a̱tsuma̱ e memere ma mala.> >> Amma a̱vu vuma ɗa ma̱sula̱ ma ɗa shi, ko na vu ri a majiyan vu ta̱ nu ugbozu tsa̱ ma̱sula̱. 3 Vu tara ta̱ aciya̱wu vu la'a ta̱ Daniya ugbozu? Babu urevu wi ili i na o soko nuwu? 4 Nu ugbozu wa̱ wu nu urevu wa̱ wu u ɗa vu ɓolotowo yi aciya̱wu utsuru, waru vu ɓolotoi zinariya na̱ azurufa a̱tsuma̱ a aasula e izuwa ya̱ wu. 5 Adama o ugbozu wa awina na atsulu a̱ wu a ɗa vu da̱shiyi aciya̱wu utsuru, waru adama o utsuru wa̱ wu okolo a̱ wu a shiwan ta̱ nu uvaɗu.

6 Adama o ndolo apa ili i na A̱sulazuva Zagbain dammai, <<Adama a na vu tara ta̱ vu ta̱ nu ugbozu wa̱ ma̱sula̱. 7 Adama o ndolo, uwwa nda, n ta̱ ta̱wa̱ no omocin a̱ a̱soja a aci a̱ wu, aza a na a la'ai usuɗuwu a nɗa. A ta tala mutsun mu pe'eni n le a yuwan nla̱ngi nu ugbozu usa'ani wa̱ wu waru a̱ lungusa̱ ulobonu wa̱ wu. 8 A̱ ta̱ cipa̱to wu a̱tsuma̱ a̱ a̱ka̱ri waru vu ta yuwan ukwa̱ wa aza a na a sapai na antsu a̱ a̱bunda̱ a̱tsuma̱ e memere ma mala.>> 9 Vu ta̱ da̱shi damma, <<A̱mu ma̱sula̱ ma ɗa,>> a̱ ma̱ka̱ka̱n ma aza a na o una nuwu? <<Vu ta̱ gba o'wo vuma goon, agba ma̱sula̱ shi, e ekere a aza a na o una nuwu. 10 Vu ta yuwan ukwa̱ tsu za na a paɗai uryumbu shi e ekere o omocin.>> A̱mu ɗa n dammai, A̱sulazuva Zagbain ɗa dammai ne.

11 Waru adanshi A̱sulazuva a̱ ta̱wa̱ ta̱ ya̱'a̱ va̱, 12 <<Mawun ma vuma yuwan a̱tsumola̱ngu adama o mogono ma Taya, waru vu damma yi, <Apa ili i na A̱sulazuva Zagbain dammai, a̱vu makawani mo uzuwu mo ukere mo ucira ma ɗa, tapu nu ugbozu waru nu ulobonu wa̱ a̱bunda̱. 13 Vu ta̱ pe Adini, a̱a̱rumbu a̱ A̱sula̱. Atali e ikebe suru o o'wo ta̱ ili i tsulobo tsa̱ wu, saradiyom, tofa, na̱ diyamon, na̱ beril, onis, jasfa, safaya, tofas, na̱ zumurudu. E she'en le ta̱ a kala le na̱ zinariya vu ulobonu. O urana u na a yuwan nuwu a yuwan le ta̱. 14 N tawa wu ta̱ vo o'wo malingata me ipiri mo ucira. Adama a na ne ɗa n zuwa nuwu. Vu shi ta̱ nden zuva masasan ma akiza ma̱ A̱sula̱, a mmalu a̱tsuma̱ e memere ma atali a akina a ɗa. 15 Diga urana u na a yuwan nuwu a̱ tsura̱ wu nu unusu shi hali she na a̱ tsura̱i iwuya a̱tsuma̱ a̱ wu. 16 A̱tsuma̱ a̱ a̱bunda̱ a awina na atsulu a̱ wu vu shiwan ta̱ na̱ mona ma ama, waru vu yuwan ta̱ unusu. Adama o ndolo n tawa wu ta̱ a masasan ma̱ A̱sula̱, waru m gba̱ra̱ kototo wu ta̱, a̱vu malingata me ipiri mo ucira, diga e memere ma atali a akina. 17 Ookolo a̱ wu a ta yuwusan uvaɗu adama o ulobonu wa̱ wu, vu lungusa̱ ta̱ ugbozu wa̱ wu adama e icigi yi ili i na vu pura̱i. Adama o ndolo n vari wu ta̱ e iɗa, m pa̱lu'wa̱ wu a̱ ma̱ka̱ka̱n mo ngono, adama vo o'wo le ili ya̱ a̱ka̱nla̱. 18 Adama a̱ a̱bunda̱ o unusu wa̱ wu nu ulambu wa̱ a̱ɓula̱ uba̱ta̱ awina na atsulu a̱ wu vu lungusa̱ ta̱ a̱'isa̱ a̱ wu. Adama o ndolo n zuwa ta̱ akina o uta̱ a̱tsuma̱ a̱ wu, waru u kula̱to wu ta̱. N ka̱mbuwa̱ wu ta̱ okomo e iɗa o urewesu wa aza na a̱ ri a̱ka̱nla̱ a̱ wu suru. 19 Suru aza a na e reve nuwu a̱tsuma̱ a nɗa a ta lamba ili i na aa damma adama a̱ wu. Ukosu wa̱ wu wo o'wo ta̱ ili i wovon waru a̱a̱ da̱shi ene wu shi suru suru.> >>

20 Adanshi A̱sulazuva a̱ ta̱wa̱ ta̱ ya̱'a̱ va̱, 21 <<Mawun ma vuma, zuwa urewesu wa̱ wu a̱ ka̱lyuwusa̱ Sidon, vu yuwan adanshi e ili i na yaa fara na̱ a̱yi.>> 22 Waru vu damma, <<Apa ili i na A̱sulazuva Zagbain dammai, <N ta yuwusan nla̱ngi na̱ a̱vu Sidon, waru n ta̱ tsura̱ tsugbain adama e ili i na maa yuwan na̱ a̱vu. Aza a na a̱ ri a̱ a̱ka̱nla̱ suru e te reve a na a̱mu ɗa A̱sulazuva, mantsa ma na n tsuwa̱n nuwu a̱tsuma̱lima̱ waru n rocoi aciya̱va̱ za va akiza e ekere a̱ wu. 23 N ta̱ lyungu na̱ mɓa̱la̱ a aci a̱ wu, waru n zuwa mpasa n yene e re va̱ wu. Waru aza a na o kukoɗoi o to oco e memere ma̱ wu, matsun me pe'eni ma ta yuwan nla̱ngi na̱ a̱vu pasu suru.> >> Ɗaɗa wee reve a na a̱mu ɗa A̱sulazuva. 24 << <Aza a Isra'ila a̱a̱ da̱shi tsura̱ nron mu nden n na n ri usa̱n tsa̱ malyo na awanda a wali, aza a na a yuwaan nle ulamu ɗe a̱ca̱pa̱ shi. Ɗaɗa ee reve a na a̱mu ɗa A̱sulazuva Zagbain.

25 << <Apa ili i na A̱sulazuva Zagbain dammai: mantsa ma na m ɓolotoi aza a Isra'ila diga a̱tsuma̱ a ama a na e bete'wei nle, ne ɗa moo roco akiza a̱ va̱ uba̱ta̱ u le a̱ ma̱ka̱ka̱n ma nɗa. Reve a̱ da̱nu e iɗa ya aciyele, za na n cayi aagbashi a̱ va̱ Yakubu. 26 A̱ ta̱ da̱nu pe gbaga waru a ta suwa 'wa waru a̱ cu'wa̱n a̱ɗuma̱ a inabi. A̱ ta̱ da̱nu gbaga mantsa ma na n yuwain uge'etoi nron mu nden n le aza na a yuwusaan nle ulamu. Ɗaɗa ee reve a na a̱mu ɗa A̱sulazuva A̱sula̱ e le.> >>