1 Adanshi a̱ A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma, cine tsa ɗa aakpata a aataci aa la'a aakpata e eten o uɗanga a na a̱ ri a̱tsuma̱ a̱ a̱rumbu? 3 A tsu tara ta̱ aakpata a̱tsuma̱ a̱ yi aa gura yuwan ulinga u ro na̱ a̱yi. A tsu tara ta̱ makpata a̱tsuma̱ a̱ yi a sakato ili i ro ɗe? 4 Uwwa nda, a tsu tara yi a vari yi a akina tsa mani'in. Akina'a u ta tama a̱tyo a̱ yi suru, a̱vu wu peɗe memere ma̱ yi. U ta buwa waru nu ulinga u ro? 5 Uwwa nda, nu u shi nu ulinga wi ili i ro shi a mantsa ma na u shi gbaga va̱ yi, gogo ana akina a tama niyi a̱vu wu peɗe yi cine tsa ɗa woo o'wo, a ta gura yuwan ulinga u ro na̱ a̱yi waru?

6 <<Adama o ndolo apa ili i na A̱sulazuva Zagbain dammai, cine n cayi aakpata a ataci a̱ ina̱bi a̱tsuma̱ a ɗanga va̱ a̱a̱rumbu'u tsa mani'in adama a akina, ne ɗa maa yuwan na aza a na a̱ ri nden Urishelima. 7 Reve n zuwa urewesu a̱ va̱ nla̱ngi ne ele. Ko na a la'a a akina'a, akina gba o to soɗu le. A mantsa ma na n zuwai urewesu u va̱ nla̱ngi ne ele, reve i reve a na a̱mu ɗa A̱sulazuva. 8 N ta̱ ka̱mba̱to iɗa'a ofoli adama a na a yuwain a̱ɓula̱ shi, A̱sulazuva Zagbain dammai.>>