1 Reve adanshi a̱ A̱sulazuva a̱ ta̱wa̱ ya̱'a̱ va̱, 2 Mawun ma vuma, vu zuwa urewesu wa̱ wu a Masasan ma Seyi* vu yuwan adanshi e ikaka ya̱ A̱sula̱ a aci a̱ yi. 3 Vu damma yi, <<Apa ili i na A̱sulazuva Zagbain dammai, N ta̱ nla̱ngi na̱ a̱vu Masasan ma Seyi waru n ta̱ buba̱ruwa̱ ukere u va̱ nla̱ngi na̱ a̱vu, a̱vu n ka̱mba̱to wu okongo iɗa ye pere. 4 N ta̱ ka̱mba̱to ilyuci ya̱ wu okongo, a̱vu vo o'wo iɗa ye pere. Ne ɗa vee reve a na a̱mu ɗa A̱sulazuva.

5 <<Ana wo o'woi vu zuwa ta̱ ama a̱ va̱ aza a Isra'ila o okolo ana'an shi. Reve waru vu zuwa o una le na̱ matsun me pe'eni a mantsa ma̱ a̱tsuma̱lima̱ e le a mantsa ma na uge'etosu u le u shiwain. 6 Adama o ndolo, a̱mu A̱sulazuva Zagbain n kucina ta̱ na̱ wuma u va̱ n ta zuwa oo oco mpasa ma̱ wu. Mpasa'a gba n ta̱ da̱na̱ o tonishi wu. Ana wo o'woi vu 'yuwain wocosu wu mpasa shi, mpasa'a n ta̱ da̱na̱ e itoni ya̱ wu. 7 N ta̱ ka̱mba̱to Masasan ma Seyi okongo, iɗa ye pere reve waru mu una aza a na a̱ 'ya̱wusa̱ na̱ o uta̱yi pe mmalu. 8 N to shiton masasan ma̱ wu na̱ a̱kwa̱kwa̱. Aza a na oo una a̱ ta̱ riya̱ zuva vu nsasan ma̱ wu na̱ ka̱ri va̱ wu na a ɓula mini ma̱ wu suru. 9 N ta̱ ka̱mba̱to wu okongo a na a̱ da̱na̱ nu utyo shi. Ɗaɗa vee reve a na a̱mu ɗa A̱sulazuva.

10 <<Adama a na vu damma ta̱, <Nɗa n re nda Isra'ila ni iɗa ya Yahuda o to o o'wo za tsu. Waru tsu to o'woto le a̱za̱ a̱ tsu.> >> Ko na wo o'woi a̱mu A̱sulazuva n te memere me le. 11 Adama o ndolo, n kucuna ta̱ na̱ wuma u va̱ A̱sulazuva Zagbain dammai, n ta̱ tsupaa wu o una̱ wu upan na̱ tsushu'un na̱ tsurala tsu na vu roco nle. A̱mu gba n ta̱ revetyo aciya̱va̱ e ekere e le a mantsa ma na n ge'eto nuwu. 12 Vu te reve a na a̱mu ɗa A̱sulazuva. Mu uwwa ta̱ adanshi a vanvama a na vu yuwayin masasan ma Isra'ila a mantsa ma na vu dammai, <<A̱ ta̱ ka̱mbuwusa̱ le okongo iɗa ye pere, a ca tsu ta̱ le tsu tama.>> 13 <<Ne ɗa vu yuwain uvaɗu reve vu yuwan adanshi a vanvama a aci a̱ va̱. Vu ta yuwusan adanshi a̱ a̱bunda̱ a aci a̱ va̱, a̱mu gba mu uwwa ta̱. 14 Apa ili i na A̱sulazuva Zagbain dammai, a mantsa ma na uvaɗi ma̱ɓula̱ u ri a̱ ma̱za̱nga̱, n ta̱ ka̱mba̱to wu okongo iɗa ye pere. 15 Cine vu yuwain ma̱za̱nga̱ ana a̱ lungusa̱i Isra'ila ana wo o'woi okongo, iɗa ye pere. Ne ɗa maa yuwan na̱ a̱vu. Vu to o'wo okongo masasan ma Seyi, iɗa ye pere a̱vu ni iɗa ya Edom suru. Ɗaɗa ee reve a na a̱mu ɗa A̱sulazuva.>>