1 Adanshi a̱ A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma, vu ta̱ nden e memere ma ama a aciyogbamu. A̱ ta̱ ne esu e yeni agba ee inda shi, a̱ ta̱ na atsuvu a mawwa, agba aa uwwusa shi, adama a na ama a aciyogbamu a ɗa. 3 Adama o ndolo, mawun ma vuma, foɓo itana ya̱ wu adama a̱ ma̱pura̱, reve vu ka̱ra̱ a̱ 'ya̱wa̱ tsugbashi nu urana e esu e le. Vu uta̱ vu lyawa uba̱ta̱ u na vu ri a̱ tyo uba̱ta̱ u ro. U ta yuwan a gura reve, ko na wo o'woi ele u'wa wa aciyogbamu a ɗa. 4 Vu uta̱a̱ itana ya̱ wu i ma̱pura̱ i tsugbashi a alanga nu urana e esu e le. Reve nu ulivu ele a̱ a̱ka̱nla̱, vu uta̱ tsa aza a na a̱ pura̱. 5 Vu ka̱pa̱ wa̱cin vu tusulai uɓaɓu e esu e le, reve vu uta̱a̱ itana ya̱ wu na̱ wa̱ci'in. 6 Vu tanu le o uvangaci wa̱ wu e esu e le reve vu wala a uwa a̱tsuma̱ e irumbu. Vu pala urewesu wa̱ wu adama ve ene iɗa wan, adama a na mo o'woto wu ta̱ iroci e ekere o u'wa wa Isra'ila.>> 7 Ɗaɗa n yuwain cine a zuwa numu. Mu uta̱a̱ ta̱ itana i va̱ nu urana tsi itana i ma̱pura̱ i tsugbashi. Reve nu ulivu n ka̱pa̱ wa̱cin a tusulai uɓaɓu ne ekere a̱ va̱. Reve mu uta̱a̱ itana i va̱ a̱ tyo a̱tsuma̱ e irumbu utanuwu ne ele o uvangaci u va̱ e esu e le. 8 Nu usana reve adanshi a̱ A̱sulazuva a̱ ta̱wa̱ ya̱'a̱ va̱, 9 <<Mawun ma vuma, u'wa wa aciyogbamu wa Isra'ila u ndolo we ece wu, <Nye vaa yuwusan, shi?> >> 10 <<Vu damma le, <Apa ili i na A̱sulazuva Zagbain dammai, Ikaka i nda i bura ta̱ mogono a̱tsuma̱ a̱ Urishelima nu u'wa wa Isra'ila suru u na u ri pe.> >> 11 Vu damma le, <<A̱mu iroci i ɗa a̱ tyo ya̱'a̱ ɗu.>>

<<Cine n yuwain ne ɗa aa yuwaan ɗu. Adama a na a̱ ta̱ pura̱ ɗu a̱ 'ya̱wa̱ tsugbashi. 12 Mogono a̱tsuma̱ e le ma ta tanu itana ya̱ yi a avangaci a̱ yi a̱tsuma̱ e irumbu a̱vun wu uta̱. A̱ ta̱ ka̱pa̱ wa̱cin a tusulai uɓaɓu adama u pusa̱la̱i pe. U ta pala urewesu wa̱ yi adama we ene iɗa'a ne esu a̱ yi wan. 13 A̱mu n ta azuwaa yi igolo i va̱, reve e reme yi a maza ma̱ va̱. N ta̱ ta̱wa̱ na̱ a̱yi Babila iɗa ya aza a Kaldiya. Ko na wo o'woi wee ene yi shi, ɗe ɗa wa̱a̱ kuwa̱. 14 N ta̱ bete'we aza a na a̱ ri uka̱nda̱ruwu na̱ a̱yi, aza a na aa kambusa yi na̱ a̱soja a̱ yi pasu suru. Reve n saɓa le na̱ matsun me pe'eni utalu. 15 A mantsa ma na mu uta̱a̱ nle a̱ tyo a̱tsuma̱ a ama, a̱vu waru m bete'we le a̱tsuma̱ a nɗa, e te reve a na a̱mu ɗa A̱sulazuva. 16 Agba n ta lyawa akapi wa'a a̱tsuma̱ e le a la'a matsun me pe'eni na ambulu na̱ mɓa̱la̱, adama a damma ili yi idaba i na a yuwain suru a̱tsuma̱ a nɗa n na a̱ tyoi. Reve e reve a na a̱mu ɗa A̱sulazuva.>> 17 Reve adanshi a̱ A̱sulazuva a̱ ta̱wa̱ ya̱'a̱ va̱, 18 <<Mawun ma vuma, vu lyuwa ilyalya ya̱ wu na̱ meje'en ma̱ lipu, a̱vu vu sowo mini ma̱ wu na̱ meje'en na̱ wovon. 19 Reve vu damma ama e iɗa'a, <Apa ili i na A̱sulazuva Zagbain dammai adama a aza a na a̱ ri nden a̱tsuma̱ a̱ Urishelima na̱ a̱tsuma̱ e iɗa ya Isra'ila. A ta lyuwa ilyalya i le na̱ meje'en ma̱ lipu reve o sowo mini ma̱ le na̱ wovon, adama a na a̱ ta̱ pura̱ itana yi iɗa'a suru, adama o u'ya̱susa̱n wu ugbozu wa aza a na a̱ ri pe nden. 20 Ilyuci i na ama a̱ ri pe nden o to o'wo okongo, a̱vu iɗa'a yo o'wo ofoli. Reve i reve a na a̱mu ɗa A̱sulazuva.> >> 21 Reve adanshi a̱ A̱sulazuva a̱ ta̱wa̱ ya̱'a̱ a̱ va̱, 22 <<Mawun ma vuma, nye i ɗa urevu wu udammu u na i ri na̱ a̱yi a̱tsuma̱ a Isra'ila, a na, <Rana ta̱ ma̱ka̱ra̱, agba ko alavu alavu a̱ ta̱ a shiwan shi?> >> 23 Vu damma le, <<Apa ili i na A̱sulazuva Zagbain dammai, n ta zuwa udammu u nda u koto, waru a buwa a̱ da̱shi yuwan ulinga na̱ yi a̱tsuma̱ a Isra'ila shi.>> Agba vu damma le, <<Rana yuwan ta̱ zuzu a na alavu alavu suru a shiwan. 24 Adama a na ko alavu alavu e epen a buwa shi, ko yindi i mapala me esu a̱tsuma̱ a ama a Isra'ila. 25 Adama a na a̱mu ɗa A̱sulazuva! Na̱ n yuwan adanshi, u ta fara. A buwa a jima shi, agba a rana ɗu a̱ɗu aza a aciyogbamu o u'wa wa Isra'ila. N ta yuwan adanshi a̱vu gba n shiton yi,>> A̱sulazuva Zagbain ɗa dammai. 26 Reve adanshi a̱ A̱sulazuva a̱ ta̱wa̱ ya̱'a̱ va̱, 27 <<Mawun ma vuma, a̱yi ɗa nda, u'wa wa Isra'ila u ta dansa, <Alavu alavu a na we enei a̱ ta̱ alanga, waru u ta yuwusan adanshi e ili i na yaa adama a mantsa ma alanga.> >> 28 Adama o ndolo, <<apa ili i na A̱sulazuva Zagbain dammai. A buwa a jima shi. N ta yuwan adanshi a̱vu gba n shiton yi, A̱sulazuva Zagbain ɗa dammai.>>