1 Adanshi a̱ A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma, zuwa esu a̱ wu a̱ tyo Gog vi iɗa va Mago iɗa i gbain i tsugbain tsi iɗa ya Mesheke na̱ Tubala. Vu yuwan adanshi a aci a̱ yi. 3 Vu damma yi, apa ili i na A̱sulazuva Zagbain dammai, <n ta̱ nla̱ngi na̱ a̱vu, a̱vu Gog za tsugbain tsi iɗa ya Mesheke na̱ Tubala. 4 N ta vadala wu, reve n zuwa igon o una̱ wa̱ wu, a̱vu mu uta̱ wu oɓolo na̱ a̱soja a̱ a̱bunda̱ a̱ wu suru ni ido na akumbi e le aza a na a̱ ri wotowu ni itana yu uvon na̱ a̱ra̱ga̱ na̱ a̱tugu e irumu o uvon. Suru nle aza a na a gurai uvon na̱ mutsun pe'eni n ɗa. 5 A̱soja a Pashiya na̱ a̱za̱ a̱ Kush na̱ a̱za̱ a̱ Fut o to oɓolo ne ele. Suru nle a̱ ta̱ na̱ a̱ra̱ga̱ na̱ nlezu mu uvon. 6 Ne ɗa fo Goma na̱ a̱soja a̱ yi suru na̱ Bet Togarama na ri ugana ɗe nu utyo na̱ a̱soja a̱ yi suru. Nɗa na̱ a̱bunda̱ a̱ ta̱ oɓolo na̱ a̱vu.> >>

7 << <Vu foɓo, vu da̱na̱ ufoɓu oɓolo no oɓolo ama a na a̱ ri uka̱nda̱ruwu na̱ a̱vu. Vo o'wo zagbain le. 8 Na a yuwan rana va̱ a̱bunda̱ a a'wan a na a̱ ta̱wa̱, o to ɓoloto a̱soja a̱ wu reve vu riya̱a̱ iɗa i ro nu uvon. Iɗa i ro i na a̱ lungusa̱i nu uvon reve a suwisa yi. Iɗa'a i shi ta̱ ujima a na wo o'woi okongo, iɗa ye pere. Amma gogo o ɓoloto ta̱ ama a̱ yi diga a nɗa ma̱ a̱bunda̱ a̱vu a̱ ta̱wa̱ ne ele a yuwan nden n le zuva vu nsasan ma Isra'ila waru suru nle gba a̱ ta̱ a̱ nden ma alafiya. 9 A̱vu oɓolo na̱ a̱soja a̱ wu suru no oɓolo na̱ a̱soja a nɗa n ro ma̱ a̱bunda̱, vu to uta̱ vu riya̱a̱ iɗa i le nu uvon tsu upepu wu ucira wu ulungusu reve waru vo o'wo tsa̱ wunla̱ u na u lima̱na̱toi uvaɗi.

10 << <Apa ili i na A̱sulazuva A̱sula̱ a dammai, o urana u ndolo, majiyan ma̱ ta̱ ta̱wa̱ wu okolo a̱ wu, vu ta̱ ta̱wa̱a̱ ni ifoɓi i na i ri ulobonu shi.> >> 11 Vu ta damma, <<N ta̱ riya̱a̱ iɗa i na ilyuci ya̱ yi a̱ ri na̱ kari shi nu uvon. N ta yuwan uvon na ama a na a̱ ri a̱ nden ma asuvu na aza a na a̱ ri a̱ nden n tsu da'wun shi. Suru nle a̱ ta̱ e ilyuci i na i ri na̱ kari shi. A̱ ri na̱ na̱ntsu shi waru a̱ ri na̱ katsuwata vi irumu shi. 12 N ta̱ ta̱wa̱ adama m pura̱ ili yu uvon waru m pura̱ utsuru a̱vu n yuwan uvon na̱ ba̱ta̱ na ri okongo agba ama a̱ ri pe gogo. N ta yuwan uvon na ama a nda a na o ɓolotoi diga a nɗa aza a na a̱ ri nu utsuru wi ina nu utsuru wa aza a na a̱ ri a̱ nden e memere mo uvaɗi.>> 13 Sheba na̱ Dedan na aza atsulu na awini a Sifen oɓolo ni ilyuci ya̱ yi suru a ta yuwan wu yeci adamma, <<Ma̱ ta̱wa̱a̱ ma̱ wu adama vu pura̱ itana yi uvon u ɗa? Adama a̱ nye vu ɓolotoi a̱soja a̱ wu a̱bunda̱? Tsa̱ra̱ vu pura̱ azurufa na̱ zinariya ɗa? Adama vu ka̱ra̱ ni inama yu u'wa ni itana i ɗa? Tsa̱ra̱ vu pura̱ itana yu uvon ya̱ a̱bunda̱ a ɗa?>> 14 <<Adama o ndolo, mawun ma vuma, vu yuwan adanshi vu damma Gog, <Apa ili i na A̱sulazuva Zagbain dammai, O urana u ndolo, a mantsa ma na ama a̱ va̱ Isra'ila a̱ ri a̱ nden ma alafiya, vee reve shi? 15 Vu ta̱ 'yon vu lyawa ugana uba̱ta̱ u na vu ri vu ta̱wa̱, a̱vu na̱ a̱soja a nɗa ma̱ a̱bunda̱. Suru nle ukumbu e ido, a̱ba̱jini oɓolo o ucira wa a̱za̱ o uvon ɗa. 16 Vu ta̱ riya̱a̱ ama a̱ va̱ Isra'ila nu uvon, cine wunla̱ u tsu ɓa̱ru uvaɗi. A rana vu ukosu n ta̱ ta̱wa̱ na̱ a̱vu, vu yuwan uvon ni iɗa i va̱ e esu a nɗa. O to roco akiza a̱ va̱ o ure wi ili i na yaa cina wu Gog. Ne ɗa uvaɗi suru wee reve a̱mu ɗa A̱sulazuva.> >>

17 << <Apa ili i na A̱sulazuva Zagbain dammai, a̱vu ɗa n yuwain adanshi a aci a̱ yi ɗe nu ujimu o una̱ wa agbashi a̱ va̱ a Isra'ila shi? A mantsa ma na ɗe a a'wan a̱bunda̱ a na a̱ ka̱ra̱i, n yuwan ta̱ adanshi e ikaka a na ma̱a̱ ta̱wa̱to wu a aci ama a̱ va̱. 18 Agba o urana u ndolo, a mantsa ma na a̱ vu Gog va̱ riya̱a̱ iɗa ya Isra'ila nu uvon, upan u va̱ wu usuɗu lon ta̱ 'yon, A̱sulazuva Zagbain ɗa dammai ne. 19 Adama a na a̱tsuma̱ a̱ tsushu'un na̱ a̱tsumola̱ngu a̱ va̱, n yuwan ta̱ adanshi a na o urana u ndolo a ta yuwan a̱ba̱jini o ura̱mosu wi iɗa a̱tsuma̱ e iɗa ya Isra'ila. 20 Mugula m mala na̱ nnunu ma zuva ni inama yu una ni ili yi ika̱ta̱pu e iɗa, na̱ vaɗilima̱ suru aza a na a̱ ri nden o uvaɗi. Suru nle e te je'en lipu a̱ ma̱ka̱ka̱n ma̱ va̱. A ta kirima nsasan a̱ cipa̱ e iɗa. Uza̱nluwu wa agaɗi suru a buwa shi. Ukari suru u to oco hali a̱ tyo e iɗa. 21 N ta̱ ta̱wa̱a̱ na̱ matsun me pe'eni a aci a̱ wu uba̱ta̱ suru a nsasan ma Isra'ila. A̱soja a̱ wu a̱ ta̱ ka̱mba̱ a saɓulai na̱ mutsun mu pe'eni nle. A̱sulazuva Zagbain ɗa dammai ne. 22 N ta̱ ta̱wa̱a̱ yi nu uge'etosu na̱ mɓa̱la̱ na̱ wocosu wu mpasa. N ta̱ yuwan iro'i yu ulungusu na atayan a aci a̱ wu. Reve mo oco akina na̱ farinwuta vu ushamu lon a aci a̱ wu na̱ a̱soja a̱ a̱bunda̱ a̱ wu. Waru a aci a̱soja a nɗa ma̱ a̱bunda̱ aza a na a̱ ri oɓolo na̱ a̱vu. 23 Ne ɗa moo roco tsugbain na akiza a̱ va̱. Reve waru n roco aciya̱va̱ a alanga eteshe a nɗa ma̱ a̱bunda̱. Ɗaɗa ee reve a na a̱mu ɗa A̱sulazuva.> >>