1 Adanshi A̱sulazuva a̱ ta̱wa̱ ta̱ uba̱ta̱ u va̱, 2 <<Mawun ma vuma, yuwan ishipa ya̱ a̱tsumola̱ngu adama a Taya.>> 3 Vu damma Taya, za na ri o u'uwata u mala, za na a yuwusan awina na atsulu ama e iɗa yi ngen m mala, Apa nda ili i na A̱sulazuva Zagbain dammai, <<A̱vu Taya, vu damma ta̱, <A̱mu n tu ulobonu lon.> >> 4 Utyo wa̱ wu e memere ma mala ma ɗa u ri, aza a na aa suwusa wu a zuwa ta̱ ulobonu wa̱ wu u yuwan ulobonu. 5 Vu shi ta̱ tsa wantsun u gbain u na yuwain na akpata a sa'ani a fir diga Seni. A tara ta̱ ɗanga sida diga Lebanon tsura̱ a yuwaan wu uba̱ta̱ o usa̱ga̱dosu. 6 Diga a ɗanga vu ugbamu va Bashan a yuwan ta palu vu uluwu va̱ wu na̱ ɗanga memere ma̱ mini ma Sapure reve a lapula a̱tsuma̱ a̱ wu na anga a agiwa. 7 A yuwan ta̱ amuna a̱ wu no okoro a sa'ani diga Masar, waru wo o'wo wu ta̱ atuta. A yuwaan wu ta̱ iɗana na̱ mini ma̱ lima̱ da̱n-da̱n na̱ mini ma̱ ma̱ɗiya̱ ma na mo uta̱i diga e memere ma̱ mini ma Elishaha. 8 Aza a na a̱ ri na̱ nden Sidon na̱ Avad ele ɗa aza a a na ee keɓeshe wu. Aza a na a̱ ri nu ugbozu, ele ɗa o ronoso ɗu aɗanga. 9 A̱za̱ o uguru a Geba a̱za̱ o ulinga wu ukere a̱ ta̱ pe a̱tsuma̱ a̱ wu ele ɗa aza a na a lapulusa uba̱ta̱ u na akpata a ga'asan. Suru antsun na̱ aza a na a̱a̱ luwusa̱ le a̱ ta̱wa̱ ta̱ uba̱ta̱ wa̱ wu adama a wina na atsulu. 10 << <Ama a Pashiya na aza Lud na aza Fut, a̱soja o uvon a̱ wu a ɗa. Ele ɗa aza a na o wo'osu a̱ra̱ga̱ na̱ nlezu mu uvon a̱tsuma̱ a̱ wu, aza a na a̱a̱ ta̱wusa̱ wu na̱ tsugbain ɗa. 11 A̱soja a Avad na aza Hele a̱ da̱na̱ ta̱ a ɓaɓu va̱ wu uka̱nda̱ruwu, waru a̱soja a Gamad a̱ ta̱ pe uba̱ta̱ wa atsura a̱ wu. A̱ sa̱ga̱do ta̱ a̱ra̱ga̱ e le a ɓaɓu a̱ ka̱nda̱ruwa̱. Ele ɗa aza a na a zuwai ulobonu wa̱ wu u yuwain ulobonu.

12 << <Aza a Tarshishi a ta yuwusan awina na atsulu na̱ a̱ɗu adama a̱ cu'un vu utsuru wa̱ a̱bunda̱ a na i ri na̱ a̱yi. A ta kita'usa azurufa, irumu, na̱ kuza, na̱ daluma adama a̱ tsura̱ itana ya̱ wu. 13 Ama a Heleni, na aza a Tubala, oɓolo na aza a Mesheke a ta yuwusan awina na atsulu na̱ a̱vu. A kita'wa ta̱ agbashi ni itana yi rumushili adama a̱ tsura̱ itana ya̱ wu. 14 Ama a Bet Togarama a kita'wa ta̱ ido yu ulinga ni ido yu uvon na̱ nloli mi ido adama a̱ tsura̱ itana ya̱ wu. 15 Ama a Dedan a ta yuwusan awina na atsulu na̱ a̱vu. Pasu vu nge'en m mala na̱ a̱bunda̱ aza a awina na atsulu a̱ wu ɗa la̱nga̱. A tsupa wu ta̱ na anga a agiwa nu uɗanga u sa'ani wa ebon adama a̱ tsura̱ itana ya̱ wu. 16 Ama a Suriya a yuwan ta̱ awina na atsulu na̱ a̱vu adama a̱ a̱bunda̱ e itana ya̱ wu. A kita'wa ta̱ atali a̱ lima̱ da̱n da̱n na̱ a̱vu na amuna e le za mini ma̱ ma̱ɗiya̱ ni itana yu uɗavu yu ukere, okoro a sa'ani, na̱ koral, na̱ rubi. 17 Yahuda na̱ Isra'ila a yuwan ta̱ awina na atsulu na̱ a̱vu. A kita'usa ta̱ yitabo diga Minit, ni ilyalya yu uyo'o, ni ishiki, na̱ mani'i, oɓolo ni ili i ma̱guru.

18 << <Dimaska yuwan ta̱ awina na atsulu na̱ a̱vu adama a̱ a̱bunda̱ e itana ya̱ wu, adama a̱ a̱bunda̱ o utsuru vi cu'un vi ili suru. A wina ta̱ masayan diga Helbon, na̱ ulu uri diga Sahar. 19 Aza a Dan na aza a Heleni diga Uzal a kita'wa ta̱ itana ya awina ya̱ wu. A kita'wa ta̱ irumu, na̱ ɗanga kashiya ma̱guru ni itana i ma̱guru tsa̱ra̱ a̱ tsura̱ itana ya̱ wu. 20 Ama a Dedan a yuwan ta awina na atsulu na̱ a̱vu, a̱ ta̱wa̱ ta̱ na amuna mu nden mi ido. 21 Ama a Arabiya na azagbain a Keda suru ele ɗa aza a na a̱ shi awina na atsulu na̱ a̱vu. A yuwan ta̱ awina na atsulu na̱ a̱vu o mukyokyon, na̱ a̱giri'i, na̱ mgbele. 22 Aza a awina na atsulu a Sheba na̱ Rama a yuwan ta̱ awina na atsulu na̱ a̱vu. A kita'wa ta̱ cu'un vi itana i ma̱guru i na i la'ai ulobonu suru na atali e ikebe na̱ zinariya. 23 Haran, na̱ Kane, na̱ Adini, aza a awina na atsulu a Sheba, na̱ Ashur, na̱ Kilmad a yuwan ta̱ awina na̱ atsulu na̱ a̱vu. 24 A winaa wu ta̱ itana i sa'ani itana i mini ma̱ bulu, uɗava wu ukere wi ikebe, na̱ kape za na ri na̱ mini icu'un icu'un za na a ɗavai na̱ a̱punda̱ a sa'ani waru a̱ nla̱ le ta̱ na̱ a̱la̱ta̱ ugbamu. 25 Antsun a Tarshishi a̱ ta̱ ma̱pura̱ me itana ya awina na atsulu a̱ wu. Vu shiwain ta̱ ni itana e memere ma mala. 26 Aza na o ronusoo wu a tara wu ta̱ a̱ tyo e memere ma mala ma gbain. Amma upepu wa asana u ta ɓuɓatsa wu muɓaci muɓaci pe e memere ma̱ mala. 27 Utsuru wa̱ wu, ni itana ya awina na atsulu, ni itana ya awina, na̱ a̱za̱ o uluwu wa antsun a̱ wu, na aza na o ronuso wu elime, a̱za̱ o ulapulu wa antsun, na aza a awina na atsulu a̱ wu na̱ a̱soja a̱ wu suru, na aza na a̱ ri lo suru a ta liɓa e memere ma mala o urana u na va̱a̱ riya̱. 28 Na̱ mawwaa me mesun ma za na o ronuso wu aɗanga, mulyuci mu nge'en m mala n jinga̱ɗa̱ ta̱. 29 Suru aza a na a̱ luwusa̱ antsun a lyawa ta̱ antsun e le, aza a na a yuwusan ulinga na antsun a̱ mini, na aza na a o ronuso le aɗanga suru e te isawan e ikyun i mala. 30 A̱ ta̱ 'ya̱sa̱n ɗyo le reve a̱ showen wu lon. A̱ ta̱ tsun ma̱buta̱ a aci e le reve a̱ bunda̱la̱sa̱ o okomo*. 31 A ta puna aci e le adama a̱ wu reve o oto akashi a̱tsumola̱ngu. A̱ ta̱ shon adama a̱ wu, na̱ a̱tsumola̱ngu a̱ a̱bunda̱ oɓolo na̱ mesun ma na ma̱ ri uyo'o shi. 32 No oo oruwo waru a yuwan a̱tsumola̱ngu adama a̱ wu, a cana ta̱ ishipa ya̱ a̱tsumola̱ngu adama a̱ wu: <<Zane ɗa da̱na̱i tsa Taya, tsu za na o kototoi e memere ma mala?>> 33 Mantsa ma na itana ya awina na atsulu a̱ wu a rawai a mala, vu cuwa̱nto ta̱ nɗa na̱ a̱bunda̱. A̱bunda̱ o utsuru wa̱ wu na awina na atsulu a̱ wu vu zuwa ta̱ ngono mu uvaɗi n tsura̱ utsuru. 34 Gogo mala ma ɓuɓatsa wu ta̱ a̱tsuma̱ a̱ mini ma̱ a̱ru'un, itana ya awina na atsulu a̱ wu na aza a na suru aa yuwusan ulinga na antsun a liɓa ta̱ oɓolo na̱ a̱vu. 35 Suru aza a na a̱ ri na̱ nden a̱ nge'en m mala a ta yuwan asalama adama e ili i na yaa cina wu. Ngono n le mu uwwa ta̱ wovon lon reve a̱ shuvura̱la̱i urewesu u le adama o wovon. 36 Aza a awina na atsulu a̱tsuma̱ a ama a yuwaan wu ta̱ ulamu. Ukosu wa̱ wu wo o'wo ta̱ ili i wovon waru a̱a̱ da̱shi ene wu shi.> >>